१ तिमोथी 3 - मध्य पुरविया थारूमन्डलीके अगुवासब 1 यि बात त एकदम सत चियै कि, जे लोक मन्डलीके रेखदेख करैबला अगुवाके काम करैले इक्छा करैछै त उ एकदम असल करैले चाहैछै। 2 तै खातिर मन्डलीके एकटा अगुवा हैकेलेल यि जरुरी छै जे उ दोस बिनाके हैकेचाही, ओकरा एकेटा घरबाली हैकेचाही, उ धिरजी, सम्झदार, भलादमी, मेजमानसबके मान-दान आ लोकसबके असलसे सिखाइबला हैकेचाही। 3 महज उ मारपिट नै करैबला, दाखमध नै पिये बला, रिस नै करैबला, सान्त स्वभाबके आ पैसाके लोभ नै करैबला हैकेचाही। 4 उ आपन घर परिबार असलसे चलाबैबला, ओकर धियापुता असलसे आदर करैबला आ अरह्याल काम मानैबला हैकेचाही। 5 कथिलेत आपन घर परिबार असलसे नै चलाबे सकैबला कनङके मन्डलीके देखभाल करे सक्तै? 6 अगुवा भरखरके बिस्बासी नै हैकेचाही। नै त अनङ नै हेबे कि उ घमन्डसे फुइलके सैतान जखा दन्डके भागिदार हेबे। 7 देखभाल करैबला अगुवा मन्डलीएटाके भितरे मातर नै महज उ मन्डलीके बाहरो इजत-मान भेटल लोक हैकेचाही। तब मातरे ओकरा बिस्बासी लोकसब मान करतै आ सैतानके जालमे नै परतै। मन्डलीमे सेबा करैबलासब 8 तहिनङे मन्डलीमे सेबा करैबला डिकन निक चालचलनके लोक हैकेचाही। उसब साँच-साँच बोलैबला, दाख मध नै पियैबला आ पैसा-कौरीके लोभ-लालच नै करैबला हैकेचाही। 9 ओइसबके परमेस्वरसे परकट करल बिस्बासमे गरल सत्यके सुध बिबेकसे पकरने रहैके चाही। 10 पहिने ओइसबके जाँच हैलेपरतै। यदि ठिक ठहरतै त, उसब डिकन रैहके सेबा करे सक्तै। 11 तहिनङ कैरके ओकरासबके घरबालीसब सेहो आदर पाबैबाली हैके चही। उसब दोसरके बदनाम नै करैबली, आपनके बसमे राखैबाली आ सब बातसबमे बिस्बास योग्य हैलेपरतै। 12 मन्डलीके सेबा करैबला डिकनके एकेटा घरबाली हैकेचाही। उ आपन बेटा-बेटी आ घरपरिबारके निकसे चलाइबला हैकेचाही। 13 जे डिकन मन्डलीमे निकसे रेख-देख करतै, से एकदमसे आदर पाबतै आ येसु खिरिस्टमे करल आपन बिस्बासके बारेमे निडर भ्याके औरो लोकसबके कहैके लेल बरका साहस पाबतै। बरी रहसके बात 14 हम तोहरलग जल्दी आबैके असा राखने चियौ, महज यि चिठी अहैलेल लिखैचियौ, 15 यदी हमरा आबैमे देर हेतै त, परमेस्वरके परिबारमे भेल लोकसबके चाल-चलन केहेन रहैके चाही से जाइनले। यि परिबार त जिबित परमेस्वरके मन्डली अरथात सतके खम्हा आ जग चियै। 16 परमेस्वरके परकट करल सत्यके सन्देस अचमके चियै आ अकरा कोइ नै इन्कार करे सक्तै। खिरिस्ट मानब बैनके परगट भेलै आ पबितर आत्मासे धरमी ठहरल गेलै। स्वरगदुतसब ओकरा देखल्कै आ जाती-जातीके बिचमे ओकर बारेमे परचार भेलै। सन्सारमे लोकसब ओकरा बिस्बास करल्कै आ उ महिमाके सङे स्वरगमे उठ्यालगेलै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.