परेरित 26 - मध्य पुरविया थारू1 तकरबाद अगरिपास पावलके कहल्कै, “अहाँके आपन पक्छमे बोलैके अनुमति छै।” तब पावल आपन हाथ पसारके आपन सफाइ देबेलाग्लै- 2 “हे रजा अगरिपास, यहुदीसब हमर उपर लगेल्हा सब आरोपके बिसयमे आइ हम अहाँके सामने आपन बात राखैले मौका पाबलियै यि हमर लेल सौभाग्यके बात चियै। 3 कथिलेकी अहाँ यहुदीसबके रितिरिबाजसे भिनल आ बाद-बिबाद हैबला बातसबसे जानकार लोक भेलाके कारन हमर बात धियान द्याके सुइन दिय कैहके बिन्ती करैचियै। 4 “हम आपन जातीके बिच आपन देसमे आ यरुसलेममे आपन बचपन कनङके बितेलियै से बात यहुदीसब निकसे जानैछै। 5 उसब हमरा बहुत पहिनेसे जानैछै आ यदी उसब चाहतै त यि बातके गबाही द्या सकैये कि हम आपन धरमके एकटा बहुत कटरबादी पन्थमे रैहके एक फरिसी जिबन बिताइने चियै। 6 परमेस्वर हमरसबके पितापुरखाके करल परतिग्यामे हम आसा राखलाके कारन आइ हम अहाँके अगा ठरा भेलचियै। 7 ओह्या बचन पुरा हेबे तै आसमे हमरासबके बारहो कुल पुरे मनसे दिन रात भक्ति करैत आइबरहल छै। हे रजा अगरिपास, हम्हु एह्या आसा राखलाके कारन यहुदीसब हमरा दोस लगेने छै। 8 परमेस्वर मरलहासबके जियाइछै तै बातमे अहाँसब कथिले बिस्बास नै करैचियै? 9 “हम्हु सोचै छेलियै कि, येसु नासरीके नामके बिरोधमे बहुत काराबाही करेके परतै। 10 हम यरुसलेममे ओहै परकारसे बिरोध करलियै, मुख पुजारीसबके अखतियार पाइबके परमेस्वरमे बिस्बास करैबला लोकसबके जहलमे ढोकलियै आ जब ओइसबके मिरतुदन्ड दैछेलै त हमे ओइसबके बिरोधमे सहमति दैछेलियै। 11 बेर-बेर सभाघरसबमे ज्याके ओकरासबके दन्ड द्याके उसब परभु नै माने कैहके कोसिसो करलियै। हम तामससे चुर भ्यागेलियै आ ओकरासबके आनो देसके सहरसबमे ज्याके सताबैले लागलियै। 12 “अहिनङ मुख पुजारीसबसे अधिकार आ आग्या पाइबके हम दमस्कस सहर दिसन गेलियै। 13 हे रजा, हम रस्तामे जाइत खिना दुपहरमे स्वरगसे एहेन इजोत देखलियै जे सुरुजोके इजोतसे तेज हम आ हमर सङिसबके चारुकातमे चमकलै। 14 सबगोरे जमिनपर खैस परलियै। तहै बखत हम हिबरु भसामे एहेन कहैत सुनलियै, ‘साउल, ऐ साउल, तु हमरा कथिले सताइचिही? तु हमर बिरोध कैरके आपनेमे कथिले दुख उठ्यारहल चिही।’ 15 तब हम पुछलियै, ‘परभु, अहाँ के चियै?’ परभु हमरा उतर देल्कै, ‘हम येसु चियै, जकरा तु सताबै चिही। 16 आब उठ! आपन टाङ पर ठार हो, हम तोरा दरसन अइलेल देलियौ जे हम तोरा सेबक आ हमर गबाही दैबला लोक बनाबी आ जे कुछो हमर बिसयमे देखने चिही आ जे कुछो हम तोरा देखाइबौ ओकर तु साक्छी हेब्ही। 17 हम तोरा तोहर आपने जाती आ आन जातीसबसे बचाइबौ। हम तोरा गैर-यहुदीसब लग अइलेल पठारहल चियौ कि, 18 तु ओकरासबके आँख खोइलके अन्हारसे इजोतमे आ सैतानके बन्धनसे परमेस्वर दिसन घुमाबे। जैसे उसब हमरमे बिस्बास करे आ ओकरसबके पाप छमा भ्याजाय आ परमेस्वरके पबितर करल लोकसब रहल ठाममे रहे पाबे।’ 19 “तहैलेल, हे रजा अगरिपास, हम स्वरगिय दरसनके आग्यापालन करलियै। 20 पहिने दमस्कस आ यरुसलेममे तब सारा यहुदिया परदेसमे आ आनजातसबके सेहो हम ज्याके परचार करलियै कि आपन-आपन पाप माइनके पस्चाताप कैरके परमेस्वरमे बिस्बास करु आ आपन कामसबसे हिरदय परिबरतन भेल परमान देखाबैले सिखेलियै। 21 तहिलेल यहुदीसब हमरा मन्दिरमे पकैरके मारैले कोसिस करल्कै। 22 महज आइके दिनतक हम परमेस्वरसे सहायता पाइबिये रहलचियै। अहै खातिर हम अते ठार भ्याके छोटका-बरका सबके गबाही दैचियै। अगमबक्तासब आ मोसाके कहल बचन अबस्य पुरा हेतै से बातसबके अलाबा हम कोनो बात बेसीसे नै कहनेचियै। 23 खिरिस्टके दुख भोगैये परतै आ उ मरलहासबमेसे जिबित भ्याके उठैबला पहिन्का भ्याके उ यहुदी आ गैर-यहुदीके इजोतके सन्देस सुनेतै।” 24 पावल यि बातसब आपन बचाउके लेल कहैत खिना फेस्तस जोरसे कहल्कै, “ऐ, पावल तुहे पागल भ्यागेल चिही! तोहर बहुत ग्यान तोरा पागल बन्यादेनेछौ।” 25 पावल कहल्कै, “हे परतापी फेस्तस, हम पागल नै चियै, महज हम जे कहैचियै उ एकदम सत आ जाइज छै। 26 खुद रजा अगरिपासके यि बातसब मालुम छै तै लेल हम ओकर सामने निडर भ्याके बोइलरहल चियै। हम बिस्बास दियाबैचियौ कि कोनो भि बात ओकरसे घोसरल नै छै। कथिलेत यि सब बातसब गुप-चुपमे नै भेल छै। 27 रजा अगरिपास, कि अहाँ अगमबक्तासबमे बिस्बास करैचियै? हम जानैचियै कि अहाँ पक्का बिस्बास करैचियै।” 28 अगरिपास पावलके कहल्कै, “कि अहाँ हमरा थोरबेहेक समयमे खिरिस्टियन बनाबैले चाहैचियै?” 29 पावल उतर देल्कै, “एके रतिमे या बहुत देरमे हेबे, हम परमेस्वरसे परथना करैचियै कि हथकरी छोइरके, अहाँ मातरे नै बल्की उ सबगोरे जे आइ हमर बात सुनै छै, से सबगोरे हमरे जखा हेबे।” 30 अतहेक कहैत मातर रजा अगरिपास, बडा हाकिम फेस्तस, बरनिकी आ ओकरसङे बैठलहा सब गोरे ठार भेलै। 31 तब उसब निकलै बखत एकदोसरसे एहेन कहैत निकल्लै, “यि लोक त जहलमे ढोकाइबला या मिरतुदन्डके सजाय पाबैबला एहेन कोनो काम नै करने छै।” 32 अगरिपास फेस्तसके कहल्कै, “यदी यि कैसरसे बिन्ती नै करने रहतियै त अकरा छोइर देतियै।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.