२ कोरन्थी 1 - मध्य पुरविया थारू1 हम पावल, परमेस्वरके इक्छासे खिरिस्ट येसुके परेरित हैकेलेल बोल्याल आ अपनासबके भाइ तिमोथीसे सेहो, कोरिन्थ सहरमे रहल परमेस्वरके मन्डलीके आ अखैया परदेसके चारुदिसन रहैबला खिरिस्टके पबितर जनसबके यि चिठी लिखैचियौ। 2 अपनासबके परमेस्वर पिता आ परभु येसु खिरिस्टसे तोरासबके अनुगरह आ सान्ती मिले। सान्तबना दैबला परमेस्वर 3 अपनासबके परभु येसु खिरिस्टके परमेस्वर आ पिताके जयजयकार हेबे। उ दया करैबला पिता आ पुरा सान्तबना दैबला परमेस्वर चियै। 4 परमेस्वरसे पाबलहा सान्तबनासे हमसब दुखमे परलहासबके सेहो सान्तबना दैले सकि कैहके उ अपनासबके सब दुखमे सान्तबना दैछै। 5 हमसब जतहेक खिरिस्टमे दुख भोग्बै, ततहेक बहौत परमेस्वर अपनासबके खिरिस्टसे सान्तबना देतै। 6 जब हमसब दुख भोगैचियै, उ तोरासबके सान्तबना आ मुक्तीके लेल चियौ। यदि हमसब सान्तबना पेबै त, तुहुसब सान्तबना पाबबिही। हमसब जे दुख भोगैचियै ओह्या दुख तुसब धिरजसे सहबिही त तुहुसब ओह्या सान्तबनाके अनुभव करबिही। 7 तोरासबके बिसयमे हमरासबके आसा एकदमसे अटल छै। कथिलेकी हमरासबके थाहछै कि, तुसब हमरासबके जखा भोगल दुख भोगैचिही, तहिनङे हमरासबके भेटल सान्तबना जखा तुहुसब सान्तबना पाबबिही। 8 हे हमर भाइसब, एसिया परदेसमे हमरासबके भोगल दुखके बारेमे तोरोसबके थाह हेबे कैहके हमसब चाहैचियै। कथिलेकी हमसब सहे नै सकैबला अतहेक नै दुख पाबलियै कि हमसब बाच्बै कैहके कोनो आसा नै छेलै। 9 हमरासब त आब मैर जेबै जखा लागल छेलै। हमसब आपनेमे भरोसा राखैके लेल नै, महज मरलहासबके जियाइबला परमेस्वरमे भरोसा करे सकि कैहके यि हैले एलै। 10 उ अपनासबके मिरतुके मुहसे बचेल्कै आ बचेतै आ ओकरमे फेनसे हमसब बाच्बै कैहके पुरा रुपसे भरोसा करनेचियै। 11 तुसब परथनासे हमरासबके सहायता करेपरतौ। अहिनङ बहौत लोकके परथनाके उतरके रुपमे हमसब जे आसिस पाबनेचियै, तकर लेल बहुतो लोक परमेस्वरके धन्यबाद चरहाइतै। पावलके योजनामे फेर-बदल 12 अइ बातमे हमसब गर्भ करैचियै आ हमरासबके बिबेक सेहो साक्छी दैछै कि, अइ सन्सारमे बिसेस कैरके ओइसबसङे समबन्धमे हमसब इमान्दार आ परमेस्वरमे पबितर जिबन बितेलियै। यि हमसब सन्सारके ग्यानसे नै महज परमेस्वरके अनुगरहसे पाबनेचियै। 13 तुसब पैढके बुझैले नै सकैबला बात हमसब तोरासबके नै लिखने चियौ। हमरा आसा छै, कि तुसब पुरा रुपसे बुझबिही। 14 अखैन तुसब हमरासबके बारेमे पुरा रुपसे नै बुझने चिही महज तुसब पुरा रुपसे बुझबिही कैहके आसा करैचियै। परभु येसु खिरिस्ट आबैबला दिनमे तुसब हमरासबके बारेमे गर्भ करबिही, जनङ हमसब तोरासबके बारेमे गर्भ करैचियै। 15 हमरा यि बातके पुरा भरोसा भेलाके कारन, तोरासबलग पहिने आबैके इक्छा करलियै ताकि तोरासबके दोबर फैदा हेबे। 16 हम माकेडोनिया परदेस जाइबेर तोरासबसे भेटघाट करबौ आ माकेडोनियासे घुइमके आबैतो काल तोरासबलग एबौ आ ओतेसे यहुदिया परदेस जाइबेर तुसब हमर लेल बेबस्था मिलाइबिही कैहके हम चाहैछेलियै। 17 कि हम अस्थिर नै भेल जखा यि योजना बनाइने चियै कैहके तोरासबके लागैछौ? कि हम योजना बनाइतकाल सन्सारके लोक जखा एके छनमे “हँ” आ एके छनमे “नै” कैहके कहैचियै से? 18 परमेस्वर बिस्बासयोग्य भेल जखा अपनासबके बोलि सेहो बिस्बासयोग्य छै। हमसब एके बातमे “हँ” आ एके बातमे “नै” कैहके नै कहैचियै। 19 कथिलेकी सिलास, तिमोथी आ हम तोरासबके बिचमे परचार करल परमेस्वरके बेटा येसु खिरिस्टमे एके छनमे “हँ” आ एके छनमे “नै” बला बात नै छै, महज ओकरमे हरदम “हँ” मातरे छै। 20 कथिलेकी परमेस्वरके सब परतिग्या येसु खिरिस्टमे “हँ” कैहके पुरा हैछै, अहैलेल ओकरसे परमेस्वरके महिमाके लेल हमसब “आमेन” कहैचियै। 21 परमेस्वरे हमरासबके आ तोरासबके खिरिस्ट येसुमे अस्थिर बनाइनेछै आ अपनासबके नियुक्त करने छै। 22 अपनासबमे उ आपन छाप लगाइने छै आ बैनाके रुपमे पबितर आत्माके अपनासबके हिरदयमे बास करैले देने छै। 23 हम परमेस्वरके साक्छी माइनके कहैचियौ कि, तोरासबके हपकाइले नै परे कैहके हम फेरसे कोरिन्थ सहरमे नै एलियै। 24 हमसब तोरासबके बिस्बासमे अधिकार जमाइले नै चाहैचियौ, बरु तोरासबके खुसिके लेल तोरेसबसे मिलके काम करैले चाहैचियौ। कथिलेकी तुसब आपन बिस्बासमे अस्थिर चिही। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.