२ तिमोथी 4 - मध्य पुरविया थारूपरमेस्वरके सुसमाचार सुनाइके आग्या 1 परमेस्वर आ खिरिस्ट येसुके अगा, जे आपन राज अस्थापना करैले एतै आ उ जियल आ मरल सबके नियाय करतै, तै बातके धियानमे राइखके हम तोरा करा आग्या दैत कहैचियौ कि 2 परमेस्वरके बचन सुना। बेलोमे कुबेलोमे सुसमाचार सुनाइले नै छोर। पुरा-पुरी धिरजसे लोकसबके सम्झा, चेताबनी दहै आ असल सिक्छासे हिम्मत बरहा। 3 कथिलेत आब एहेन समय आइबरहल छै कि लोकसब सहि सिक्छाके बात सुनैले बरदास नै करतै। बरु आपने इक्छाके पछा भाग्तै। उसब आपन इक्छासे ओहै गुरुसबके ढेरियाइतै जे ओइसबके सुनैले मज्जा लागैबला बातसब सुनाइतै। 4 उसब सत बातसब सुनैले कान मुइनलेतै महज पहिन्का लोकसबके बनाल बनोतरी कथामे धियान देतै। 5 महज तु हर परिस्थितीमे सचेत रह, दुख उठा, सुसमाचार सुनाइबला काममे लागल रह आ आपन सेबाके काम-काज पुरा कर। 6 कथिलेत हम बलिके रुपमे अरपन हैले लागल चियौ। हमर जाइबला समय आइबगेलौ। 7 हम उत्तम लराइ लरने चियै। हम आपन दौर पुरा करनेचियै आ आपन बिस्बासमे अटल चियै। 8 आब त परमेस्वर हमर खातिर धारमिकताके मुकुट राखनेछै। जे पुरस्कार धारमिकताके नियाय करैबला परभु ओइ दिन हमरा देतै, उ हमरा मातरे नै महज जेसब तन-मनसे ओकर आबैबला बाट ताकैछै ओइसबके लग्यादेतै। 9 सकभर हमरा जल्दी आइबके भेट कर। 10 कथिलेत डेमास सन्सारके मोहमे फैसके हमरा छोइरदेल्कै आ थेसलोनिकेमे चैलगेलै। केरसेन्स गलातियामे आ तितस दलमातियामे गेलछै। 11 हमरसङे त अखुन लुका मातरे छै। मरकुसके तु आपनसङे लेने आबिहे, कथिलेत उ हमर सेबाके काममे बहौत सहायता करतै। 12 हम तुखिकसके एफिससमे पठाइनेचियै। 13 आबै बखत तोरोआस सहरमे कारपस लग हमर छोरलहा बस्तर ल्याके आबिहे। ओते भेल्हा सब किताबसब आ खास कैरके छलामे लिखल किताबसब नै बिसैरके आइन दिहे। 14 लोहाके काम करैबला अलेक्जेन्डर हमरा बहौत नै निक करल्कै। ओकर करल कामके फल परभुवे ओकरा देतै। 15 ओकरसे तुहु होसियार रह, कथिलेत उ अपनासबके परचारके एकदम बिरोध करल्कौ। 16 पहिन्का बेर जखुन हमरा कचहरीमे आपन सफाइ दैले परल छेलै तखुन हमर पक्छमे कोइ नै बाज्लै। सब गोरे हमरा छोइरदेल्कै। यि बातके दोस ओइसबके ककरो नै लागे। 17 तैयो परभु हमरसङे रैहके हमरा सक्ती देल्कै। तहैले हम गैर-यहुदी लोकसबके परमेस्वरके सुसमाचार निकसे सुनाबे सकलियै। अहिनङे परभु हमरा सिंहके मुहसे बचेल्कै। 18 हँ, परभु हमरा सब परकारके खराबिसबसे बचेतै। उ हमरा बच्याके आपन स्वरगिय राजमे ल्याजेतै। ओकर गुनगान जुगो-जुग तलिक हैतरहे। आमेन। पावलके अन्तिम गोरलगी 19 पिरिस्किला, अकिलास आ ओनेसिफरसके घर-परिबारके हमर गोरलगी सुन्यादहै। 20 इरास्तस कोरिन्थेमे रैहगेलै। तरोफिमस बिमार भेलाके कारन हम ओकरा मिलेटसे सहरमे छोइर देलियै। 21 जार मौसम आबैसे पैहनैये चैल आबैले कोसिस कर। युबुलस, पुडेस, लिनस, कलौडिया आ अतेका सब भाइ-बहिनसब तोरा गोर लागैचियौ कैहके पठाइनेछौ। 22 परभु तोहर आत्मामे बास करैत रहे। तोरासबके उपर परमेस्वरके अनुगरह बनल रहे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.