२ पतरुस 1 - मध्य पुरविया थारू1 हम सिमोन पतरुस, येसु खिरिस्टके दास आ परेरितके तरफसे अपनासबके परमेस्वर आ मुक्ती दैबला येसु खिरिस्टके धारमिकतासे अपनेसब जखा अनमोल बिस्बास पाबैबलासबके लेल यि चिठी लिखरहल चियै। 2 परमेस्वर आ अपनासबके परभु येसु खिरिस्टके ग्यानमे तुसब बरहैत जाइके कारन तोरासबके परसस्त रुपमे अनुगरह आ सान्ती मिले। बोलाहट आ छनोट 3 आपन महिमा आ भलाइसे अपनासबके बोलाइबलाके हमसब जानैके कारन परमेस्वरके इस्वरीय सक्तिसे जिबन आ भक्तीके लेल अपनासबके आवसेक परल सब चिज परमेस्वर देनेछै। 4 ओकर महिमा आ भलाइके कारन उ अपनासबके अनमोल आ महान परतिग्यासब उ अपनासबके देनेछै, ताकी अइ सन्सारके अधलाह इक्छासे आबैबला बेकार बातसे बाँइचके इस्वरीय स्वभावमे सहभागी हो। 5 तैल्याके तुसब सब परकारके मेहनतसे आपन बिस्बासमे सदगुन आ सदगुनमे ग्यान थप, 6 ग्यानमे आत्मसंयम, आत्मसंयममे धिरज, धिरजमे भक्ति, 7 भक्तीमे भाइ-भैयाके इसनेह, भाइ-भैयारीके इसनेहमे परेम थप। 8 यदि तोरासबमे यि गुनसब परसस्त कैरके बरहैत जेतौ त, अपनासबके परभु येसु खिरिस्टके ग्यानमे तुसब बहौत काम लागैबला आ फल फराइबला हेब्ही। 9 महज यि गुनसब नै भेल लोक दुरके चिजसब नै देखैसकैबला अन्हरसब चियै। उसब आपन पहिन्का पापसबसे सुध भेल बात बिसैर गेलछै। 10 तैल्याके हे भाइसब, परमेस्वर तोरासबके बोलाइनेछौ आ चुन्ने छौ से बात आपन जिबनमे परमानित करैले एकदम कोसिस करैतरह। तुसब एहैन करबिही त, बिस्बाससे कहियो नै गिरबिही। 11 तब अपनासबके परभु आ मुक्ती दैबला येसु खिरिस्टके अनन्त राजमे तोरासबके धुम-धामसे स्वागत हेतौ। 12 तुसब यि सब बात जान्बे करैचिही आ तोरासबके सिख्याल सत बातमे अस्थिर चिही तैयो हम यि सब बात तोरासबके हरदम याद दिलाइते रहबौ। 13 जाबेतक हम जिबित रहबौ, ताबेतक यि बात तोरासबके याद कराइत होसियार करेनाइ हमरा ठिक लागैछै। 14 कथिलेत हम जानैचियै, अपनासबके परभु येसु खिरिस्ट हमरा साफ-साफ देखादेनेछै कि यि माइटके देह जल्दिए छोइरके जाइले परतै। 15 हम मैरके गेलाके बादो तुसब यि बातसब याद कर कैहके हम सके जतहेक कोसिस कैर रहलचियै। खिरिस्टके महिमाके साक्छी 16 जब अपनासबके परभु येसु खिरिस्टके सक्ती आ आगमनके बारेमे तोरासबके कहलियौ, से हमसब चलाकिसे तोरासबके कोनो बनोतरी बात-कथामे नै कहलियौ महज ओकर बरका महिमा हमसब आपने आँखसे देखने छेलियै। 17 जब उ परमेस्वर पितासे आदर आ महिमा पाबल्कै, तब परमेस्वर महा महिमासे एहैन आबाज एलै, “यि हमर दुलरुवा बेटा चियै, जकरसे हम बहुत खुसी चियै।” 18 जखैन हमसब ओकरसङे पबितर पहारमे छेलियै, तखैन स्वरगसे एल यि आबाज हमसब आपने कानसे सुन्ने छेलियै। 19 अहै खातिर अगमबक्तासबके कहल बचन सत छै से हमसब निसचिन्त भ्याके बिस्बास करैचियै। बिहानके इजोत नै हेबेतलिक आ तोरासबके हिरदयमे भुरुकवा तरा नै उगैतलिक उ बचन अन्हारमे बरैबला चिरखा जखा ओइ बचनके धियान देब्ही त असल करबिही। 20 महज तोरासबके सबसे पहिने यि बात बुझे परतौ कि, पबितर धरमसास्तरके कोनोभी अगमबानी अगमबक्तासब आपने मनसे नै बोल्नेछै। 21 कथिलेत अगमबक्तासब आपन मनसे अगमबानी नै करल्कै, महज पबितर आत्माके परेरनासे उसब परमेस्वरके तरफसे बोल्नेछेलै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.