२ कोरन्थी 6 - मध्य पुरविया थारू1 हमसब परमेस्वरसङे काम करैबलासब भेलाके कारन तोरासबके बिन्ती करैचियौ कि परमेस्वरसे भेटल अनुगरहके बेरथमे जाइले नै दहै। 2 कथिलेत परमेस्वर कहैछै, “ठिक समयमे हम तोरासबके पुकारा सुनलियौ आ उदार दैबला दिनमे हम तोरासबके मदत करलियौ।” देख, परमेस्वरके ठिक समय त यह्या चियौ, उदार पाबैबला दिन आजुवे चियौ। पावलके सङकट 3 हमरासबके करल सेबकाइमे कोइ दोस लगाबैके मौके नै पाबे कैहके हमसब ककरो बाधा दैबला काम नै करैचियै। 4 महज हरतरहसे हमसब आपनेके परमेस्वरके सेबकसब चियै कैहके देखाइचियै। सब कठिनाइ, बिपत, सङकट आ दुखमे धिरजसे सहन करैचियै। 5 हमसब पिटाइ खेने चियै, जहलमे परल चियै, हुलदङ्गामे परलचियै। एकदमसे मेहनत करैचियै, सुतैयोले नै पाबनेचियै आ भुखे पियासेमे परल चियै। 6 अपनासबमे रहल पबितर आत्मा आ अपनासबके निसकपट परेमसे हमसब आपनेके सुध, समझदार, सहनसिल आ दयालु परमानित करनेचियै। 7 सत खबर परचार कैरके परमेस्वरके सक्तीसे हमसब काम करैचियै। लराइ करैबला हाथ-हथियार देहना हाथमे आ आपनके रक्छा करैबला हाथ-हथियार बमा हाथमे बोकैचियै। उ एकेटा हाथ-हथियार धारमिकता चियै। 8 लोकसब हमरासबके आदर करतै तैयो अनादर करतै तैयो, जस करतै तैयो अबजस करतै तैयो हमसब परमेस्वरके सेबा करैचियै। हमसब इमानदार चियै महज लोकसब ठगहा कहैछै। 9 हमरासबके निकसे चिन्हीयोके अनचिन्हार जखा करैछै। मरे लागल चियै तैयो जियल चियै। सजाय पाबनेचियै तैयो मारलगेल नै चियै। 10 सोकमे रहितोपरभी हरसमय आनन्दमे रहैचियै। गरिब रहितोपरभी बहुतोके आत्मिकी रुपमे धनिक बनाबैचियै। कुछो नै रहितोपरभी हमरासबसङे सब चिज छै। 11 हे कोरिन्थ सहरके बिस्बासीसब, हमसब तोरासबके परस्टे कैहदेने चियौ कि, हमरासबके हिरदय तोरासबके लेल खुल्ला छौ। 12 हमरासबके परेम तोरासब परती कम नै भेलछौ, बरु तोरासबके परेम हमरासब परती कम भेलछौ 13 आब हम तोरासबके आपने बेटा-बेटी जखा समैझके यि कहैचियौ कि तुहुसब आपन हिरदय हमरासबके लेल खुल्ला राख। जिबित परमेस्वरके मन्दिर 14 येसुमे बिस्बास नै करैबलासबसङे एकसाथ एकेटा जुवामे नै जोता। कथिलेकी धरमी आ अधरमी कनङके मिल्तै? इजोत आ अन्हार एक ठाम कनङके रहे सक्तै? 15 खिरिस्टके सैतानसङे कोन समबन्ध? तहिनङे खिरिस्टमे बिस्बास करैबलासब आ बिस्बास नै करैबलासबसङे कोन समबन्ध? 16 परमेस्वरके मन्दिरके मुरतीसङे कोन समबन्ध? कथिलेकी हमसब त जिबित परमेस्वरके मन्दिर चियै। जनङकी परमेस्वर कहनेछै, “हम ओकरासबमे बास करबै आ ओकरासबके बिचमे चल-फिर करबै। हम ओकरासबके परमेस्वर हेबै आ उसब हमर परजा हेतै। 17 ओकरासबसे निकैलके या आ ओइसबसे अलग रह! कोनो असुध चिज नै छु, तब हम तोरासबके सुइकार करबौ कैहके परमपरभु कहैछै। 18 हम तोरासबके पिता हेबौ आ तुसब हमर बेटा-बेटी हेब्ही कैहके सबरसक्तीमान परमपरभु कहैछै।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.