२ कोरन्थी 9 - मध्य पुरविया थारू1 यहुदियामे रहल बिस्बासीसबके लेल पठेल्हा भेटीके बारेमे तोरासबके लिखैले कोनो आबसेक नै छै। 2 कथिलेत तुसब सहायता करैके लेल एकदमसे तयार चिही से हम जानैचियै। हम तोरासबके बारेमे माकेडोनिया परदेसके लोकसबके गर्भ कैरके कहलियै कि पौरकेसे तु अखैया परदेसमे भेल लोकसब भेटी दैकेलेल तयार चिही। तुसब उत्साहित भेलाके कारन उसब सेहो औरो बेसि उत्साहित भेलछै। 3 आब हम यि भाइसबके तोरासबलग पठ्यारहल चियौ कि, तोरासबके बारेमे गर्भ करल बेरथ नै हेबे आ हमर कहल अनुसार तोरासबके सेबाके लेल तैयार पाबे। 4 यदि माकेडोनियाके कोनो लोक हमरसङे तोरासबलग एतौ आ तोरासबके भेटी दैले तयार भेल नै देख्तौ त हमसब लाजेसे मैर जेबै आ तुहुसब लाजेसे मरबिही कथिलेत हमसब तोरासबमे एकदम भरोसा राखने चियौ। 5 ओहैसे तोरासबके परतिग्या करल भेटीके बन्दोबस कैरके राखैके लेल हम जाइसे पहिने यि भाइसबके तोरासबलग पठेनाइ असल हेतै कैहके आबसेक ठानलियै। उ भेटी करकापसे नै महज आपन राजिखुसिके भेटी हेबे। खुसीके दान 6 महज यि बातके मनमे राख कि, “जे कम बिया छिटैछै उ कमे कटनी करतै, महज जे बेसिसे छिटैछै उ बेसिएसे कटनी करतै।” 7 ओहैसे हरेक लोक आपन मनमे सङकल्प करल बमौजी देबे। मन दुख्याके यात करकापसे नै दहै, कथिलेकी खुसिसे दैबलाके परमेस्वर परेम करैछै। 8 परमेस्वर तोरासबके हरेक परकारके आसिस परसस्त कैरके दैले सक्तौ, ताकि तोरासबसङे सबदिन हरेक चिज परसस्त हेबे आ हरेक असल कामके लेल तुसब परसस्त कैरके दैले सक। 9 पबितर धरमसास्तरमे एहेन लिखल छै, “उ छिटैछै आ मन खोइलके गरिबसबके दान दैछै, ओकर धारमिकता सबदिनके लेल रहैछै।” 10 परमेस्वर खेति-किसानी करैबलासबके छिटैले बिया आ खाइले भोजन दैबला तोरासबके बिया देतौ आ ओइमे बहौत बिरधी कैरदेतौ तब तोरासबके धारमिकताके बाली बरह्यादेतौ। 11 तुसब हर बखत खुसी मनसे औरोके दैले सक कैहके परमेस्वर तोरासबके धनिक बनाइतौ। तोरासबके देल दान हमसब औरो मन्डलीसबमे बाटैके कारन बहुतो लोक परमेस्वरके धन्यबाद देतै। 12 तोरासबके देल दानसे परमेस्वरके जनके खाँचो पुरा मातरे नै, महज यि कामसे उ लोकसब परमेस्वरके एकदमे धन्यबाद देतै। 13 तुसब खिरिस्टके सुसमाचारमे बिस्बास कैरके आग्याकारी भेल बात आ तोरासबके खुल्ला हिरदयसे देल दानसे परमेस्वरके महिमा हेतै। यि सेबाके कामसे तुसब केहेन चिही कैहके लोकसबके परमानित हेतौ। 14 परमेस्वरके परसस्त अनुगरह तोरासबमे भेलाके कारनसे उसब मन खोइलके तोरासबके लेल परथना करतौ। 15 ओकर बखाने करैले नै सकैबला बरदानके लेल परमेस्वरके धन्यबाद हेबे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.