२ थेसलोनिकी 1 - मध्य पुरविया थारू1 हम पावल, सिलास आ तिमोथीके तरफे परमेस्वर पिता आ परभु येसु खिरिस्टमे यि चिठी लिखैचियौ। 2 परमेस्वर पिता आ परभु येसु खिरिस्ट तोरासबके अनुगरह आ सान्ती देबे। धन्यबाद आ परथना 3 भाइ-भैयासब, तोरासबके खातिर हरदम परमेस्वरके धन्यबाद देनाइ जरुरी छै। यि फेर योग्यकेभी चियै, कथिलेत तोरासबके बिस्बास परसस्त बरहैत ज्यारहलछौ आ तोरासबके परेम एक-दोसरमे बैढरहल छौ। 4 अहै खातिर सब परकारके सताबट आ कस्ट सैहरहल साहस देखके अस्थिर आ बिस्बासके बारेमे मन्डलीके बिचमे हमसब गौरब करैचियै। 5 परमेस्वरके धारमिक इन्साफके परमान यह्या चियै कि तुसब परमेस्वरके राजमे जाइके योग्य बन। तुसब ओहै राजके खातिर दुख सहैचिही। 6 परमेस्वर न्यायि भेला से उ त तोरौरके दुख दैबलासबके सजाय देतौ। 7 परमेस्वरमे दुख सहैबला तोरासबके आ हमरासबके छुटकारा देतौ। यि त तब हेतै, जब परभु येसु स्वरगसे धधकैत आइगमे आपन सक्तीसाली स्वरगदुतसबसङे परगट हेतै तब यि सब करतै। 8 तब परमेस्वरके नै चिन्हैबलासब आ परभु येसुके सुसमाचारके नै मानैबलासबके सजाय देतै। 9 एहैन लोकसब परभुके उपस्थिती आ ओकर सक्तिके महिमासे अलग हेतै आ सबदिनके लेल नास हेतै। 10 जै दिन परभु एतै, तै दिन उ आपन पबितर लोकसबके बिचमे आपन महिमा आ बिस्बास करैबला जम्मेलोकसे परसन्सा लेतै। ओते तुसब रहबिही, कथिलेत हमरसबके देल्हा गबाही पर तुसब बिस्बास करलिही। 11 अहै खातिर तोरासबके लेल हमसब लगातार परथना करैचियौ, जे अपनासबके परमेस्वर तोरासबके आपन बोलाबाके योग्यके बनाबे आ ओकर सब असल कामसब आ बिस्बासके काम ओकर सक्तीसे पुरा कैर देबे। 12 एहनङे अपनासबके परमेस्वर आ परभु येसु खिरिस्टके अनुगरहसे परभु येसुके नाउके आदर-परसन्सा हेबे। तब ओकरसे तोरौरोके आदर-परसन्सा मिले। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.