२ कोरन्थी 3 - मध्य पुरविया थारू1 कि फेनसे हमसब आपने तारिफ करैले लागल चियै? कि कुछ औरो लोकसब जखा हमसब तोरासबलग आबैले या तोरासबसे हमरासबके दोसर लग जाइले सिफारिस चिठीके कोनो जरुरी छै? 2 हमरासबके सिफारिस-चिठी त तुहिसब चिही जे हमरासबके हिरदयमे लिखलगेल छै आ जकरा सबकोइ पढैले आ बुझैले सकैछै। 3 साँचोके तुहिसब येसु खिरिस्टके लिखल चिठी अरथात हमरासबके करल सेबकाइके नतिजा चिही, जे चिठी मसिसे नै, महज जिबित परमेस्वरके आत्मासे लिखलगेल छै, पथलके सिलेटमे नै, महज लोकसबके हिरदयके सिलेटमे लिखलगेल छै। 4 तुसब हमरासबके चिठी चिही से हमसब कैह सकैचियौ, कथिलेकी खिरिस्टसे परमेस्वरमे हमरासबके पुरा भरोसा छै। 5 कोनोभी बात हमरासबके तरफसे एलछै कैहके हमसब दाबी करैके योग्यके नै चियै, महज हमरासबके योग्यता परमेस्वरसे आबैछै। 6 ओह्या हमरासबके लया करारके सेबकसब बनैके लेल योग्य बनेल्कै। यि करार लिखीत बेबस्थाके नै महज पबितर आत्माके करार चियै। कथिलेकी पुरन्का लिखल बेबस्थाके करार त मिरतु लाबैछै, महज लया करारमे पबितर आत्मा त जिबन दैछै। लया करारके महिमा 7 मिरतु आनैबला बेबस्था पथलके सिलेटमे खोपके लिखल छेलै। उ बेबस्था एहेन महिमामय भ्याके एलै कि ओकर चमकसे इजराएलीसब मोसाके चेहरा देखैले नै सकल्कै, महज उ चमक हराइते जाइतरहै। मिरतु आनैबला बेबस्था अनङ छेलै त, 8 पबितर आत्मासे आबैबला सेबाके चमक औरो बेसी महिमामय नै हेतै? 9 जब दोसी ठहराबैबला बेबस्था महिमामय छेलै त कि धरमी ठहराबैबला काम ओइसे बेसी महिमामय नै हेतै? 10 बास्तममे, पुरन्का करारके महिमा, अखुनके लया करारके महिमाके अगा ओकर कोनो महिमा नै रहलै। 11 एक छिन रहैबला पुरन्का करार त अतहेक महिमामय छेलै त सबदिन रहैबला लया करार औरो कतेक बेसी महिमामय हेतै! 12 हमरासबके एहेन आसा भेलाके कारन हमसब एकदम साहसी भेलचियै। 13 हमसब मोसा जखा नै, जे कि उ मलिन हैतगेल महिमाके अन्तिम झलक इजराएलीसब नै देखे कैहके आपन चेहरा बस्तरसे झापैछेलै। 14 महज ओइसबके मन कठोर भेलासे आइतक उ पुरन्का करारमे भेल बेबस्था परहैछै त ओइसबके बुझैबला समझ झापल रहैछै, ओहैसे उसब सत बात बुझैले नै सकैछै। आब येसु खिरिस्टमे बिस्बास कैरके मातरे उ समझ उघरैछै। 15 साँचोके मोसाके देल बेबस्था परहैचियै त अखुन्तो ओइसबके बुझैबला समझ झापल रहैछै आ उसब नै बुझैछै। 16 महज जब कोनो लोक परभुमे बिस्बास करैछै तब उ समझ उघैर जाइछै। 17 आब परभु आत्मा चियै आ जते परभुके आत्मा छै ओते स्वतनन्तरता रहैछै। 18 हमरासबके नै झापले चेहरासे परभुके महिमाके झलकाइचियै। परभु आत्मा चियै आ उ अपनासबके औरो आपनलखा महिमामय रुपमे परिबरतन कैरतेजेतै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.