२ कोरन्थी 8 - मध्य पुरविया थारूमन खोइलके दहै 1 हे हमर पिरिय सङीसब, माकेडोनिया परदेसके मन्डलीसबमे परमेस्वरके देल अनुगरहके बिसयमे हमसब तोरासबके कहैले चाहैचियौ। 2 उसब एकदम संकटके परिक्छामे रहितोपरभी परसस्त आनन्दित भेलै आ गरिबीमे सेहो उसब उदार चितसे भेटी देल्कै। 3 कथिलेकी हम गबाही दैचियै कि, उसब आपन औकात अनुसार मातरे नै महज औकातोसे बहौत बेसि आपन राजिखुसीसे देल्कै। 4 उसब परमेस्वरके सन्तसबके सहायता करैके लेल मौका दिय कैहके हमरासबके बेर-बेर बिन्ती करल्कै। 5 हमरासबके आसा करलसे बहौत बेसि उसब देल्कै। उसब पहिने आपनेके परभुमे अरपन करल्कै तरकरबाद परमेस्वरके इक्छा अनुसार आपनेके हमरासबके हाथमे सोइप देल्कै। 6 ओहैसे तितस पहिनेसे तोरासबके बिचमे सुरु करल भेटी उठाइबला काम पुरा करे परतै कैहके हमसब ओकरा बिन्ती करलियै। 7 जहिनङे सब काममे तुसब बैढते जाइचिही, अरथात बिस्बासमे, बचनमे, ग्यानमे, जोसमे आ हमरासब परती परेममे, तहिनङे तुसब यि भेटी दैबला काममे सेहो बैढते जो। 8 हम यि आग्याके रुपमे नै महज औरोसबके जोससङे तुलना कैरके तोरासबके परेम साँचो चियौ कैहके परमानित करैके लेल हम यि कहलियौ। 9 कथिलेकी अपनासबके परभु येसु खिरिस्टके अनुगरह तोरासबके थाहे छौ, उ धनिक छेलै तयौ तोरासबके लेल उ गरिब भेलै ताकि ओकर गरिबीसे तुसब धनिक बनैले सक। 10 अइ बिसयमे हम तोरासबके यि सल्लाह दैचियौ, एक बरिस पहिने जे काम तुसब सुरु करने मातरे नै, महज उ करैले उतकट इक्छा सेहो करने छेल्ही, आब ओइके पुरा करनाइ तोरासबके लेल असल हेतौ। 11 आब तुसब आपनसे सुरु करल काम पुरा कर। ओइ समयमे तोरासबके दैके इक्छा बहौत छेलौ आ सके जतहेक औकात अनुसार द्याके आपन इक्छा पुरा कर। 12 यदि तोरासबके दैके इक्छा छौ त, तोरासबसङे जे छौ, ओहैमेसे देल परमेस्वर सुइकार करैछै, महज तोरासबसङे नै भेल चिज परमेस्वर नै माङैछै। 13 तोरासबके भारी बोक्याके दोसरके हलुक हेबे कैहके हमर इक्छा नै छै, महज सब कोइके बराबर भारी हेबे कैहके हम यि कहलियौ। 14 अखैन तोरासबसङे बहौत छौ त, जकरा नै छै ओइसबके देनाइ असल हेतौ। तोरासबके पछा घटि-कमी भेल बखत उसब तोरासबके मदत करतौ। अहिनङ एक-दोसरमे बराबर हेब्ही। 15 पबितर धरमसास्तरमे एहेन लिखल छै, “बहौत जम्मा करैबलासबसङे फाजिल किछो नै रहलै आ कमे जम्मा करैयोबलासबके घटी नै भेलै।” तितसके कोरिन्थ सहरमे पठाबैके योजना 16 परमेस्वरके धन्यबाद हेबे, परमेस्वर तोरासबके लेल हमरे जखा इक्छा तितसके हिरदयमे राइखदेल्कै। 17 कथिलेत उ हमरासबके बिन्ती करलासे मातरे नै, महज तोरासबके भेटैके जागर चल्लासे उ तोरासबलग आइबरहलछौ। 18 हमसब तितससङे एकटा भाइके पठाबैचियौ, जकर नाम सुसमाचार परचारके काममे सब मन्डलीके बिचमे चललछै। 19 अतबे नै, अकरा जम्मा करल पैसा पुगाबैबला काममे हमरासबसङे जाइले मन्डलीसे छान्नेछै। यि काम हमसब परभुके महिमाके लेल आ हमरासबमे लोकसबके मदत करैबला मन छै से देखाइले करनेचियै। 20 हमरासबके कोइ दोस नै लगाबे कैहके उदार चितसे देल यि भेटीके हमसब होसियारीसाथ चलाइचियै। 21 कथिलेत हमसब परभुके नजरमे मातरे नै, बल्की लोकोसबके नजरमे जे ठिक छै ओह्या करैके लक्छ राखैचियै। 22 हमसब ओइसबसङे एकटा औरो भाइके पठाबैचियौ। हमसब ओकरा बहुतो बेर जाँचलियै आ काम करैमे एकदमे जोसगर पाबलियै। अखनियो तोरासबपरती ओकर बरका भरोसा छै आ मदत करैले औरो जोसगर भेलछै। 23 तितस हमर सङी चियै आ तोरासबके सहायता करैके लेल हमरसङे काम करैछै। ओकरसङे जाइबला भाइसबके खिरिस्टके महिमाके लेल मन्डलीसब पठाइनेछै। 24 तुसब आपन परेमके परमान ओइसबके दहै आ हमसब कथिले तोरासबके बारेमे गर्भ करैचियै से बात मन्डलीसब देखे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.