२ कोरन्थी 11 - मध्य पुरविया थारूपावल आ झुठा परेरितसब 1 हमरा आसा छै कि, तुसब हमर कन्हिक मुरखता सहैचिही, बास्तममे तुसब सहैत एलचिही। 2 परमेस्वर तोरासबके करल वास्ता जखा हम्हु तोरासबके वास्ता करैचियौ, कथिलेकी हम त एक मातरे बर खिरिस्टसङे तोरासबके बियाह कैरदैके परतिग्या करनेचियौ। ओहैसे तोरासबके ओकर पबितर कुमाइर कनियाके रुपमे कनियादान करैके बिचार करनेचियौ। 3 जनङ सैतान साँपके रुप ल्याके चलाकिसे हब्बाके ठगल्कै, ओहिनङ खिरिस्ट परती तोरासबके इमान्दारी आ सुध भक्तीसे तोरासबके मन बहकतौ कि हमरा तकर डर लागैये। 4 यदि कोनो लोक आइबके हमरासबके करल येसुके परचार बाहेक दोसर येसुके परचार करतै त, तोरासबके भेटल आत्मासे दोसरे आत्मा तुसब गरहन करबिही त, या तोरासबके भेटल सुसमाचारसे कोनो दोसर सुसमाचार गरहन करबिही त, तुसब यि सबके अगा सहजे झुकैचिही। 5 आपनके “महान परेरितसब” सम्झैबला ककरोसे हम कम नै सोचैचियै। 6 हम बोलैमे फरहर लोक नहियो चियै त ग्यानमे कमके नै चियै। यि बात हमसब तोरासबके हर परकारसे साफ-साफ देख्यादेनेचियौ। 7 तोरासबके बरका बनाबैके लेल हम आपनके छोट बैनके परमेस्वरके सुसमाचार फोकटमे सुनाइलियौ त कि हम पाप करलियै? 8 हम तोरासबके सेबा करैबेर औरो मन्डलीसे मदत पाबलियै। एहेन मदत लेलियै त उ मन्डलीसबके लुटल जखा भेलै। 9 तोरासबसङे रहैतकाल जब हमरा घटि-कमी भेलै, तब हम ककरो बोझ नै बनलियै, कथिलेकी माकेडोनिया परदेससे एल भाइसब हमर घटि-कमी पुरा करल्कै। हम तोरासबके बोझ पैहनियो नै रहलियौ आ पाछुवो नै हेबौ। 10 खिरिस्टके सत बात हमरमे रहैतक अखैया परदेसके कोइ नै हमर यि घमन्ड करैबला बातसबसे रोकैले सक्तै। 11 हम कथिले अनङ कहैचियौ त? कि हम तोरासबके परेम नै करैचियौ? परमेस्वर जानैछै कि हम तोरासबके परेम करैचियौ। 12 हम जे काम कैर रहलचियै से काम कैरते रहबै, ताकी ओइसबके करल काम हमरे बराबर चियै कैहके उसब घमन्ड करैके मौका नै पाबे। 13 कथिलेकी एहेन लोकसब झुठा परेरितसब आ छली काम करैबलासब चियै। उसब खिरिस्टके परेरितसबके भेस धैरके चलैबलासब मातरे चियै। 14 यि कोनो अचमके बात नै चियै, कथिलेकी सैतानो चम्कैबला स्वरगदुतके जखा भेस धारन करैछै। 15 ओहैसे सैतानोके सेबकसब परमेस्वरके अगा धरमी सेबक जखा देखा परनाइ कोनो अचमके बात नै चियै। आखिरमे उसब आपनेसे करल कामके सजाय पाबतै। पावलके दुख-कस्ट 16 हम फेनसे कहैचियौ, हमरा कोइ नै मुरुख सम्झे। महज तुसब ओहेन सम्झैचिही तैयो हमर बात सुन, ताकी हम्हु कुछ घमन्ड करेसकी। 17 हम घमन्डसे जे बात बोइलरहलचियौ से बात हम परभुके अधिकारसे नै, महज मुरुख जखा बोइलरहलचियौ। 18 बहुतो लोक सन्सारके बातसबमे घमन्ड करलासे हम्हु घमन्ड करैचियै। 19 तुसब आपनके अतहेक बुधिमान ठानैचिही कि खुसिसे मुरखसबके बेबहारके सहैचिही। 20 कथिलेकी कोइ तोरासबके दास बनाइछौ, तोरासबके सोसन करैछौ, तोरासबसे फाइदा उठाइछौ, तोरासबके अगा धाख लगाइछौ आ तोरासबके गालमे थपराइछौ तैयो तुसब सब सहैचिही। 21 हमरा ओइसबके जखा बेबहार करैले लाज हैये से बात हमर कमजोरी चियै कैहके सुइकारै चियै। महज कोनो लोक कुछ बातमे घमन्ड करैछै त, हम्हु ओइ बातमे घमन्ड करैचियै। हँ हम मुरुख जखा बोइलरहल चियै। 22 कि उसब हिबरु चियै? हँ हम्हु चियै। कि उसब इजराएली चियै? हँ हम्हु चियै। कि उसब अबराहमके खानदानके चियै? हँ हम्हु चियै। 23 कि उसब खिरिस्टके सेबक चियै? हम बताह लोक जखा बोलैचियै, महज हम ओकरासबसे औरो असल सेबक चियै। ओकरासबसे त हम औरो बहौत मेहनत करनेचियै। कतहेक बेर त हम जहलमे परलियै, बहुत बेर कोर्रासे पिटाइ खेलियै आ बहुतो बेर कालके मुहसे बचल चियै। 24 हम यहुदीसबके हाथसे पाँच बेर उनचालिस उनचालिस कोर्रा पिटाइ खेलियै। 25 हम तिन बेर लाठीसे माइर खेलियै। हम एकबेर पथलसे माइर खेलियै। हम पानी जहादके यातरा करैबेर तिन चोटी जहाद डुइबगेलै। एक दिन आ एक रात हम समुन्दरमे बिताइलियै। 26 हम बेर-बेर यातरा करैबखत लदिसबके, समुन्दरके, सहरके, उजार जगहके आ डाकुसबसे, आपने जाइतके लोकसबसे, आनजातके लोकसबसे, झुठा सिक्छकसबसे आबैबला खतरामे परलियै। 27 हम कतहेक रात नै सुइतके खुब मेहनत करलियै। हम बहौत बेर खाना बिना भुखे पियासे रहलियै आ बस्तर नै भेलासे जारसे कठुवाइलियै। 28 ओतबे नै, सब मन्डलीसबके चिन्ता फिकरीके बोझ हमरमे छै। 29 कोइ कमजोर छै त हम्हु कमजोर भेल महसुस करैचियै। जब कोइ पापमे फस्याल जाइछै त हमरा एकदमसे रिस उठैछै। 30 यदि हमरा गर्भ करे परतै त, हम आपने कमजोरी देखाइबला बातसबमे गर्भ करबै। 31 परभु येसुके परमेस्वर आ पिता, जे सबदिन धैनके चियै, उ जानैछै कि हम झुठ नै बाजैचियै। 32 जब हम दमस्कस सहरमे छेलियै तब अरितस रजाके बडा-हाकिम हमरा पकरैके लेल सहरके देहरीमे सिपाहीसबके पहरा लगाइल्कै। 33 महज हमरा ढकियामे राइखके दबालके खिरकीसे निचा झाइर देल्कै आ हम ओकर हाथसे उमैक गेलियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.