२ कोरन्थी 12 - मध्य पुरविया थारूपावलके दरसन 1 हमरा किछो फैदा नै हेतै तैयो गर्ब करैये परतै। आब हम परभुसे पाबलहा दरसनसब आ परभुसे परकट करल बातसब कहैचियौ। 2 हम खिरिस्टमे बिस्बास करल एक गोरे लोकके चिन्हैचियै, जे चौद बरिससे पहिने तेसर स्वरगमे उठ्यालगेलै। उ देहमे या बिना देहमे उठ्यालगेलै, से हम नै जानैचियै, उ परमेस्वर मातरे जानैछै। 3 हम ओइ लोकके चिन्हैचियै, उ लोक स्वरगमे उठ्यालगेलै, उ देहमे या बिना देहमे गेलै से हम नै जानैचियै, उ परमेस्वर मातरे जानैछै। 4 उ बखानो करे नै सकैबला बातसब सुनल्कै, जे ककरो कहैले अनुमति नै देल्कै। 5 हम ओइ लोकके बारेमे घमन्ड करबै महज हम आपन कमजोरी बाहेक औरो कोनो बातमे घमन्ड नै करबै। 6 यदि हम घमन्ड करबो करबै त हम मुरुख नै हेबै, कथिलेत हम सत बात बाजैचियै। महज लोकसब हमर जिबनमे देखल आ सुनलसे बेसि हमरा नै सम्झे कैहके चाहैचियै। 7 हमरमे महान रहस परकट करने छै तैल्याके हम घमन्डसे नै फुली कैहके हमर देहमे एकटा काँट राइख देनेछै, उ सैतानके दुत जखा हमरा दुख दैछै। 8 हमर देहसे यि हट्या दिय कहैके हम तिन बेर परभुसे परथना करलियै। 9 महज परभु हमरा कहल्कै, “हमर अनुगरह तोहर लेल परसस्त छौ, कथिलेत हमर सक्ती कमजोरीमे पुरा हैछै।” तैखातिर खिरिस्टके सक्ति हमरमे रहे कैहके कमजोरीमे हम औरो खुसीसे घमन्ड करैचियै। 10 ओहैसे खिरिस्टके खातिर कमजोरीमे, बदनामीमे, कठिनाइमे, सताबटमे, आपत-बिपतमे हम सन्तुस्ट चियै। कथिलेकी जब हम कमजोर हैचियै, तब हम सक्तिसाली हैचियै। कोरन्थीसबके लेल पावलके चिन्ता 11 हम त मुरुख जखा भेलियै, महज तुहिसब हमरा एहेन करैले कर लगेलिही। बास्तममे तोरेसबके हमर पक्छमे निक बात बोलैले परतियौ, कथिलेत हम किछो नै छेलियै तैयो महान परेरितसबसे त हम कम नै चियै। 12 हम पुरा धिरजकेसाथ सक्तिसाली आ अचमके कामसब कैरके तोरासबके बिचमे खिरिस्टके परेरित भेल परमान देनेचियौ। 13 औरो मन्डलीके तुलनामे हम तोरासबके कोन बातमे नै निक बेबहार करलियौ? हँ, हम तोरासबके लेल बोझ नै भेलियौ। एह्या हमर गल्ती चियै, अइमे हमरा छमा कैरदे। 14 आब हम तेसर बेर तोरासबलग आबैले तयार भेलचियौ आ हम तोरासबके लेल बोझ नै हेबौ। हम तोरासबसे पैसा-कौरी नै, महज तोरासबके चाहैचियौ। कथिलेत बाप-महताइरके लेल बेटा-बेटी नै महज बाप-महताइरके बेटा-बेटीके लेल धन-सम्पती जोग्याके राइखदैले परैछै। 15 तोरासबके भलाइके लेल हमरसङे भेल सब चिज खुसिसे देबौ आ अपना स्वयमके देबौ। यदि हम तोरासबके बेसी परेम करैचियौ त कथिले हमरा कमतियै परेम करैचिही? 16 हम तोरासबके भार नै भेलियौ, यि बात त तोरासबके थाहे छौ। हम चलाकी कैरके तोरासबके फसेलियौ कैहके कोइ-कोइ कहैछौ। 17 कि हम तोरासबलग लोकसबके पठ्याके तोरासबसे फैदा उठेलियौ से? 18 हम तितसके तोरासबलग जाइले बिन्ती करलियै आ दोसरो भाइके ओकरसङे पठेलियै। कि तितस तोरासबसे किछो फाइदा उठेल्कौ? कि हमसब एके आत्मासे नै चललियै आ कि हमसब एके रस्तामे नै चललियै? 19 भ्यासकैछै, हमसब यि सब आपन बचाबके लेल करैचियै कैहके आपन मनमे बिचार करैचिही। महज एहेन नै छै! पिरियसब, हमसब परमेस्वरके अगा खिरिस्टमे बोलैचियै। यि सबकाम तोरासबके बलगर बनाइके लेल करैचियौ। 20 कथिलेत हम तोरासबलग भेट करैले एबौ त हमर आस करल जखा नै हेबौ आ तोरासबके आस करल जखा हम नै हेबौ कि से हमरा डर लागल छै। तोरासबके बिचमे झगरा करैबला, डाह करैबला, रिस करैबला, आपने भलाइ चाहैबला, बदनाम करैबला, घमन्ड आ गोलमाल करैबलासब भेटतै कि कैहके हमरा डर लागल छै। 21 तोरासबके भेटैले फेर एबौ त परमेस्वर हमरा तोरासबके अगा निच बनाइतै कैहके हमरा डर लागैछै। जेसब पहिने पाप करने छेलै आ तोरासब आपनेसे करल असुध काम, बेबिचार, घिनलागैबला छाडा कामसे पस्चताप नै करनेचिही त हमरा निच बनैले परतै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.