२ पतरुस 3 - मध्य पुरविया थारूपरभुके आबैबला दिन 1 हे हमर पिरियसब, यि तोरासबके लेल लिखल दोसर चिठी चियौ। यि दुनु चिठीमे कतहेक बात सम्झना कराके तोरासबके ठिकसे बिचार करैके लेल उत्साहित करैले कोसिस करनेचियौ। 2 पहिनेके पबितर अगमबक्तासबके बोलल अगमबानी आ तोरासबके परेरितसबसे अपनासबके परभु आ मुक्ती दैबला परभुके देल आग्या तोरासबके सम्झैले परतौ। 3 सबसे पहिने तोरासबके यि बुझैले परतौ कि, अन्तके दिनमे अधलाह लोक आपन स्वारथ चाहना बाहेक औरो किछो नै सोच्तै। उसब तोरासबके खिसी करैत कहतौ, 4 “परभु फेनसे एतै कैहके करल परतिग्या कि भेलौ? अपनासबके पिता-पुरखा मैरके चैलगेलै महज सन्सारके सब बात ओहिनङे छै, जनङ सिरिस्टीके सुरुमे छेलै।” 5 परमेस्वर आपन बचनसे स्वरग आ पिरथिबी सिरिस्टी करल्कै से बात उसब जानियोके अन्जान जखा करैछै। पिरथिबी पानीसे आ पानी दुवारा बनलगेलै। 6 ओह्या पानीसे ओइ जुगके जलपरलयसे नास भेलै। 7 महज ओह्या बचनसे नियाय हैबला दिनतकके लेल अकास आ पिरथिबीके आइगसे नास करैके लेल बचाके राखनेछै। अकरा वहे दिनके लेल राखनेछै जहिया अधरमी लोकसबके नियाय हेतै आ ओकरासबके नास करलजेतै। 8 महज पिरियसब, एकटा बात कहियो नै बिसराइहे कि, परभुके लेल एक दिन हजार बरिस जखा आ हजार बरिस एक दिन जखा चियै। 9 कोइ कोइ यि बिचार करैछै कि परमपरभु आपन करल परतिग्या पुरा करैले देर करैछै, महज कोइ नास नै हेबे बरु सबलोक आपन-आपन पापसे पस्चाताप करे कैहके उ धिरजसे असियालछै। 10 महज परभुके नियाय करैबला दिन चोर एल जखा अनचेकेमे एतै। ओइ दिन सब अकास-मन्डल बरका अबाज कैरके बिलाजेतै, सुरुज, चान आ तरासब जैरके भस्म हेतै। पिरथिबी आ ओइमे भेल सब चिज नास हेतै। 11 यि सब चिज अनङ नास हेबे लागलछै त, तुसब केहेन लोक हैकेचाही? तोरासबके जिबन पबितर आ परमेस्वरमे समरपित हेबे परतौ। 12 तुसब परमेस्वरके नियाय करैबला दिनके बाट ताकैचिही, उ दिन झटसे आबे कैहके करैबला काम कर। उ दिन सारा अकास आइगसे भस्म हेतै आ ओते भेल सबचिज आइगके धाहसे गैलजेतै। 13 महज हमसब त परमेस्वरके परतिग्या करल लया स्वरग आ लया पिरथिबीके लेल असियाल चियै। जते धरमी लोकसब मातरे रहैछै। 14 ओहैसे, हे हमर पिरिय सङिसब, ओइ दिनके आसमे रहैतकाल परमेस्वरके नजरमे सुध, निरदोस आ सान्तीमे रैहके जिबन जियैले कोसिस कर। 15 परभु लोकसबके पापसबसे मुक्ती पाबे कैहके मौका दैले चाहैछै, ओहैसे उ कतहेक धिरजी चियै कैहके धियान दहै। अपनासबके पिरिय भाइ पावल सेहो परमेस्वरसे पाबने बुइधसे एह्या बातसब तोरासबके लिखने छेलौ। 16 पावल सब चिठीसबमे अहिनङे बातसब लिख्नेछै। ओकर लिखल चिठीसबमे कोनो-कोनो बातसब बुझैले कठिनाइ हैछै। बात नै जानैबला लोक आ चनचल लोकसब ओकरा उल्टा पुल्टा अरथ लगाबैछै। उसब पबितर धरमसास्तरके सेहो ओहिने अरथ लगाबैछै। ओहिनाइते उसब आपनेके नासमे पुगाबैछै। 17 महज हे हमर पिरियसब, तुसब त यि बातसब पहिनेसे बुझलाके कारन होसियार रह। तब दुस्ट लोक तोरासबके अलमलमे नै परेसक्तौ आ तोरासबके बौकार बिस्बास कमजोर नै हेतौ। 18 महज अपनासबके परभु आ मुक्ती दैबला येसु खिरिस्टके अनुगरह आ ग्यानमे बरहैत जो। ओकर महिमा अखैन आ सबदिन हेबे। आमेन। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.