परेरित 9 - मध्य पुरविया थारूसाउलके जिबन बदललै ( परेरित २२:६-१६ , २६:१२-१८ ) 1 साउल परभु येसुके बिस्बासीसबके बिरोधमे धम्कि दैछेलै आ मारैके धुनमे परधान पुजारी लग गेलै, 2 आ उ दमस्कसके सभाघरसबके नाममे पुरजी माङल्कै, चाहे उ मरद हेबे या जनि, परभुके बाटमे चलैबला ओइसबके पकैरके यरुसलेम आने सकि कैहके अधिकार माङल्कै। 3 जब साउल जाइत-जाइत दमस्कस लग पुग्लै, तब अचानक अकाससे इजोत ओकर चारुकात चमकलै। 4 उ भुइयामे खैसपरलै आ तखुन्ते एकटा एहेन अबाज सुनल्कै, “साउल, साउल, तोहे कथिले हमरा सताबैचिही?” 5 तब साउल कहल्कै, “परभु, अहाँ के चियै?” उ कहल्कै, “हम येसु चियौ, जकरा तु सताबैचिही। 6 महज आब तु उइठके सहरमे जो, ओते तोरा कथिकरे परतौ से कहलजेतौ।” 7 साउलसङे जाइबला लोकसब डेराके बौक जखा ठार भ्यागेलै कथिलेत उसब अबाज त सुनल्कै, महज ककरो नै देखल्कै। 8 साउल भुइयासे उठलै आ आँख चियाइरके ताकल्कै त कुछो नै देखल्कै। तब ओकर साथीसब हाथ पकैरके दमस्कस सहरमे ल्यागेलै। 9 ओते उ तिन दिनतक कुछो नै देखल्कै, नै कुछो खेल्कै नै कुछो पिल्कै। 10 दमस्कसमे हननिया नामके एक गोरा येसुके बिस्बासी रहै। ओकरा दरसनमे परभु कहल्कै, “ऐ हननिया।” उ कहल्कै, “हम अतै चियै परभु।” 11 परभु आग्या करैत कहल्कै, “उठ आ सोझ्का गल्ली नामके रस्तामे जो आ यहुदाके घरमे टारससके बासि साउल नामके लोकके खोज, ओते उ परथना कैर रहल छौ। 12 उ फेनसे देखे सकै कैहके दरसनमे हननिया नाम भेल एकटा लोक भितर आइबके आपन उपर हाथ राखैत देखल्कै।” 13 महज हननिया कहल्कै, “परभु, यि लोक यरुसलेममे अहाँके चेलासबके बहौत दुख देनेछै से हम बहौत लोकसबसे सुन्नेचियै। 14 अतौ अहाँके चेलासबके पकरैके अधिकार मुल पुजारीसब ओकरा देने छै।” 15 महज परभु ओकरा कहल्कै, “जो, कथिलेकी साउल गैर-यहुदीसब, रजासब आ इजराएलीसबके सामने हमर नामके परचार करैबला उ हमर छानल लोक चियै, 16 कथिलेकी हमर नामके खातिर ओकरा कतहेक दुख भोगे परतै, आब हम ओकरा देखाइबै।” 17 तब हननिया गेलै आ ओइ घरमे ढुइकके साउल उपर हाथ राइखके कहल्कै, “भाइ साउल, तोहे आबैतखिना जे परभु येसु तोरा रस्तामे दरसन देने छेलौ, ओह्या हमरा तोहर खातिर तु देखे पाबबिही आ पबितर आत्मासे भरपुर हेब्ही कैहके हमरा पठाइने छै।” 18 यि बात कैहते मातर साउलके आँखसे पपरा जखा कुछो खस्लै आ तखुन्ते उ फेनो देखे लाग्लै। तब उ उइठके बप्तिस्मा लेल्कै, 19 तब उ भोजन करल्कै आ ओकरमे फेनसे तागत एलै। साउल ओते कुछदिन तक दमस्कसके चेलासब सङे रहलै। साउल अत्याचारीसे परचारक बन्लै 20 तब उ तुरन्ते सभाघरसबमे ज्याके परचार करे लाग्लै, “येसुवे परमेस्वरके बेटा चियै।” 21 यि बात सुनैबला सबकोइ अच्चम मानैत कहेलाग्लै, “यरुसलेममे येसुके बिस्बास करैबलासबके सताबैबला एह्या नै चियै त? आ अतौ ओइसबके बाइन्हके मुल पुजारीलग लेजेबै कैहके आएल नै छै त?” 22 महज साउलके परचार सक्तिसाली हैतगेलै आ येसुवे खिरिस्ट चियै से परमान द्याके दमस्कसमे रहैबला यहुदीसबके मुह बन्द कैरदेल्कै। 23 तब बहौत दिन बित्लाके बाद यहुदीसब साउलके मारैके जुक्ती निकालल्कै। 24 उसब हमरा मारैके जुक्ती निकाइलरहलछै से बात साउलके थाह भेलै। यहुदीसब साउलके मारैके खातिर रात-दिन दमस्कस सहरके दबालके केबारसबमे पहरा द्याके बैठलरहै। 25 एक दिन ओकर चेलासब रातमे ढकियामे बैठाके सहरसे बाहर दबालके खिरकीबाटे ओइकात गिरा देल्कै। साउल यरुसलेम सहरमे 26 साउल यरुसलेम एलाकेबाद उ परभु येसुके चेलासबसङे भेट करैले ताकैछेलै। महज उसब डराबैछेलै कथिलेत ओहो येसु खिरिस्टके साँचोके चेला भेलै से बातके बिस्बास नै हैछेलै। 27 महज बरनाबास साउलके आपनसङे परेरितसब लग ल्याके गेलै। तब साउल रस्तामे परभुके देखल आ परभु ओकरसङे बोलल आ दमस्कसमे साहसके साथ येसुके नाममे परचार करलहा बातसब ओइसबके कैहदेल्कै। 28 तकरबाद साउल यरुसलेममे सब सङे घुमफिर करे लाग्लै आ साहसके साथ परभुके नाममे परचार करे लाग्लै, 29 तब उ गिरिक बोलैबला यहुदीसबसङे बताबती करैछेलै, महज उसब ओकरा मारैके कोसिस करै। 30 महज यि बात जाइनके बिस्बास करैबला भाइ-भैयारीसब ओकरा कैसरिया सहरमे ल्यागेलै आ ओतेसे ओकर सहर टारससमे पठादेल्कै। 31 तकरबाद सारा यहुदिया, गालिल आ सामरियाके मन्डलीसबमे सताबटसे सान्ती भेलै। परभुके डर मानैत बिस्बासमे मजगुत भेलै। परमेस्वरके पबितर आत्माके जोस पाइबके मन्डलीसब बरहैत गेलै। पतरुस लुड्डामे 32 पतरुस अने-ओने घुमैत-फिरैत लुड्डा नामके सहरमे परभुमे बिस्बास करैबलासबके लग भेट करैले एलै। 33 ओते उ एनियास नाम भेल्हा लोकके भेटलै। जे आठ बरिससे लकबा मारलाके कारन बिछोनामे परल छेलै। 34 पतरुस ओकरा कहल्कै, “ऐ एनियास, येसु खिरिस्ट तोरा निक करतौ। उठ आ तोहर बिछान मिला।” तब उ तुरन्ते उइठके ठार भेलै। 35 लुड्डा आ सारोनमे रहैबला सबलोक ओकरा देखके परभु येसुमे बिस्बास कैरके ओकर देख्याल रस्तामे चलेलाग्लै। 36 योप्पा सहरमे एकटा तबिता नामके जनी बिस्बासी रहै, जकरा गिरिक भसामे “डोरकस” कहैछेलै। (जकर मतलब हरिनी चियै।) उ असल काम आ गरिबसबके दान द्याके हरदम सहयोग करैछेलै। 37 तहै बखत उ बिमार भेलै आ उ मैर गेलै। लोकसब ओकर लहासके नहाके उपरका एकटा कोठलीमे राइख देल्कै। 38 लुड्डा योप्पासे बेसी दुर नै छेलै। चेलासब पतरुस ओतै छै से बात सुइनके ओकरलग दुइ गोरा लोकके अनङ कैहके बिन्ती करैले पठाइल्कै, तब उसब आइबके कहल्कै “परभु, देर नै कैरके अहाँ हमरासबसङे झटसिना आबु।” 39 तब पतरुस उइठके ओइसबसङे गेलै। ओते पहुचलाके बाद उसब ओकरा उपरका कोठलीमे ल्यागेलै। बिधवासब ओकर लगमे ठार भ्याके काने लाग्लै आ डोरकसमे ओइसबसङे रहैत बखत बन्याल कुरता आ औरो बस्तरसब देखेल्कै। 40 तकरबाद पतरुस सबलोकके घरसे बाहर निकालल्कै आ ठेङहुनिया द्याके परथना करल्कै। तब लहास दिसन घुइमके कहल्कै, “तबिता, उठ!” तब उ आँख उघारल्कै त सामनेमे पतरुसके देखके उइठके बैठलै। 41 पतरुस तबिताके हाथ पकैरके उठेल्कै। तब बिस्बासीसब आ बिधुवासबके बोलाइल्कै आ ओइसबके जिते छै कैहके देखेल्कै। 42 यि बात पुरा योप्पामे फैलगेलै, तब ओतेका बहौत लोकसब परभुमे बिस्बास करल्कै। 43 तकरबाद पतरुस बहौत दिनतक योप्पामे छलाके काम करैबला सिमोन सङे रहलै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.