३ युहन्ना 1 - मध्य पुरविया थारू1 हम मन्डलीके एल्डर युहन्नाके तरफसे, हमर पिरिय सङी गायसके यि चिठी लिखैचियै, जकरा हम साँचोके परेम करैचियै। 2 पिरिय सङी तोहर सबचिज असल हेबे आ आत्मिक जिबन स्वस्थ्य रहल जखा तोहर सारिरीक जिबन स्वस्थ्य रहे कैहके हम परथना करैचियौ। 3 कतहेक बिस्बासी भाइसब आइबके तोहर बारेमे बताइल्कै कि तु सत्यता आ बिस्बासयोग्यमे चैलरहलचिही, तब हमरा बहौत खुसी लागल। 4 हमर बेटा-बेटीसब सतके रस्तामे चलैछै कैहके सुन्नाइसे बरका आनन्द हमर लेल औरो कथी हेतै? 5 पिरिय सङि, बिस्बासी भाइसबके आ खास कैरके अनचिन्हार बिस्बासी लोकसबके लेल जे कुछ कैररहल चिही, तु एकटा सच्चा बिस्बास योग्य भ्याके कैर रहलचिही। 6 उसब तोहर परेमके बारेमे मन्डलीमे साक्छी देनेछै। तु परमेस्वरके नजरमे मनपरैबला हिसाबसे ओइसबके यातरामे अगा बरहैके लेल मदत करबिही त असल हेतौ। 7 कथिलेकी उसब परभुके नामके परचार करैले अगा बरहल छै आ परभुके नै चिन्हैबला सबसे कुछो सहयोग नै लेने छै। 8 ओहैसे आपन बिस्बासीसब एहेन लोकसबके मदत करेपरतै, ताकी सतके सिक्छामे सहकरमी भ्यासकी। 9 हम मन्डलीके चिठीमे यि बातसब लिखने छेलियै। महज तोरासबके बिचमे मन्डलीके अगुवा हैले चाहैबला डियोतिरिफास हमर अधिकार सुइकार नै करैछै। 10 हम तोरासबलग एबौ त ओकर करल नै निक काम आ हमरासबके बिरोधमे बाजल सब खराब बात सुनाइबौ। ओतबेहेकमे सन्तुस्ट नै भ्याके उ अनचिन्हार बिस्बासी लोकसबके स्वागत नै करैछै आ जेसब स्वागतो करैले चाहैछै ओइसबके नै करैले दैछै आ ओइसबके मन्डलीयोसे बाहर निकाइल दैछै। 11 पिरिय सङि, तु खराब कामके देखासेखी नै कर, बरु असल कामके देखासेखी कर। जे असल काम करैछै, उ परमेस्वरके बेटा-बेटी चियै आ जे अधलाह काम करैछै, उ परमेस्वरके नै चिन्हने रहैछै। 12 डेमेतिरियसके बारेमे सबलोक असल गबाही दैछै आ उ सतमे चलैछै से बात ओकर जिबनसे सत आपनेसे साक्छी देनेछै। हम्हुसब ओहै बातके गबाही दैचियै आ तुसब जान्बे करैचिही कि, अपनासबके गबाही सत छै। 13 हमरा तोहर लेल लिखैले बहुतो बातसब छेलै, महज हम चिठी लिखैले नै चाहैचियै। 14 बरु हम तोरा जल्दिए भेटमुलाकातके असा करनेचियै आ हमसब आमने-सामने भेटके बातचित करबै। 15 तोरा सान्ती मिले। अतेका सब सङीसब तोरा गोरलगी पठाइनेछौ। ओते भेल सब सङिसबके सेहो हमर तरफसे गोरलगी सुन्यादैहे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.