परेरित 13 - मध्य पुरविया थारूबरनाबास आ साउलके परमेस्वर चुनल्कै 1 एन्टिओखिया सहरके मन्डलीमे अगमबक्तासब आ सिक्छा दैबला लोकसब रहै। उसब बरनाबास, करिया कहाइबला सिमियोन, कुरेनीमे रहैबला लुकियस, रजा हेरोदेसङे पालन-पोसन भेल मनेन आ साउल रहै। 2 एक दिन उसब उपासे रैहके परभुके आराधना करैबखत पबितर आत्मा कहल्कै, “सुन, जै कामके खातिर हम तोरासबके बोलाइने चियौ, ओहै कामके खातिर बरनाबास आ साउलके चुन।” 3 तब उपासे रैहके आ परथना कैरके उसब ओकरौरके उपर हाथ राइखके परथना कैरके पठादेल्कै। बरनाबास आ साउल साइपरस टपु गेलै 4 बरनाबास आ साउलके पबितर आत्मा पठेलाके कारन उसब एन्टिओखियासे सिकुलिया सहरमे गेलै। ओतेसे उसब समुन्दरके यातरा पार कैरके साइपरस टपुमे गेलै। 5 सलामिस सहरमे पुग्लाके बाद उसब ओते यहुदीसबके सभाघरमे परमेस्वरके बचन सुनाबे लाग्लै। यि काममे सहयोग करैले मरकुस कहाइबला युहन्ना ओकरौरके सङे रहै। 6 जब उसब पुरे टपुके यातरा करैत पाफोस सहरमे पहुचलै, तब ओते उसब एकटा बारयेसु नामके यहुदी जादुगरके भेटलै। उ झुठ बाइजके आपनके परमेस्वरके अगमबक्ता चियौ कहैछेलै। 7 उ जादुगर साइपरस टपुके बडा-हाकिम सरगियस पौलुसके सङे रहैछेलै। सरगियस पौलुस बुधिमान लोक रहै, उ बरनाबास आ साउलसे परमेस्वरके बचन सुनी कैहके ओइसबके आपन घरमे बजेल्कै। 8 महज उ जादुगर एलुमास (गिरिक भसामे एलुमासके अरथ जादुगर चियै) ओकरौरके बिरोध करल्कै आ सरगियस पौलुसके बिस्बास करैसे रोकैके कोसिस करल्कै। 9 महज साउल, जकरा पावल सोहो कहैछेलै, उ पबितर आत्मासे भरपुर भ्याके ओइ जादुगरके एकटक लग्याके ताकैत कहल्कै, 10 “ऐ सैतानके बच्चा, सब सतकरमके दुस्मन, तु सबकिसीमके छलकपट आ बैमानीसे भरल चिही! कि तु सोझ बाटके टेढ करैले नै छोरबिही? 11 आब देख, परभुके हाथ तोहर बिरोधमे उठल छौ। आब अखुन आन्हर हेब्ही आ कुछ समय तु सुरुजके इजोत नै देखबिही।” तब तखुन्ते ओकर आँखमे करिया धुइन लागल जखा लाग्लै आ उ अन्हरागेलै। तब कोइ ओकरा हाथ पकैरके लज्यादेतै कि कैहके उ सहारा ताके लाग्लै। 12 तब बडा-हाकिम यि घटना देखके परभु येसुके बिस्बास करल्कै। उ परभुके सिक्छासे छक परल रहै। पिसिदिया इलाकाके एन्टिओखिया सहरमे 13 पावल आ ओकर सङिसब पाफोस सहरसे पानी जहाद चहैरके पामफिलिया इलाकाके परगा सहरमे पहुचलै आ मरकुस कहाइबला युहन्ना ओतेसे यरुसलेम घुइमके एलै। 14 महज उसब परगासे निकैलके पिसिदियाके एन्टिओखिया सहरमे एलै। ओते उसब बिसराम दिनमे यहुदीसबके सभाघरमे ज्याके रहलै। 15 मोसाके देल बेबस्था आ अगमबक्तासबके लिखल किताब पढ़लाके बाद, सभाघरके अगुवासब पावल आ बरनाबासके बोल्याके कहल्कै, “हे यौ भैयारीसब! यदी अहाँसबसे लोकसबके साहसके खातिर कुछो कहैले चाहैचियै त, कहु।” 16 तब पावल ठडा भेलै आ हाथके इसरा करैत कहल्कै, “हे इजराएलके बासिसब आ परमेस्वरमे बिस्बास करैबला सबगोरा, किरपा कैरके हमर बात सुन, 17 इजराएल जातीके परमेस्वर हमरौरके पुरखासबके छानल्कै। उसब मिसरदेसमे रहैत काल ओइसबके खन्दानके बरहाइने रहै। परमेस्वर आपन पाखुरके तागतसे ओइसबके मिसरदेससे निकाइलके आनल्कै। 18 चालिस बरिसतक उजार जगहमे परमेस्वर ओइसबके देखभाल करल्कै। 19 तब उ कनान देसके सात जातीके नास कैरके, ओइ देसके ओकरासबके अधिकारमे चार सय पचास बरिसतक देल्कै। 20 तहियासे सामुएल अगमबक्ताके बखत तक परमेस्वर ओइसबके सासकसब देल्कै। 21 तकरबाद जब इजराएली लोकसब परमेस्वरसे एकटा रजा माङल्कै तब ओकरासबके खातिर बेन्यामिनके कुलके किसके बेटा साउलके देल्कै आ उ चालिस बरिसतक राज करल्कै। 22 तब साउलके हटाके परमेस्वर दाउदके रजा बनाइल्कै। दाउदके बारेमे परमेस्वर यि बात कहने रहै, ‘यिसैके बेटा दाउद हमर मन पसनके लोक चियै। उ हमर सब इक्छा पुरा करैछै।’ 23 परमेस्वरके परतिग्या करल जहिना दाउदके कुलसे इजराएली लोकसबके खातिर एक गोरा मुक्तीदाता येसुके पठेल्कै। 24 येसु आपन सेबाके काम सुरु करैसे पैहने बप्तिस्मा दैबला युहन्ना एलै। उ सब इजराएलके सबलोकके आपन-आपन पाप माइनके बप्तिस्मा लेबे परतौ कैहके परचार करल्कै। 25 जखुन युहन्ना आपन काम ओराबे लाग्लै तखुन कहल्कै, ‘तुसब हमरा जे बुइझ रहलचिही, से हम नै चियौ। महज हमरसे पछा एक गोरा आबैछौ, जकर हम जुताके फितो तक खोलैके जोकर नै चियै।’ 26 “ऐ, अबराहमके कुलके धियापुता आ ओकरौरके परमेस्वरके डर मानैबला चाहे उ आने जातीके कियनै हेबै, कथिलेत यि मुक्तीके खबर परमेस्वर अपनासबके खातिर पठाइने छै। 27 महज यरुसलेमके बासि आ ओकरौरके सासकसब मुक्तीदाता येसुके नै चिन्हल्कै। अगमबक्तासबके धरमसास्तरमे लिखल बात हरेक बिसराम दिनमे उसब परहल्कै तैयो उसब नै बुझल्कै आ ओकरा मिरतुदन्ड द्याके उ बचन पुरा करल्कै। 28 मिरतुदन्डके कोनो कारन नै भेटलै तैयो उसब येसुके मारैये परतै कैहके पिलातसके अगा माङ करल्कै, 29 आ ओकर बिसयमे लिखल सब बात उसब पुरा करलाके बाद उसब येसुके कुरूससे निचा उताइरके चिहानमे लज्याके राखल्कै। 30 महज परमेस्वर येसुके मरलोके बाद फेनो जिबित करल्कै। 31 गालिल इलाकासे ओकरसङे यरुसलेममे एल्हासब लग बहौत दिनतक ओकर देखाब दैत रहलै। अखुन्तो उसब इजराएलके लोकसबलग ओकर साक्छी छेबेकरै। 32 हमसब यि सुसमाचार सुनाइले एलचियौ, जे बात परमेस्वर अपनासबके पुरखासबके परतिग्या करने रहौ। 33 परमेस्वर येसुके मरलसे जियाके उ यि परतिग्या अपनासबके आ ओकरसबके धियापुताके खातिर पुरा करने छै। जनङ धरमसास्तरके भजनसङगरहके दोसर अध्यायमे लिखल छै, ‘तु हमर बेटा चिही, आइके दिन हम तोरा जलम देनेचियौ।’ 34 उ येसुके फेनो कहियो नै मरेपरतै तनङके जिएल्कै तै बातमे परमेस्वर अनङ कहनेछै- ‘पबितर आ अटल आसिसके बचन जे दाउदके देलगेल छेलै, से हम तोरासबमे पुरा करबौ।’ 35 “अहिनङे भजनसङगरहके दोसरो ठाममे कहनेछै, अहाँ आपन पबितर सेबकके सैरके नास हेबे नै देबै। 36 “यि बात दाउद उ आपने बारेमे नै कहने रहै, कथिलेत ओकर जिबनमे परमेस्वरके इक्छा अनुसार काम कैरके उ मरलै आ आपन पुरखासब जरे गारलगेलै आ ओकर देह सैर गेलै। 37 महज जकरा परमेस्वर मरलसे जियाइल्कै ओकर देह नै सड़लै। 38 तै खातिर भाइ-भैयारीसब, तोरौरके थाह हेबे, कि येसुवेटासे मातर तोरौरके पाप छमा भ्या सकैछौ। 39 येसुमे बिस्बास करैबला जतहेक छै से सब पापसे छुटकारा पाबने छै, जे बात मोसोके लिखल धरम-नियमसे पुरा करे नै सक्ने रहै। 40 तै खातिर साबधान रह, नै त अगमबक्तासबके किताबमे लिखल यि बातसब तोरौरके सङे भ्यासकैछौ- 41 हे निन्दा करैबला लोकसब, देखके चकित हो आ नास भ्याजो! कथिलेत हम तोरे बखतमे एहेन काम करबौ, ओइ कामके बारेमे तोरा कोइ कहबो करतौ त, कहियो नै तुसब बिस्बास करबिही।” 42 जखुन पावल आ बरनाबास सभाघरसे बाहर निकलैत खिना आबैबला बिसरामके दिन यि बात सुन्या दैहे कैहके लोकसब ओइ दुनु गोराके बिन्ती करल्कै। 43 सभा ओरेलाकेबाद बहौत यहुदी आ यहुदी धरम मानैबला लोकसब पावल आ बरनाबासके पछा लाग्लै। पावल आ बरनाबास ओइसबसे बात करैत परमेस्वरके किरपामे भरोसा राखने रह कैहके उत्साह देल्कै। 44 दोसर बिसरामके दिनमे परमेस्वरके बचन सुनैले सब सहरके सब लोकसब उनैटके चैलएलै। 45 लोकसबके भिर देखके यहुदीसब एकदमसे डाह करे लाग्लै। पावल जे बाजैछेलै तै बातके उसब अपमान करैत ओकर बिरोध करे लाग्लै। 46 तब पावल आ बरनाबास साहस कैरके कहल्कै, “परमेस्वरके बचन सबसे पैहने तोरासबके सुनेनाइ जरुरी छेलै, महज तोरौरके सुनैले नै मानलिही। तोरौरके आपनके अनन्त जिबनके योगके नै मानैचिही। आब हमसब दोसर जातीके लोकसबके परमेस्वरके बचन सुनाबे जेबै। 47 कथिलेत परभु हमरौरके अहिनङे आग्या करने छै- ‘पिरथिबीके अन्तके सिमा तक लोकसब हमर मुक्ती पाबै कैहके, अहै कामके खातिर गैर-यहुदीके बिचमे इजोत हैले नियुक्त करनेचियौ।’” 48 जब गैर-यहुदीसब यि बात सुनल्कै, तब उसब खुसी भेलै आ परमेस्वरके बचनके गुनगान करल्कै आ अनन्त जिबनके खातिर नियुक्त भेल्हा सबलोक बिस्बास करल्कै। 49 अहिनङे परमेस्वरके बचन ओइ इलाकामे पसरलै। 50 महज यहुदीसब परमेस्वरके भक्ति करैबला जनिसब आ सहरके नेतासबके समेत पावल आ बरनाबासके बिरोधमे चरह्या-बरह्याके ओइसबके ओइ इलाकासे भगा देल्कै। 51 महज पावल आ बरनाबास आपन टाङके गरदा ओइसबके बिरोधमे झाइरके आइकोनियन सहर दिसन चैलगेलै। 52 तब ओहै बखत एन्टिओखियाके बिस्बासी बहौत खुसी आ पबितर आत्मासे भरपुर भेलै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.