परेरित 25 - मध्य पुरविया थारूफेस्तसके अगामे पावल 1 फेस्तस आपन परान्तमे एलाके तिन दिन बाद कैसरियासे यरुसलेम गेलै। 2 ओते मुल पुजारीसब आ यहुदी अगुवासब पावलके बिरोधमे दोस लगाइल्कै, 3 आ पावलके यरुसलेम पठादिय कैहके बिन्ती करल्कै, कथिलेत उसब पावलके रस्तेमे मारैके योजना बनाइने रहै। 4 महज फेस्तस कहल्कै, “पावल कैसरियाके जहलमे बन्द छै आ हम ओते जल्दीए ज्यारहलछियै। 5 यदी अहाँसबके अगुवासब हमरसङे जाइले चाहैछै त पठादियौ आ यि लोक कोनो खराबी करने छै त ओतै दोस लगाइबै।” 6 फेस्तस आठ-दस दिनतक उसबसङे यरुसलेममे रैहके कैसरिया घुइमके एलै। तब बिहानके नियाइ-आसनमे बैठके पावलके बोलाइले आदेस करल्कै। 7 जब पावल ओते एलै तब यरुसलेमसे एल्हा यहुदीसब ओकर अगल-बगल खरा भ्याके गम्भीर किसिमके दोस लगाबे लाग्लै महज उसब कोनो दोसके परमान दैले नै सकल्कै। 8 तब पावल आपन पक्छमे बोले लाग्लै, “हम नै त यहुदी नियमके बिरोधमे, नै मन्दिरके बिरोधमे आ नै कैसरके बिरोधमे कोनो अपराध करनेचियै।” 9 महज फेस्तस यहुदीसबके खुसी करैके लेल पावलके पुछल्कै, “कि तु यरुसलेम ज्याके ओतै हमर अगा यि बातके बारेमे हम तोहर फैसला कैरदेबौ से चाहैचिही?” 10 महज पावल कहल्कै, “हम कैसरके नियाइ-आसनके अगा खरा चियै। हमर नियाइ अतै होना चाही। अहाँके निकसे थाहछै कि हम यहुदीसबके बिरोधमे कोनो खराबी नै करनेचियै। 11 अगर हम कोनो अपराध करनेचियै त हम मरैले तयार चियै। महज उसब जे आरोप हमरा लगारहलछै तैके कोनो परमान नै छै त हमरा कोइ नै उसबके हाथमे सोपैले सक्तै। हम बडा-हाकिम कैसरसे बिन्ती करैचियै।” 12 तब फेस्तस आपन सलाहकारसबसे छलफल कैरके जबाफ देल्कै, “तु बडा-हाकिम लग जाइले बिन्ती करलिही, तै खातिर हम तोरा ओकरलग पठाइचियौ।” राजपाल फेस्तस आ रजा अगरिपास 13 कुछ दिनके बाद रजा अगरिपास आ ओकर बहिन बरनिकी फेस्तसके स्वागत करैले कैसरिया एलै। 14 उसब कुछदिन कैसरियामे रहलै आ फेस्तस उसबके पावलके बारेमे कहल्कै, “अते एकटा लोक छै, जकरा फेलिक्स जहलमे बन्द कैरके छोइरदेनेछै। 15 जब हम यरुसलेम गेलछेलियै तब मुल पुजारीसब आ औरो यहुदी अगुवासब ओकर बिरोधमे दोस लगाइने रहै आ ओकरा दन्ड देबे परतै कैहके बिन्ती करने छेलै। 16 महज हम जबाफ देलियै, रोमीसबके एहेन चलन नै छै, कोनो भि लोकके दन्ड देबेसे पहिने जबतक दोस लगाइबलाके अगा खरा भ्याके आपन बचाउके लेल जबाफ दैके मौका नै मिलैछै। 17 जब उसब अते हमरासङे एलै तब हम देर नै कैरके बिहान पावलके नियाइके अदालतमे हाजिर हैले आग्या देलियै। 18 तब बिरोधीसब ओकरा दोस लगाबे लाग्लै, महज उसब एहेन कोनो आरोप लगाबे नै सकल्कै जे सोच्ने छेलियै। 19 महज ओकरासे ओइसबके आपन धरमके बारेमे बिबाद छेलै आ मरल येसुके बारेमे छेलै, जकरा पावल जिबिते छै कैहके जोर देने रहै। 20 यि बातके हम कनङके खोज-तलास करबै से दोधारमे परलियै। तैल्याके हम ओकरा पुछलियै, ‘कि तु यरुसलेम ज्याके ओतै हम तोहर फैसला कैरदेबौ से चाहैचिही?’ 21 महज पावल कैसरसे फैसला करल जाय कैहके बिन्ती करलाके कारन ओकरा कैसर लग नै पहुचाबै तक पहरामे राखैले आदेस देलियै।” 22 तब यि बात सुइनके अगरिपास फेस्तसके कहल्कै, “हमरा आपनेसे ओकर बात सुनैले मन लाग्लै।” तब उ कहल्कै, “अहाँ बिहाने ओकर बात सुइनलेबै।” पाबल अगरिपासके अगामे 23 तकर दोसरदिन अगरिपास आ बरनिकी बरका धुमधामके साथ सेनापतीसब आ सहरके परमुख लोकसबसङे सभामे एलै। तब फेस्तस पावलके हाजिर करैले आदेस देल्कै। 24 फेस्तस कहल्कै, “रजा अगरिपास आ उपस्थित भेल भलादमी लोकसब, अहाँसब यि लोकके देखैचियै कि, अकर बारेमे यरुसलेममे आ अतौ सब यहुदी जातीसब ‘आबसे यि लोक जिबित रहैके योग्यके नै चियै’ कैहके जोरसे हल्ला करैत माङ करने छेलै। 25 महज हम यि लोक मिरतुदन्ड पाबैके कोनो दोस नै भेटलियै। तब उ आपने रोमी समराट कैसर लग जाइले बिन्ती करलाके कारन हम ओकरा कैसर लग पठाबैके निरनय करलियै। 26 अकर बारेमे हमरा कैसरके लिखैले कुछो खास बात थाह नै छै। तै खातिर हम ओकरा अहाँसबके अगा आ खास कैरके रजा अगरिपासके अगामे आनैले चाहलियै कि हमसब ओकर छनबिन करबै आ हमरा कुछ लिखैके लेल भेटत। 27 कथिलेत कोनो दोसे बिना ओकरा पठाइले हमरा निक नै लाग्तै।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.