२ कोरन्थी 10 - मध्य पुरविया थारूपावलके सेबा 1 हम पावल, तोरासबके सामने डरपोक चियै, महज दुर रहैबेर हम तोरासब परती साहसी हैचियै कैहके तोरासबके बिचमे हल्ला चललछै कहाने। खिरिस्टके नम्रता आ दयासे हम तोरासबके बिन्ती करैचियौ कि, 2 हम तोरासबलग एबौ त उ कठोरता नै देखाइले परे जे कठोरता हमसब सन्सारके लोकसब जखा चलैचियै कैहके संका करैबला लोकसबके देखाइके लेल हम निस्चय करनेचियै। 3 कथिलेत हमसब सन्सारमे चियै तैयो सन्सारके लोकसब जखा हमसब आपन सतरुसबसङे लराइ-झगरा नै करैचियै। 4 हमरासबके हाथ-हथियार त सन्सारके नै छै, महज हमरासबसङे परमेस्वरके सक्तिसाली हाथ-हथियार छै, जै हाथ-हथियारसे सैतानके सक्तिके खतम कैरदैछै आ बेकारके बाद-बिबादके नास कैरदैछै। 5 परमेस्वरके सत ग्यानके बिरोधमे उठैबला बहस आ घमन्डसे भरल बाधाके हमसब नास करैचियै आ सब खराब बिचारके खिरिस्टके आग्यापालन कराबैले बसमे करैचियै। 6 जब तुसब पुरा रुपसे खिरिस्टके आग्या मानबिही तब आग्या नै मानैबलासबके सजाय दैकेलेल हमसब तैयार हेबै। 7 तुसब त बाहरमे देखैबला बात मातरे देखैचिही। यदि कोइ उ खिरिस्टके चियै कैहके बिस्बास करैछै त, उ आपने आपके याद करे कि जहिना उ खिरिस्टमे छै तहिना हम्हुसब खिरिस्टके चियै। 8 परभुके देल हमरासबके अधिकारके बारेमे हम बरका बरका बात करबै तैयो लाजमे नै परबै, कथिलेकी यि अधिकार तोरासबके बिगार करैके लेल नै महज सुधारके लेल चियै। 9 हम चिठीसब लिखके तोरासबके डर देखाइले नै चाहैचियौ। 10 कतहेक लोक कहैछै, “पावलके चिठीसब गम्भीर आ करा हैछै, महज उ आपने हैतकाल कमजोर हैछै आ ओकर बोली कोनो महत्वके नै हैछै।” 11 ओहेन लोकसब यि बात बुझे कि, हमसब दुर रैहके चिठीमे जे लिखके पठाबैचियै, तोरासबके बिचमे हैतकाल ओह्या काम करैचियै। 12 आपनके बरका सम्झैबला लोकसबसङे हमसब आपनके एकेटा दरजामे या तुलना करैले साहस नै करैचियै, महज उसब आपने आपके एक-दोसरसङे नाइपके देखैछै या तुलना करैछै आ उसब मुरुख लोक जखा हैछै। 13 हमसब आपन अधिकारके सिमासे बाहर ज्याके घमन्ड नै करैचियै, महज परमेस्वरके तोकल सिमामे रैहके गर्भ करैचियै आ ओइसबके बिचमे काम करैके लेल सेहो ओहै सिमा भितर रैहके करैचियै। 14 हमसब आपन काम करैबला सिमासे बाहर ज्याके घमन्ड नै करैचियै, कथिलेकी सबसे पहिने तोरासबलग खिरिस्टके सुसमाचार आनैबला हम्हीसब चियौ। 15 हमसब सिमा नाइङहके दोसरके मेहनतमे घमन्ड नै करैचियै, महज हमरासबके आसा यि छै कि तोरासबके बिस्बास बढते जाइबखत तोरासबके बिचमे हमरासबके कामके सिमा औरो बेसिसे फैलते जाए। 16 तब हमसब तोरासबसे दुर-दुरके ठामसबमे सेहो सुसमाचार परचार करैले सक्बै, कथिलेत दोसरके काम करल ठाममे ज्याके हमसब काम करनेचियै कैहके घमन्ड करैले नै चाहैचियै। 17 पबितर धरमसास्तरमे एहेन लिखल छै, “जे कोइ घमन्ड करैछै त, उ परभुमे घमन्ड करे।” 18 कथिलेकी जे आपन तारिफ आपनेसे करैछै, उ कोनो महत्वके बात नै चियै, महज जकर तारिफ परभु करैछै उ बहौत मुल्यबानके ठानल जाइछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.