२ तिमोथी 3 - मध्य पुरविया थारूअन्तिम दिनके चेन्हासब 1 महज अन्तके दिनसबमे दुखके समय एतौ से बात तुसब जान। 2 कथिलेत लोक आपन स्वारथ मातर देखैबला, पैसा-कौरीके लोभ करैबला, आपनके बरका मानैबला, घमन्ड करैबला आ परमेस्वरके बिरोध करैबला हेतै। उसब आपन माँ-बापके बात नै मानैबला, असलो कामके खातिर धन्यबाद नै दैबला आ अपबितर हेतै। 3 ओइसबमे मया-दया नै रहैछै आ छमा नै करैछै। उसब दोसरके बारेमे चुगली लगाइबला आ राँड़ हैछै आ निक बातके मन नै पराइछै। 4 उसब धोखेबाज, आपने मनके रजा आ घमन्डी हेतै। परमेस्वरसे परेम करैके बदलामे सुख-बिलासके परेम करतै। 5 उसब भक्ती करैबला रुप धारन त करैछै महज भक्तीके भितरी सक्तीके सुइकार नै करैछै। एहेन लोकसबसे दुरे रह। 6 कथिलेत तोरासबमेसे कोइ-कोइ घर-घरमे ढुइकके पापे-पापसे दाबल आ अधलाह इक्छासबसे भरल मुरुख जनिजाइतसबके आपन बसमे राखैछै। 7 एहेन जनिसब सिखैले त हरदम सिखैत रहैछै, महज सतके ग्यान तलिक कहियो नै पुगे सकैछै। 8 जनङ यान्नेस आ याम्बरेस मोसाके बिरोध करने रहै, तैहनङ यि लोकसब सत्यताके बिरोध करैछै। अकरौरके बुइध भरस्ट भ्यागेल्छै आ बिस्बास हराएल छै। 9 महज उसब औरो बहौत नै टिकेसक्तै, कथिलेत यान्नेस आ याम्बरेस जखा मुरुखपना सब गोराके अगा देखार हेतै। तिमोथीके पावल आदेस करल्कै 10 तु त हमर सिक्छा, हमर चरितर, हमर जिबनके लक्छ, हमर बिस्बास, हमर धिरज, हमर परेम आ हमर सहनसिलता देख्नेचिही। 11 हम एन्टिओखिया, आइकोनियन आ लुस्तरा सहरमे केहन-केहन दुख भोगे परलै, से बात तु निक जखा जानैचिही। महज परभु हमरा ओइ सब आफत-बिपतसबसे बचेल्कै। 12 येसु खिरिस्टमे भक्तीके जिबन बिताइले चाहैबलासबके सताबटके सामना करैए परतै। 13 महज दुस्ट आ ढोङी लोकसब दोसरके धोखा दैछै आ उ आपनो धोखा खाइत बिगरैते जाइछै। 14 महज तु अपनेसे सिखल आ पुरे मनसे बिस्बास करल सिक्छामे लागल रह। यि ककरसे सिखनेचिही से बात तु जानैचिही। 15 तु छोटेसे पबितर धरमसास्तरमे लिखल बचनसे परिचीत चिही। ओहै बातसबसे खिरिस्ट येसुमे बिस्बास कैरके मुक्ती पाबैले ग्यान दैछौ। 16 धरमसास्तरमे लिखल सब बचन परमेस्वरके परेरनासे एलछै। यि सिखाइले, अरती दैले, सुधारैके लेल आ धरमी जिबन जियैले बहौत काम लागतौ। 17 ताकि परमेस्वरमे बिस्बास करैबला लोकसब सब असल कामके खातिर पुरा तौरसे सुसोभित भ्याके रहे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.