२ कोरन्थी 2 - मध्य पुरविया थारू1 अहैलेल तोरासबके चित दुखाइले हम फेनसे तोरासबलग नै एबौ कैहके निरनय करलियै। 2 कथिलेकी हमरा खुसी बनाइबला लोक तुहिसब चिही, हम तोरासबके चित दुखाइबौ त के हमरा खुसी बनाइतै? 3 हम एबै त हमरा खुसी दैबला लोकसबसे हमर चित नै दुखे कैहके हम उ चिठी लिखने छेलियै। कथिलेकी हमरा आनन्द हेतौ त तोरोसबके आनन्द हेतौ कैहके हमरा पक्का बिस्बास छै। 4 तोरासबके चित दुखाइके लेल नै महज तोरासबके खातिर हमर गहिर परेम जान कैहके बहौत दुख-कस्टसे लोर बहाबैत तोरासबके उ चिठी लिखने छेलियौ। गलत करैबलाके छमा दहै 5 कोइ ककरो चित दुखाइनेछै त उ कामसे हमरा नै महज कुछ हदतक तोरेसबके चित दुखाइनेछौ। हम यि बात अहैलेल कहैचियौ कि तोरासब उपर कठोर नै बनी। 6 बहुमतसे देल सजाय ओइ लोकके लेल बहुत चियै। 7 बरु आब तुसब ओकरा छमा करे परतौ आ सान्तबना देबेपरतौ, नै त उ बहौत बरका भारी सोकमे डुइब जेतै। 8 अहैलेल हम तोरासबके बिन्ती करैचियौ कि उ लोक परती आपन परेम औरो गहिरसे परकट कर। 9 तुसब हरेक बिसयमे आग्याकारी चिही कि नै कैहके जाचैके लेल हम उ चिठी तोरासबके लिखने छेलियौ। 10 जकरा तुसब छमा करबिही, तकरा हम्हु छमा करबै। यदि हम ककरो कोनो बिसयमे छमा करनेचियै त तोरेसबके हितके खातिर खिरिस्टके उपस्थितीमे छमा करनेचियै, 11 ताकी सैतान हमरासबके फसाबैके मौका नै पाबे, कथिलेकी ओकर जुक्तीके बिसयमे हमसब अनजान नै चियै। तरोआसमे पावलके चिन्ता 12 जब हम तरोआस सहरमे खिरिस्टके बारेमे सुसमाचार परचार करैले एलियै तब परभु हमर लेल दुवार खोइलदेने छेलै। 13 महज हमर बिस्बासी भाइ तितस ओते नै भेटलाके कारन हमर मन बेचैन भेलै। तहैलेल ओइसबसे बिदा भ्याके हम माकेडोनिया परदेस दिसन गेलियै। खिरिस्टमे पाबैबला जित 14 परमेस्वरके धन्यबाद हेबे, उ अपनासबके खिरिस्टमे सबदिन बिजयके लेल चलाबैछै। ओकर ग्यानके गमक अपनासबसे हरेक जगहमे फैलाबैछै। 15 कथिलेकी हमरासबके जिबन परमेस्वर लग पुगैबला खिरिस्टके गमकौवा तेल जखा चियै। महज यि गमकौवा तेल मुक्ती पाबैबलासब गमक आ नास हैबलासब गनके रुपमे लैछै। 16 नास हैबलासबके लेल हमसब मिरतुके गन, महज मुक्ती पाबैबलासबके लेल हमरासबके जिबन गमक चियै। एहेन भारी कामके लेल के योग्य छै? 17 हमसब आपन फैदाके लेल परमेस्वरके बचन परचार करैबला बेपारी नै चियै। महज हमसब इमान्दार भ्याके खिरिस्टके सेबकके रुपमे परमेस्वर हमरासबके देखैछै से बात जाइनके ओकर बचन परचार करैचियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.