२ तिमोथी 2 - मध्य पुरविया थारूयेसु खिरिस्टके असल सिपाही 1 हमर दुलरुवा बेटा तिमोथी, येसु खिरिस्टके अनुगरहसे बलगर हैत जो। 2 बहौतरा साक्छीसबके अगा जे बात तु हमर मुहसे सुनने चिही, से बात औरो लोकके सिखाइले सकैबला बिस्बास योग्य लोकसबके सोइप दहै। 3 येसु खिरिस्टके असल सिपाही जखा हमरासबकेसङे दुख भोग। 4 सैनिक सेबामे भरती भेल लोक औरो धन्धा नै करैछै, कथिलेत ओइसबके उदेस्य आपन सेनापतीके खुस करनाइ रहैछै। 5 तैहनङ कोनो खेलमे भाग लेल खेलाड़ी नियममे रैहके नै खेल्तै त ओकरा इनाम नै मिल्तै। 6 जे गिरहत घाम-पसिना चुबाके मेहनत करैछै, उबजल बालीके पहिन्का हिस्सा ओकरे मिलैके चाही। 7 हम तोरा जे बात कहैचियौ, ओइबातके निकसे बिचार कर, कथिलेत परभु यि सब बात बुझहैके खातिर तोरा सहायता करतौ। 8 मैरके जिबित भ्याल रजा दाउदके बंसके येसु खिरिस्टके याद कर। कथिलेत हमर परचार करल सुसमाचार एह्या चियै। 9 ओह्या सुसमाचार जकर खातिर हम दुख काटैचियै आ अपराधी जखा झिझिरसे बान्हल चियै। महज परमेस्वरके बचनके बान्हे नै सक्तै। 10 तहैले परमेस्वरके चुनलहा लोकसबके खातिर हम सबचिज सहैचियै, ताकि ओहोसब येसु खिरिस्टके मुक्ती पाबे आ अनन्त महिमामे सहभागी हैलेसके। 11 यि बात एकदम सत छै, यदी हमसब ओकरसङे मरल चियै त, ओकरेसङे जिबै। 12 यदी हमसब ओकरसङे दुख भोग्बै त, हमरौरके ओकरेसङे राज करबै। हमसब ओकरा इन्कार करबै त, ओहो हमरौरके इन्कार करतै। 13 हमसब बिस्बास योग्य नै चियै तैयो उ बिस्बास योग्य रहतै, कथिलेत उ आपनेके इन्कार नै करे सक्तै। परमेस्वरके असल सेबक 14 तिमोथी, यि बात तु ओइसबके बात-बातमे झगरा नै कर कैहके परमेस्वरके सामनेमे सम्झा। झगरासे ककरो भलाइ नै हैछै, बरु सुनैबला लोकसबके बिगारैछै। 15 सरममे नै परैबला आ सतके बचनके ठिकसे चलाबैबला कामदार जखा आपनेके परमेस्वरमे गरहन हैकेलेल एकदमसे कोसिस कर। 16 महज तु परमेस्वरके अपमान करैबला आ काम नै काजके बातसे दुर रह, कथिलेत एहेन बात लोकसबके परमेस्वरसे दुर ल्याजाइछै। 17 एहेन सिक्छा त भितरे-भितर सैंरते जाइबला घाउ जखा हैछै। एहेन सिक्छा दैबलामेसे हुमेनियस आ फिलेतस चियै। 18 उसब सच बातसे दुर भटकल घुरैछै। लोकसब मैरके जि उठैबला काम पैहने भ्यागेल्छै, कैहके कतहेक लोकके बिस्बासके बिगाइर देने छै। 19 महज तैयो परमेस्वरके आपनेसे बनेल्हा जग सबदिन अटल छै। ओइ जगमे एहेन लिखल छै: “परभु आपन लोकसबके चिन्हैछै” आ “परभुके नाम लैबला सब गोरा खराब कामसे दुर रहे परतै।” 20 केहनो धनिक लोकके घरमे सोना-चानीके भरिया-बरतन मातरे नै रहैछै, ओते काठ आ माटीके भरिया-बरतन सेहो रहैछै। कोनो बिसेस कामके लेल चलाबैछै त कोनो सधारन कामके लेल चलाबैछै। 21 यदी कोनो लोक आपनके खराब कामसे सुध राखैछै त, उ आदरके जोग कामके खातिर एकटा भँड़िया बन्तै। कथिलेत उ आपने सुध राइखके सब असल कामके खातिर मालिकके मनपरैबला हेतै। 22 तैल्याके तु जबानीके अधलाह ललसासे दुर रह आ सुध हिरदयसे परभुके पुकारैबला सब सङे धारमिक्ता, बिस्बास, परेम आ सान्तीके पछा लाग। 23 महज मुरुख आ बेकारके तरक-बितरकसे दुरे रह, कथिलेत तोरा थाह छौ कि, एहेन बातसे लराइ-झगरा उतपन हैछै। 24 परभुके सेबक लराइ करैबला आ झगरिया नै हैकेचाही, महज सब लोकसबसे मिलजुइलके रहैबला हैकेचाही, दोसरके सिखाबे सकैबला आ सब बात सैहके रहे सकैबला हेबेपरतै। 25 उ आपन बिरोधीसबके लरम भ्याके सुधारैबला हैकेचाही। भ्यासकैछै परमेस्वर बिरोधीसबके मन बदैल देतै आ उसब सतके चिन्हे सक्तै। 26 तब उसब होसमे आइबके सैतानके फन्दासे निकैल सकैछै। कथिलेत सैतान आपन इक्छा पुरा करैके खातिर ओइसबके बसमे राखनेछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.