२ कोरन्थी 7 - मध्य पुरविया थारू1 अहैलेल हे हमर पिरिय सङीसब, परमेस्वर अपनासबके देल यि परतिग्या अनुसार देह आ आत्माके असुध बनाबैबला हर किसिमके बातसे अपनासब दुरे रह आ परमेस्वरके डर मानैत औरो पबितर हैत चल। पावलके आनन्द 2 तुसब आपन हिरदयमे हमरासबके ठाम दहै। हमसब ककरो अनियाय नै करनेचियै। हमसब ककरो खराब बाट नै देखाइने चियै आ नै ककरोसे फैदा उठाइने चियै। 3 यि बात हम तोरासबके दोसी ठहराइके लेल नै कहैचियौ कथिलेकी हम पहिने कैहदेनेचियौ, हमरासबके हिरदयमे तोरासबके लेल अतहेक ठाम छै कि हमसब तोरासबसङे बाचैले या मरैयोले तयार चियौ। 4 तोरासबमे हमरा पुरा भरोसा छै। हम तोरासबमे एकदमे गर्भ करैचियौ। हम तोरासबसे पुरा रुपमे उत्साह पाबने चियौ आ कस्टोसबमे हम बहुत आनन्दित चियौ। 5 कथिलेकी हमसब माकेडोनिया एलाके बादो हमरासबके कोनो बिसराम नै मिल्लै महज चारु दिसनसे हमरासबके कस्ट एलछेलै, बाहरसे लोकसबसङे झगरा आ हिरदय भितर डरे-डर छेलै। 6 महज निरास भेलसबके सान्तबना दैबला परमेस्वर तितस एलासे हमरासबके सान्तबना देल्कै। 7 तितस एलासे मातरे नै, महज तोरासबसे उ जे सान्तबना पाबने छेलै, ओकरसे हम्हु सान्तबना पाबलियै। हमरा भेटैके तुसब एकदम इक्छा करनेचिही से उ हमरासबके कहल्कै। पहिने करल तोरासबके गल्तीसे पछुताबा करनेचिही आ हमर बातके पालन करनेचिही से उ कहल्कै। यि सुइनके हम एकदमे खुसी भेलियै। 8 हम आपन चिठीसे तोरासबके दुखित करलियौ तैयो हमरा पछतावा नै छै। सुरुमे हमरा पछतावा त भेलै महज अखैन हमर चिठीसे तोरासबके कुछ समयके लेल मातरे दुखित बनाइल्कौ कैहके हमरा लागैये। 9 ओइ चिठीसे तोरासबके दुखित करल्कौ कैहके हम खुस नै चियै महज उ दुखसे तोरासबके पस्चाताप दिसन आ जिबन परिबरतन दिसन ल्याके गेलै कैहके हम खुस चियै। तुसब परमेस्वरके इक्छा सुइकार करलाके कारन दुख भेलौ, हमरासबके कारनसे तोरासबके कोनो हानी नै भेलौ। 10 जे परमेस्वरके इक्छा सुइकार कैरके दुख मानैछै आ पस्चाताप करैछै, तकरा परमेस्वर बचेतै। एहेन किसिमसे दुखमे पछताइले नै परैछै। महज सन्सारके लोकसब जखा दुख मातरे करैछै त उ मिरतु दिसन लजाइछै। 11 परमेस्वरसे एल दुखसे तोरासबमे केहेन उत्साह जगाइल्कौ, ओइके याद कर। आपनेके निरदोस साबित कराइके लेल केहेन उत्सुकता छौ। केहेन डाह, केहेन डर, केहेन पियास, केहेन जोस, नियाय हैकेलेल केहेन चाह छौ! सब बातमे तुसब आपनेके निरदोस साबित करनेचिही। 12 हम उ चिठी अनियाय करैबला लोकके लेल नै लिखने चियै, नै त अनियायमे परल लोकके लेल महज अइ हेतुसे कि परमेस्वरके नजरमे हमरासबके परती तोरासबके वास्ता केहेन छौ, से तोरासबके थाह हेबे। 13 अहैकारन हमरासबके सान्तबना मिललछै। हमरासबके भेटल आपने सान्तबना बाहेक तितसके आनन्दमे हमसब बेसी रमाहट भेलियै, कथिलेकी तोरासबके बेबहारसे ओकर मनके सान्ती मिललछै। 14 तितसके अगा हम तोरासबके बारेमे गर्भ करनेछेलियै, ओइमे हमरा कोनो लाज नै भेलै। जनङ हमसब तोरासबके कहल बात सत छेलै, ओहिनङे तितसके अगा हमरासबके करल गर्भ सेहो सत ठहरलै। 15 तोरासबके आग्याकारिताके जिबन, डर आ आदरकेसाथ ओकरा स्वागत करलिही। यि सब बात याद कैरके तितस तोरासबके औरो बेसि परेम करैछौ। 16 हम रमाहट करैचियै, कथिलेकी तोरासबमे हमरा पुरा भरोसा छै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.