१ तिमोथी 5 - मध्य पुरविया थारूमसोमातनी, अगुवा आ दासके लेल बिन्ती 1 अपनसे बुढसबके नै हप्का, बरु आपन बाबु जखा आदरभावसे सम्झा-बुझा आ आपनसे छोट भाइ जखा बेबहार कर। 2 ओहिनङके बुढ जनिसबके आपन माँ जखा आ छोटसबके पबितर मनसे बहिन जखा बेबहार कर। 3 जे मसोमातनीके कोइ नै छै, ओकरासबके देखभाल कर। 4 महज जै मसोमातनीके बेटा-बेटी कि नाती-नातिन छै, सबसे पहिने उसब मसोमातनीके देखभाल करे। उसब घरेमे भक्ति-भाव करैले सिखे आ आपन माँ-बाबुके उपकारके करजा सदहावे, कथिलेकी अनङ करलासे परमेस्वर खुसी हैछै। 5 जै मसोमातनीके देखभाल करैबला कोइ नै छै, से मसोमातनी त आपन भरोसा परमेस्वरमे राखने रहैछै। उ दिन रात परमेस्वरमे बिन्तीभाव करैत रहैछै। 6 महज जै मसोमातनी भोग-बिलासके जिबन बिताबैछै उ जिते रहतै तैयो मरल जखा चियै। 7 अइ बातसबके बारेमे तु मन्डलीके बिस्बासीसबके सिक्छा दहै ताकि ओइसबके कोइ नै दोस लगाबे पाबे। 8 यदी कोइ आपन नातेदार आ खास कैरके परिबारके देख-भाल नै करैछै, उसब बिस्बाससे पछा हटल लोक चियै आ अबिस्बासीयोसे बेसी खराब हैछै। 9 साइठ बरिस पुगल आ घरबला परती बिस्बास योग्य रहल घरबालीके मातरे मन्डलीसे सहायता पाबैबलाके सुचिमे नाम लिख। 10 अतबे नै उ असल काम करलाके खातिर सब दिसनसे आदर पावलके हैकेचाही। उ आपन बेटा-बेटीके निक जखा लालन-पालन करने आ मेजमानसबके सेबा-सत्कार करने रहल हैकेचाही। उ परमेस्वरके पबितर जनसबके टाङ धुवाइने आ दुखमे परलहासबके मदत करने रहल हैकेचाही। अहिने औरो असल असल काम करने रहल हैकेचाही। 11 महज जबान उमरके मसोमातनीसबके नाम मसोमात सुचिमे नै लिख, कथिलेकी जब ओइसबके सारिरीक इक्छाके कारनसे खिरिस्टसे दुर ल्याजेतै, तै दुवारे उसब बियाह करैले ताक्तै। 12 अहै तरहसे उसब पैहने खिरिस्टमे करल आपन परतिग्या भङ कैरके दोसी ठहरतै। 13 उसब अङने-अङने चलैबला आदत पैरके कोरनी आ चुगली लगाइबाली हैछै। ओतबे नै उसब नै बाजैबला बातसब बतियाइछै आ दोसरके काममे टाङ अराबैबाली हैछै। 14 अहैलेल हम जबान मसोमातनीसबके फेनसे बियाह कैरके बेटा-बेटी जलमाबे आ घर गिरहस्ती चलाबे कैहके सल्लाह दैचियै। ओहेन करलासे डाह करैबलासबके निन्दा करैके मौका नै भेटतै। 15 कथिलेकी कतहेक कम उमेरके मसोमातनीसब पहिनेसे बहैकके सैतानके रस्ता पर चैलगेलछै। 16 यदी कोनो खिरिस्टमे बिस्बास करैबला जनिके घरमे मसोमातनीसब छै त, उ ओइसबके मदत करे। ओहेन करलासे ओकरसबके भार मन्डलीके नै परतै आ जे साँचोके मसोमातनीसब छै ओइसबके मन्डली मदत करेसक्तै। 17 असलसे मन्डलीके देख-भाल करैबला अगुवासबके दोबर आदरके योग्य हैछै आ बिसेस कैरके जे अगुवासब बचन परचार आ सिखाबैबला काममे मेहनत करैछै। 18 कथिलेकी पबितर धरमसास्तरमे एहेन लिखल छै, “दौनी करैबला बरदके मुहमे जाबि नै लगा” आ “काम करैबला आपन बैन पाबे परतै।” 19 अगुवा उपर लागल दोसमे दुइ-तिन गोराके साक्छीके परमान बिना ओकर बात सुन्बे नै कर। 20 बेर-बेर पाप करैबला सबके मन्डलीके अगारी दम्सा ताकि देखके दोसरो गोरा डराबे। 21 हम तोरा परमेस्वर, खिरिस्ट येसु आ चुनलगेल स्वरगदुतके अगा करा आग्या द्याके यि कहैचियौ कि भेदभाव बिना यि नियमसब पालन कर। पक्छपात कैरके कोनो काम नै कर। 22 तु मन्डलीमे अगुवा नियुक्त करैके लेल झट-पट ककरो उपर हाथ राखैबला काम नै कर। आनगोराके पापमे सहभागी नै हो। तु अपने-आपके पबितर राख। 23 तु पानी मातरे नै पि, महज तोरा बेर-बेर पेटके बिमारी भेलाके कारन कन्हिक-कन्हिक दाखमध पियैत रह। 24 कोनो-कोनो लोकके पाप साफ-साफ देखा परैछै आ उसब नियाय हैसे पहिने दोसी ठहैर जाइछै, महज कतहेक गोराके पापसब पछासे मातरे देखापरैछै। 25 तहिनङ कतहेक लोकके करल असल काम परस्टे देखा परैछै आ परस्ट नहियो देखा परैबला असल काम एक न एक दिन अबस्य देखा परतै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.