परेरित 24 - मध्य पुरविया थारूपावल फेलिक्सके अगामे 1 पाँच दिनके बाद परधान पुजारी हननिया, कुछ अगुवासब आ तरतुल्लस नामके एकटा ओकिलके ल्याके कैसरिया सङे ओते एलै। तब उसब पावलके बिरोधमे हाकिमके अगा आरोप लगाइल्कै। 2 तब पावलके बोलाइल्कै आ तरतुल्लस ओकरा आरोप लगाइले लाग्लै, “माननिय फेलिक्स, अहैके कारन हमसब अतहेक बरिससे सान्तीसे बैठे सकल चियै आ यि देसमे अहाँके बुइधसे बहुतो सुधारके कामसब भेल छै। 3 यि बात हर परकारसे सगरो हमसब धन्यबादके साथ सुइकार करैचियै। 4 आब हम अहाँके बेसी समय लैले नै चाहैचियै, तैयो हमरासबके बिन्ती दया कैरके कन्हिको सुइनलिय। 5 कथिलेत यि कलह मचाइबला लोक चियै, सरा सन्सारके यहुदीसबमे हुलदङा मचाइते घुमैछै आ नासरी कहाइबला झुठा-पन्थके मुल अगुवा चियै। 6 यि लोक मन्दिरके असुध करैके कोसिस करैछेलै, महज हमसब एकरा पकरलियै। [हमसब आपन धारमिक नियम अनुसार फैसला कैरदेने रहतियै। 7 महज सेनापती लुसियस आइबके अकरा जबरजस्ती हमरासबके हाथसे बचाके ल्यागेलै, 8 आ अहाँके लग हाजिर हैले हमरासबके आग्या देल्कै।] यदी अहाँ आपनेसे सबाल करबै त, हमसब ओकर बिरोधमे लग्याल आरोप ठिक छै कैहके थाह हेतै।” 9 तब औरो यहुदीसब यि बात ठिक छै कैहके सहमति जनाइल्कै। पावलके जबाफ 10 जब बडा-हाकिम पावलके बोलैके इसरा करल्कै तब पावल जबाफ देल्कै, “हमरा थाहछै कि, अहाँ बहुत बरिस पहिनेसे यहुदी जातीके नियायधिस भेलचियै, तैल्याके हमरा अहाँके अगामे बयान दैले उत्साह मिलल छै। 11 हम यरुसलेममे परमेस्वरके आराधना करैले एल बारह दिनसे बेसियो नै भेल छै। अहाँ यि बात आपनोसे पता लगाबे सकैचियै। 12 हमरा दोस लगाइबलासब नै त कोनो लोकसङे झगरा करैत देखल्कै, नै त मन्दिरमे, नै त सभाघरमे या सहरमे लोकसबके बहकाइत देखल्कै। 13 नै त उसब हमर उपर लग्याल आरोपके कोनो परमान दैले सक्तौ। 14 हँ, हम सुइकार करैचियौ कि, परभुके रस्तामे हम चलैचियै, जकरा उसब झुठा पन्थ कहैछै। हम आपन पुरखासबके परमेस्वरके आराधना करैचियै आ मोसाके देल बेबस्था आ अगमबक्ताके किताबमे लिखल बमौजी सब बातमे बिस्बास करैचियै। 15 हम्हु उसब जखा परमेस्वरमे धरमी आ अधरमी दुनु मरलाके बाद फेनो जिबित हेतै तैमे आसा राखैचियै। 16 तै खातिर परमेस्वर आ लोकसबके नजरमे हम निरदोस रहैले चाहैचियै। 17 “बहुत बरिस बितलाकेबाद हम आपन जातीके भाइ-भैयारीसबके दान आ परमेस्वरके भेटी चरहाबैके लेल यरुसलेम एल छेलियै। 18 एह्या काम कैरते-कैरते उसब हमरा मन्दिरमे देखल्कै। तखैन हम सुध हैबला बिधी पुरा कैरलेने छेलियै। ओते कोनो किसिमके भिर-भार आ हो-हल्लो नै छेलै। 19 महज हमरा एसियाके कुछ यहुदीसब मन्दिरमे देखल्कै। यदी हमर बिरोधमे कुछो छै त उसब आरोप लगाबैले सक्तियै। 20 या त आपनेसे आइबके कहे कि हमरमे कोन दोस भेटेल्कै। 21 केबल एकटा बातके मातरे दोस लगाइले सकैछै, कि हम उसबके बिचमे जोरसे कहने छेलियै ‘मरलसब फेनो जिबित हैछै तकर बिसयमे आइ हमर मुदा चैलरहल छै।’” 22 महज फेलिक्सके परभुके उ रस्ताके बारेमे निकसे जानकारी भेलाके कारन उ एहेन कैहके उसबके पठादेल्कै, “जबतक सेनापती लुसियस नै एतौ ताबेतक यि मुदाके फैसला नै हेतौ।” 23 अतबे कैहके फेलिक्स पावलके कुछ स्वतन्तरसङे पहरामे राखिहे आ ओकर सङिसबके आबसेक्ता पुरा करैले नै रोकिहे कैहके कप्तानके आदेस देल्कै। फेलिक्स आ दुरसिल्लाके सामने पावल 24 कुछ दिनकेबाद फेलिक्स आपन यहुदी घरबाली दुरसिल्लाके ल्याके एलै। तब पावलके बोल्याके येसु खिरिस्टके बिस्बासके बारेमे ओकरसे सुनल्कै। 25 जब पावल धरमी भ्याके काम करे परतै, आपन मनके बसमे राखे परतै आ आबैबला नियाइके बारेमे बोल्लै तब फेलिक्स डेरेलै आ कहल्कै, “अखुन जो, मौका मिल्तौ त हम फेनो तोरा बोलाइबौ।” 26 पावलसे कुछ पैसा मिल्तै कि तैके आस करने छेलै। तैल्याके उ पावलके बेर-बेर बोल्याके बातचित करैछेलै। 27 दुइ बरिसके बाद फेलिक्सके ठाममे परकियस फेस्तस बडा-हाकिम भेलै। तब उ यहुदीसबके खुसी राखैले पावलके जहलेमे बन्द कैरके गेलै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.