१ तिमोथी 4 - मध्य पुरविया थारूझुठा सिक्छाके बिरोधमे चेताबनी 1 पबितर आत्मा साफ-साफ कहैछै कि अन्तके दिनसबमे अहिनङो लोकसब हेतै जेसब बिस्बाससे पछा हटतै। उसब छल करैबला आत्माके आ भुतसबके देल सिक्छा मान्तै। 2 एहेन सिक्छा झुठ बोलैबला कपटी लोकसबसे आबैछै। ओइसबके बुइध धिपल लोहासे दागल रहैछै। 3 उसब बियाह नै कर कैहके लोकसबके कहैछै आ बहुतो एहेन खाइबला चिजसब खाइले नै मिलैछै कैहके सिखाइछै। महज सत बात जानैबला बिस्बासी लोक धन्यबाद द्याके परमेस्वरके सिरिस्टी करल सब चिज खाइले सकैछै। 4 परमेस्वरके सिरिस्टी करल सब चिज एकदम असल छै। अपनासब परमेस्वरके धन्यबाद द्याके लैचियै त इन्कार करैबला कोनो चिज नै छै। 5 कथिलेकी परमेस्वरके बचन आ परथनासे सब चिज पबितर हैछै। 6 यदी तु यि सिक्छा औरो बिस्बासी जनसबके सिखाइबिही त, तु पालन करैत एल सिदान्त आ बिस्बासके बचनमे बौकार भ्याके येसु खिरिस्टके असल सेबक हेब्ही। 7 तु इस्वरहिन आ अरथहिन खिसा-पिहानी सबसे दुर रह। बरु परमेस्वरके पसिन परैबला जिबन जियैके कोसिस कर। 8 देहके कसरत करनाइ असल चियै, महज आत्मिक कसरत करनाइ औरो असल चियै, कथिलेकी अखुन आ आबैयोबला जिबनमे फैदाके लेल परतिग्या करने छै। 9 यि बात एकदम सत चियै आ यि पुरा रुपसे सुइकार करे परतै। 10 ओहै कारनसे हमसब एकदम मेहनत करैचियै आ हरदम सङघरसमे लागल रहैचियै। कथिलेकी अपनासबके आसा जिबित परमेस्वरमे छै। परमेस्वर सब मानब जातीके आ खास कैरके बिस्बासीके मुक्तीदाता चियै। 11 तु आपन सिक्छासबमे यि बातसब सिखा आ पालन करैले अरहा। 12 जबान भेलाके कारन कोइ नै तोरा निच ठाने। बरु तु बोलि-बचनमे, चाल-चलनमे, परेममे, बिस्बास आ पबितरतामे बिस्बासीसबके अगा एकटा नमुना बन। 13 हम नै आबैतक बिस्बासीसबके तु पबितर धरमसास्तर पैढके सुना, साहस दहै आ सिक्छासब देबेमे लागल रह। 14 जे बरदान अगुवासब आपन हाथ तोहर उपरमे राइखके अगमबानीसे पाबने छेल्ही, ओकरा पुरा सदउपयोग कर। 15 हम तोरा कहल यि सब बात एकदमसे पालन कर आ पुरा मन लगाके ओहैमे लागल रह ताकि तोहर करल उन्नती सबकोइ देखे। 16 तु आपन जिबन आ आपन देल सिक्छाके बारेमे होसियार रह। यि सब करलासे तु आपन जिबन आ तोहर सिक्छा सुनैबलासबके जिबन बचेब्ही। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.