१ तिमोथी 6 - मध्य पुरविया थारू1 मालिकके अधिनमे रहैबला सब दास आपन मालिकके पुरा आदर करैले परतै, ताकि कोइ नै परमेस्वरके नाम आ अपनासबके देल सिक्छाके बदनाम करे सक्तै। 2 बिस्बासी भाइ-भैयासब त चियै कैहके दाससब आपन बिस्बासी मालिकके कम आदर नै करौक, बरु उसब औरो निकसे मालिकके सेबा करेपरतै, कथिलेकी सेबासे लाभ पाबैबला मालिकसब ओकरासबके आपने पिरिय बिस्बासी भाइ-भैयासब चियै। तु यि बातसब मन्डलीमे बिस्बासीसबके सिखा आ पालन करैके लेल उत्साह दहै। धन सम्पैतके मोह-माया 3 यदी कोइ झुठ सिदान्त सिखाबैछै आ आपन परभु येसु खिरिस्टके देल साँचो सिक्छा आ परमेस्वरके भक्ति हैबला सिक्छामे सहमत नै हेतै त, 4 उ लोक घमन्डसे भरल रहैछै आ कुछो नै जानैछै। एहेन लोक बेरथेमे बाद-बिबाद करैछै। बात-बातमे झगरा करैछै। एहेन बातसबसे त डाह, फुट, बदनाम आ संखासब हैले लागैछै। 5 एहेन लोकसबके बिचमे सबदिन झगरा हैछै। ओइसबके मति भरस्ट भेल रहैछै। उसब सत बातसबसे दुर भेल रहैछै आ परमेस्वरके भक्ति करैबला काम धनिक हैकेलेल चियै कैहके बिचार करैछै। 6 बास्तबिक्ता त यि चियै कि सन्तोस कैरके परमेस्वरके भक्ति करनाइ सबसे बरका धन चियै। 7 कथिलेकी अपनासब जल्मै बखत नै कुछो ल्याके एलियै नै मरै बखत ल्याके जेबै। 8 ओहेन चियै त अपनासबके खाइले पिन्हैले भ्यागेलै त, ओहैमे सन्तोस करे परतै। 9 महज धनिक हैले चाहैबला परिक्छामे परैछै। उ बेरथ आ खराब इक्छासबमे फैस जाइछै। ओहे खराब इक्छा ओकरा दुख आ बिनासमे लजाइछै। 10 कथिलेकी सब परकारके खराबी के जैर रुपैया-पैसाके मोह चियै। कतहेक गोरा अकर पछा लाइगके बिस्बाससे पछा हैट गेलछै आ उसब आपन उपर दुख कस्ट लाबने छै। पावल तिमोथीके चेताइल्कै 11 महज तु परमेस्वरके जन भेलाके कारन यि बातसबसे दुरे रहिहे। तु परमेस्वरके निक लागैबला धारमिक जिबन जिहे आ बिस्बास योग्य, परेम, धिरज आ नमरतामे आपन मन लगा। 12 बिस्बासके उतम लराइ लर। अनन्त जिबनके पकरने रह, कथिलेकी यह्या जिबनके लेल परमेस्वर तोरा बोलेल्कौ आ अहैके लेल तु बहुतो गोराके अगा आपन असल साक्छी देने चिही। 13 सब चिजके जिबन दैबला परमेस्वर आ पन्तियस पिलातसके अगा असल साक्छी दैबला येसु खिरिस्टके अगा, हम तोरा यि आग्या दैचियौ, 14 आपनसबके परभु येसु खिरिस्ट नै आबैतक सुध मनसे ओकर आग्यापालन कर ताकि तोरा कोइयो नै दोस लगाबे। 15 परमधन्य परमेस्वर जे सारा सक्तीके मालिक, रजा सबके रजा आ परभु सबके परभु चियै, वह्या परभु येसु खिरिस्टके ठिक समयमे फेनो पठेतै। 16 उ अजर-अमर रहैबला आ उ एहेन इजोतमे बास करैछै जकर लगमे कोइ नै जाइले सकैछै। ओकरा कोइयो नै देखने छै आ नै देखे सक्तै। सब आदर आ सब सक्ति, सबदिन ओकरे चियै। आमेन। 17 अइ सन्सारमे धनिक भेल लोकसबके घमन्डी नै बन कैहके आग्या दहै। अनिस्चीत धन सम्पैतमे नै महज सब चिज परसस्तसे आपनसबके भोग करैले दैबला परमेस्वरमे भरोसा कर कैहके ओइसबके आग्या दहै। 18 आन लोकके भलाइ करैले, असल काममे धनिक हैले, खाचोमे परलहा लोकसबके सहायता करैले आ आपनसङे भेल चिज औरोसबके दैले ओइसबके कह। 19 एहेन कैरके उसब आपन लेल साँचोके धनसम्पती जम्मा करेसक्तै, जे धन आबैबला दिनके लेल ठोस जगके रुपमे काम लाग्तै। ताकि उसब उ जिबन पाबे जे जिबन सत जिबन चियै। 20 हौ तिमोथी, जे जिम्मा परमेस्वर तोरा देने छौ ओकरा निकसे देखभाल कर। परमेस्वरके अपमान हैबला मुरुख बातसबसे आ कतहेक लोक परमेस्वरके बिरोध करैबला बातके “ग्यान” कैहके मानने छै तै झुठ बातसबसे अलग रह। 21 कथिलेकी एहेन बातसबके पाछु लाइगके कतहेक लोक बिस्बाससे दुर भेलछै। तोरासबके सङे परमेस्वरके अनुगरह रहे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.