परेरित 27 - मध्य पुरविया थारूपावलके रोम यातरा 1 जब हमसब पानी जहादसे इटालिया देस जाइले निरनय भेलै तब उबस पावलके औरो कैदीसबसङे समराट अगस्तसके सेनाके कप्तान युलियसके जिमा लग्यादेल्कै। 2 हमसब एन्डरामिटेनोससे एसिया परदेसके समुन्दर काते-काते परैबला सहरसब हैत जाइबला जहादमे चहैरके यातरा सुरु करलियै। अरिस्तारखस नाम भेल्हा थेसलोनिके इलाकाके एक गोरे माकेडोनि हमरासबकेसङे सेहो छेलै। 3 ओकर बिहान हमसब सिदोन इलाकामे पुगलियै। युलियस पावल उपर दया देख्याके ओकर साथि-सङीसबके आपन-आपन आबसक्ताके सरसमानसब आनैले अनुमति देल्कै। 4 ओतेसे फेनो हमसब पानी जहादमे चललियै आ हबा उलटाकातसे बहैके कारन हमसब साइपरस टपुके सहारा लैत गेलियै। 5 किलिकिया आ पामफिलिया इलाकाके नजदिकके समुन्दर पार करैत लुकिया इलाकामे परैबला माइरा सहर पहुच गेलियै। 6 ओते कप्तान युलियस अलेकजेन्डरिया सहरसे इटालिया देसमे जाइबला जहाद भेटलै आ उ हमरासबके ओहै जहादमे चरहादेल्कै। 7 हमसब रसे-रसे अगा दिसन चललियै आ एकदम दिकतसे हमसब क्नीडसमे पुगलियै। हबा हमरासबके आगादिसन जाइले एकदमसे दिकत करलक। ओहै खातिर हमसब केरेट टपुके सहारा लैत सालमोनके पखा-पखा हैत गेलियै। 8 बहुत दिकतसे टपुके काते-काते अगा दिसन बरहैत हमसब लासिया सहरके नजदिक सुन्दर बन्दरगाह कहैबला ठाममे आइबगेलियै। 9 ओते पुगैके लेल बहौत समय लागल छेलै आ उपास रहैबला बिसेस दिन सेहो बितगेल छेलै आ समुन्दरमे चलैबला हबा-बिहाइरके कारन समुन्दर यातरा एकदमसे खतरा छेलै। तहैलेल पावल लोकसबके एहेन कैहके समझेल्कै, 10 “हौ दाजु-भाइसब, हमरा यि लागैये जे यदी हमसब समुन्दर यातरा करलासे जहाद आ अकर सर-समान मातरे नै, महज अपनासबके परानो जाइके डर छै।” 11 महज सेनाके कप्तान पावलके बात नै माइनके जहाद चलाबैबला आ जहादके मालिकके बातमे बेसीसे बिस्बास करल्कै। 12 जार महिना बिताबैके लेल उ जहग उचित नै छेलै। अहै खातिर बहौत लोकसब कोनो भि हालतमे ओतेसे चैलके फोनिक्समे जार मास बिताइबै कैहके जहाद चलाबैले सल्लाह देल्कै। केरेट टपुके एक बन्दरगाह फोनिक्स चियै जकर मुहरा दछिन-पछिम आ उतर-पछिम तरफ घुमल छै। जहादके बिनास 13 जब दछिन दिसरसे रसे-रसे हबा बहे लाग्लै तब उसब सोचल्कै कि आब हमसब जाइले सकब। जहाद चलाबैबलासब लङगर खोइलके केरेट टपुके काते-कात हैत जाइले लाग्लै। 14 महज कन्हिक देरके बाद टपुसे बरका अन्हर-बिहाइर उठलै जकरा “उतरा-पुरबैया” कहैछै। 15 जब जहाद हबाके चपेटामे फस्लै तब जहाद बिहाइरके चिरके अगा दिसन बरहैले नै सकैके कारन हबेके रुहमे जाइले छोइरदेलियै। 16 कलौडा नामके छोट टपुके सहरामे पुगलियै त बहुत कठिनसे जहादके पछा बान्हल छोट नाहके जोगाइले सकलियै। 17 नाहके जहादमे तानके भितर आन्लाके बाद जहाद चलाइबलासब जहादके मोटगर-मोटगर रसासे कैसके बानहल्कै। तकरबाद कहि जहाद लिबियाके पखा दिसन सिरटिस कहैबला ठामके बौलमे धैस जेतै कि कैहके डर हैतरहै। तै खातिर जहाद चलाबैबलासब जहादके पाल गिराइल्कै आ जहादके हबेके रुहमे जाइले छोइरदेल्कै। 18 तकर बिहानतक अन्हर अतेक नै झिझोरै छेलै कि उसब जहादमे भेल्हा सरसमानसब समुन्दरमे फेके लाग्लै। 19 तेसर दिन उसब जहादमे बान्हल रसा आ पलरासब आपने हाथसे काटके फेक देल्कै। 20 बहुत दिनतक नै त रौद आ नै तरे देखैले पाबलियै। अन्हर-बिहाइर चलिए रहलाके कारन बच्बै कि नै कैहके आसो मर गेलै। 21 जहादमेके लोकसब खाना नै खेने बहुतदिन भेल छेलै। ओइ बखत पावल ओइसबके कहल्कै, “हौ भाइ-भैयासब, अहाँसब हमर बात माइनके केरेटसे जहाद नै चलाइने रहतियै त नै यि बिपतमे एतियै, नै कोनो बिनासे हेतियै। 22 महज अखनियो हम अहाँसबके बिन्ती करैचियै कि, साहस मातरे करु, कोइ नै आपन जान गुमाइतै, महज जहाद मातरे नास हेतै। 23 आइएके रातमे, हम जै परमेस्वरके चियै आ जेकर हम सेबा करैचियै ओकर स्वरगदुत हमरलग खरा भ्याके कहल्कै कि, 24 ‘हे पावल, नै डेरा! तोरा कैसरके अगा ज्याके ठार हैये परतौ आ परमेस्वर तोरा दया करलाके कारन तोहर सङे जहादमे चरलहा सबके परान परमेस्वर बचाइने छौ।’ 25 अहै खातिर हे हमर भाइ-भैयारीसब साहस कर। कथिलेत परमेस्वरमे हम पुरा बिस्बास करैचियै कि जनङ हमरा कहनेछै तैहनङ हेबे करतै। 26 महज हमसब कोनो टपुके पखामे भास जेबै।” जहाद खुन्डी-खुन्डी भेलै 27 महज जब चौद रातमे अन्दिरियास समुन्दरमे अने-ओने भटकैत रहलै तब अधा रातके जहाद चलाइबलासबके यि लाग्लै जे कोनो जमिनके पाखा दिसन पुइगरहल चियै। 28 तब उसब पानीके गहिर नापल्कै तब ओइसबके थाह भेलै कि पानीके गहराइ असी हाथ जतेक छै। कन्हिक औरो अगा ज्याके फेनो नापल्कै त साठी हाथ जतेक मातर छेलै। 29 पानीके गहिराइ कम भेलासे उसब घबराल छेलै कि कतौ चटानमे ठोकर लाग्तै कि तै डरसे जहादेके पछासे चारु लंगर समुन्दरमे खसेल्कै। तब अनगुत हेबे कैहके परथना करे लाग्लै। 30 जहाद चलाइबलासबके भाइग जाइके बिचार छेलै, तहै खातिर जहादके अगिल्का भागसे लंगर खसाइके बहानासे उसब छोटका नाह समुन्दरमे खसाइने छेलै। 31 महज पावल सेनाके कप्तान आ सैनिक सबके कहल्कै, “यि जहाद चलाइबलासब जहादमे नै रहतै त अहुसब नै बाच्बै।” 32 यि बात सुनलाके बाद सैनिकसब जहादमे बान्हल छोटका नाहके रसा काइटके समुन्दरमे बह्या देल्कै। 33 जब अनगुत हैले लाग्लै तब पावल ओइसबके खाना खाइले आगरह करल्कै। उ कहल्कै, “आइके चौद दिन भेलै आ अहाँसब डरसे भुखले कुछो नै ख्याके रहलचियै। 34 अखन हम अहाँसबके बिन्ती करैचियै कुछो ख्यालिय, नै त कनङके जिबित रहबै। नै डराबु अहाँसबके ककरो मुरीके एकोटा केसो तक नै नोकसानी हेत।” 35 अतेक कैहके उ रोटी लेल्कै आ सबके सामने परमेस्वरके धन्यबाद देल्कै आ तोइरके खाइले लाग्लै। 36 तब उहोसब हौसला पाबल्कै आ उसब खाइले लाग्लै। 37 जहादमे हमसब जम्मा २७६ गोरे लोकसब छेलियै। 38 सबगोरे आपन इछा भैर खैलाके बाद जहादके हलुक बनाबैके लेल सब गहुम समुन्दरमे फेक देल्कै। 39 जब अनगुत भेलै उसब ओइ ठामके चिन्हैले नै सकल्कै, महज ओकरसबके नजर बौलेबौल भेल एकटा ठाममे परलै आ उसब निरनय करल्कै कि यदी सम्भव हेतै त जहादके ओहै ठामदिसन लजाइबै। 40 उसब लंगरके रसासब काइटके लंगरके समुन्दरमे छोइरदेल्कै आ पतबारके बान्हल रसासबके खोइलदेल्कै। तब अगा दिसरके पाल उठाके हबा दिसन घुम्या देल्कै आ जहादके पखा दिसन ल्यागेलै। 41 महज जहाद पानीके निचला भागमे रहल बौलमे ठकर लाइगके एहेनसे भास्लै कि एकोरति टस-मस नै हेबे सक्लै, जहादके पछिला भाग समुन्दरके छालसे ठोकरा ठोकराके टुटे लाग्लै। 42 कैदीसब पौरके भाइग जेतै कि कैहके सैनिकसब ओइसबके मारैके बिचार करल्कै। 43 महज सैनिकके कप्तान पावलके बचाइले चाहैछेलै। तहै खातिर उ ककरो मारैले नै देल्कै। उ आग्या करल्कै कि जकरा सबके पैरी मारैले आबैछै उसब पहिने जहादसे पानीमे कुइदके पौरैत-पौरैत पखामे निकैल जाय। 44 आ बाकी लोकसब जहादके टुटल काठके पटरासबके सहारा ल्याके जाय। अहिना कैरके सबगोरे असलेसे पखामे निकैल गेलियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.