१ तिमोथी 2 - मध्य पुरविया थारूआराधनाके बारेमे सिक्छा 1 आब सबसे पहिने अनुरोध करैचियौ कि सब लोकसबके लेल बिन्ती-भाव, परथना, अन्तरबिन्ती आ धन्यबाद परमेस्वरमे चरहा। 2 रजा आ हाकिमसबके लेल परथना कर ताकि हमसब सुख सान्तीसे परमेस्वरके भक्ति करे आ आदरके जिबन बिताबे सकी। 3 एहेन परथना करनाइ असल चियै आ अपनासबके मुक्तीदैबला परमेस्वरके एहेने निक लागैछै। 4 सबलोक मुक्ती पाबे आ उसब सत बात बुझे कैहके ओकर इक्छाछै। 5 कथिलेकी परमेस्वर एकेटा छै। परमेस्वर आ लोकसबके बिचमे मिलाप कराइबला एकेटा लोक छै। उ लोक येसु खिरिस्ट चियै। 6 उ सबलोकके छुटकाराके मोल तिरैके लेल अपने-आप बलिदान भेलै। अइ बातके साक्छी परमेस्वर ठिक समयमे देल्कै। 7 अहै बातके परचार करैके लेल परमेस्वर हमरा एकटा परचारक आ परेरित हैकेलेल चुनल्कै। गैर-यहुदीसब येसुमे बिस्बास करे तै उदेस्यसे ओइसबके सत बात सिखाइके लेल उ हमरा पठेल्कै। हम एकोरती बरह्या-चरह्याके नै कहैचियौ, हम त सत बात कहैचियौ। 8 तैदुवारे हरेक ठाम जते आराधना हैछै, ओते पुरुखसब बिना रिस-खिस आ बाद-बिबाद आपन पबितर हाथ उठाके परथना करे कैहके हम चाहैचियै। 9 ओहिने जनिसब सोहो होसियारीसाथ साधारन आ भद्र पहिरन पिन्हे हम चाहैचियै। उसब आपन आपन केसके सिङगार-पटार, सोना या मोती आ बहौत महङके बस्तरसब नै पिन्हे, 10 बरु असल कामसे सुसोभित हेबे, जे परमेस्वरके भक्ति करैबला जनिसबके सोहाबैछै। 11 जनिसब सान्तसँङे अगुवासबके अधिनमे रैहके सिखे। 12 जनी पुरुख उपर हक जमाबे आ उपदेस देबे कैहके हम अनुमति नै दैचियै। ओकरासबके चुपचाप रहे परतै। 13 कथिलेकी परमेस्वर पहिने आदमके सिरिस्टी करल्कै तब बादमे हब्बाके। 14 दोसर बात आदम सैतानके छलमे नै बरु हब्बा छलमे पैरके परमेस्वरके आग्या भङग करल्कै। 15 महज तैयो जनी नम्र भ्याके बिस्बास, परेम आ पबितर रहतै त बच्चा जलमाइबेर उसब उदार पाबतै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.