२ युहन्ना 1 - मध्य पुरविया थारू1 हम एल्डरके तरफसे, परमेस्वरके चुनल जनी आ ओकर बेटा-बेटीके यि चिठी लिखैचियै, जकरा हम साँचोके परेम करैचियै, हम मातरे नै महज सतके चिन्हैबला सबकोइ परेम करैछै। 2 कथिलेकी उ सत हमरासबमे छै आ सबदिन रहबे करतै। 3 परमेस्वर पिता आ ओकर बेटा येसु खिरिस्टसे परेममे आ सत्यतामे हमरासबके अनुगरह, किरपा आ सान्ती देबे। सत आ परेम 4 तोहर धियापुतासबमेसे कतहेक गोरा परमेस्वरके देल आग्या बमौजी सतके रस्तामे चलैत देखके हमरा बहौत खुसी लागल। 5 हे पिरिय जनी, हम कोनो लबका आग्या नै लिख्नेचियै, महज सुरुवेसे देल गेल छै वह्या लिखैचियै। हमसब एक दोसरके परेम कर कैहके बिन्ती करैचियौ। 6 परेम करनाइके मतलब ओकर आग्या अनुसार जिबन जिनाइ चियै। तोरासबके सुरुवेसे सुनल आग्या एह्या चियौ कि तुसब सबगोरा परेममे चल। 7 कथिलेत बहुतो धोखा दैबलासब सन्सारके बहुतो ठामसबमे पुइगगेल छै, जेसब येसु खिरिस्ट देहधारी भेल छै कैहके नै सुइकारैछै। एहैन लोकसब धोखा दैबला आ खिरिस्ट बिरोधी चियै। 8 तहै खातिर तुसब होसियार रह, जै बातके लेल तुसब मेहनत कैररहल चिही, तैके नै हरा बल्की तुसब पुरा इनाम पाबैबला भ्याजो। 9 खिरिस्टके सिक्छासे बाहर जाइबला लोकसङे परमेस्वर नै रहैछै, महज ओकर सिक्छामे चलैबला लोकसङे परमेस्वर पिता आ बेटा दुनु रहैछै। 10 यदि कोनो लोक तोरासबलग आइबके एहैन सिक्छा नै सिखाइछौ त ओइसबके देहरीयोमे टपैले नै दहै आ गोरलगीयो नै कर। 11 कथिलेकी जे कोइ ओकरा गोरलगी करैछै, उ लोक ओकर दुस्ट काममे सहभागी हैछै। 12 हमरा तोरासबके लेल लिखैबला बात त बहुतो छै, महज हम कागत आ मैससे लिखैले नै चाहैचियै। बरु तोरासबलग ज्याके आमने-सामने भ्याके बतियाबैके आसा करनेचियै, ताकी अपनासबके आनन्द पुरा भ्यासके। 13 परमेस्वरसे चुनल तोहर बहिनके बेटा-बेटीसब सेहो तोरा गोरलगी पठाइनेछौ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.