२ थेसलोनिकी 2 - मध्य पुरविया थारूअधरमके लोक 1 भाइ-भैयासब, अपनासबके परभु येसु खिरिस्ट फेनो एतै। हमसब एकेसाथ ओकरसङे भेटब, महज हमसब तोरासबके बिन्ती करैचियौ कि, 2 अपनासबके परभु आबैबला दिन भेलौ कहतौ त तुसब नै घबरा आ भरममे नै पर। ओइ दिनके बिसयमे कोइ अगमबानीसे, कोइ बोलिसे आ कोइ-कोइ हमरेसब जखा लिखल चिठीसे भरममे पारैले खोज्तौ तैयो बिस्बास नै करिहे। 3 महज तोरासबके कोइयो नै कोनो परकारसे धोखा देबे। कथिलेत परमेस्वरके बिरोधमे बहौत बरका बिरोध नै हेबे तलिक आ नास हैबला बेबस्था भङ करैबला लोक नै आबैतलिक परभुके दिन नै एतै। 4 बेबस्था भङ करैबला लोक आपने बरका भ्याके लोकसब परमेस्वर मानैबला सब चिजसबके आ पुजा-पाठ करैबला सब चिजके बिरोध करतै। उ त परमेस्वरके मन्दिरमे बैठके उ आपनेके परमेस्वर चियै कहतौ। 5 सङे रहैत यि सब बात त हम तोरासबके पैहनै कहने छेलियौ, नै? 6 उ आपन समयमे परकट हेबे तै हेतुसे कोनो बात ओकरा अखुन तलिक रोइक रहल छै, यि त तुसब जाइन्ते चिही। 7 उ बेबस्था भङ करैबला आपन कामसब भितरे-भितर सुरु कैर लेनेछै। महज ओकरा जे सक्ती पकरने छै, उ सक्ती नै हटैतक ओकरा रोक्ने रहतै। 8 उ ब्यबस्था भङ करैबला लोक परकट हेतै। जकरा परभु येसु आपन मुहके एक साँसमे नास करतै। परभु येसुके आपन आगमनके चमकके तेजसे ओकरा नास करतै। 9 उ ब्यबस्था भङ करैबला सैतानके सक्ती ल्याके एल रहैछै, तब सब तरहके झुठा चेन्हा आ अजगुत-अजगुतके कामसबके चेन्हा देखाइतौ। 10 नास हैबलासबके उ दुस्टतासे छकाइतै, कथिलेत उसब मुक्तीदैबला सतके नै मन पराइल्कै। 11 तै खातिर उसब झुठे बात पतियाबे कैहके परमेस्वर भरमाइबला सक्तिके पठाइतै। 12 अहिनङे जे कोइ सतमे बिस्बास नै करल्कै आ अधरम मे मग्न रहतै उसब दोसी ठहरालजेतै आ सजायके भागिदार हेतै। अस्थिर रह 13 परभुके परेम करल भाइ-भैयासब, तोरासबके खातिर हमसब हरदम परमेस्वरके धन्यबाद चरहाइले बिबस चियौ, कथिलेत परमेस्वर सुरुवेसे तोरासबके मुक्ती दैकेलेल चुनल्कौ। उ मुक्ती तोरासबके पबितर बनाइले पबितर आत्मासे आ सत बातमे तोरासबके करल बिस्बाससे आबैछै। 14 अहै खातिर अपनासबके सुनाएल सुसमाचारसे परमेस्वर तोरासबके बोलाइल्कौ। हमरासबके परभु येसु खिरिस्टके महिमा तोरोसबके मिले कैहके उ तोरासबके बोलाइनेछौ। 15 तहै खातिर भाइ-भैयासब, आपन बिस्बासमे अस्थिर भ्याके रह, उ चाहे बोलि-बचनसे हेबे, चाहे लिखल चिठीसे हेबे, तुसब जे सिक्छा पाबनेचिही ओकरा पकरने रह। 16 आब अपनासबके परभु येसु खिरिस्ट आ अपनासबके परमेस्वर पिता अपनासबके परेम करल्कै। उ आपन अनुगरहसे अनन्त उत्साह आ असल आस देल्कै। 17 तोरासबके ओकरेसबसे सब असल काममे साहस आ बचनमे सक्ती मिले। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.