१ तिमोथी 1 - मध्य पुरविया थारू1 हमरा मुक्ती दैबला परमेस्वर आ आसा दैबला येसु खिरिस्टके आग्या अनुसार नियुक्त भेल हम पावल, येसु खिरिस्टके परेरित यि चिठी 2 बिस्बासमे हमर साँचोके बेटा तिमोथीके चिठी लिखरहलचियै। अपनासबके परमेस्वर पिता आ परभु येसु खिरिस्टसे तोरा अनुगरह, किरपा आ सान्ती मिले। झुठा सिक्छासबसे होसियार रहैके चेताबनी 3 हम माकेडोनिया परदेस जाइबखत तोरा एफिससमे रह कैहके कहने छेलियौ। आब फेनो कहैचियौ कि ओतै रह आ झुठ सिक्छा सिखाइबलासबके ओहेन नै सिखा कैहके करा आग्या दहै। 4 ओइसबके बनोतरी बात-कथा सबमे आ नै सकैबला बंसाबलीसबमे नै ओझराल रह कैहके आग्या दहै। कथिलेत एहेन बातसबसे बाद-बिबाद मातरे हैछै आ परमेस्वरमे बिस्बासके जिबन बिताइबलासबके कोनो फैदा नै करैछै। 5 हमर कहैके उदेस्य त यि चियै कि बिस्बासीसब एक दोसरके परेम करे, जे परेम सुध हिरदय, असल बिबेक आ साँचोके बिस्बाससे मातरे आबैछै। 6 महज कतहेक गोरा त यि बातके छोइरके बेरथके बातसबमे ओझराल छै। 7 उसब मोसाके बेबस्था सिखाबैबला गुरु हैले चाहैछै महज कथी बोइलरहल छै आ कथिके बारेमे बिसेस सिखाइछै से आपने नै जानैछै। 8 अपनासब जानैचियै कि बेबस्थाके निक जखा जिबनमे लागु करे त असल चिज चियै। 9 अपनासब यि बात जानैचियै कि बेबस्था असल लोकके लेल नै बनलछै महज अकर बेबस्था भङ करैबलासबके लेल, अपराध करैबलासबके लेल, आग्यापालन नै करैबलाके लेल, भक्तीहिन आ पापीसबके लेल, अपबितर आ दुस्ट, अधरमी आ आपन बाप-महताइरसबके हतिया करैबलासबके लेल आ औरोसबके हतिया करैबलासबके लेल बनलछै। 10 अतबे नै बेबस्था त बेबिचार करैबलासबके लेल, समलिङगी सबके लेल, अपहरन करैबलासबके लेल, झुठ बोलैबला, झुठ किरिया खाइबलासबके लेल आ सत सिदान्तके बिरोधमे हैबला औरो बहुतो कामसबके बिरोधमे बनलछै। 11 सत सिदान्त यि चियै, जे परमधन्य परमेस्वरके महिमीत सुसमाचार अनुसार छै जकरा सुनाबैके जिम्मा हमरा देलगेल छै। पावलके उपरमे परभुके अनुगरह 12 हमर काममे हमरा बल दैबला अपनासबके परभु येसु खिरिस्टके हम धन्यबाद दैचियै, कथिलेकी हमरमे बिस्बास कैरके उ हमरा आपन सेबाके काममे छानल्कै। 13 एक समयमे हम्हु परमेस्वरके निन्दा करैबला आ ओकरमे बिस्बास करैबलासबके सताइबला आ दुरछिया करैबला लोक छेलियै। महज परमेस्वर हमरा दया करल्कै कथिलेकी उ कामसब हम अन्जानमे करलियै आ ओइ बखत हम परभुके नै चिन्है छेलियै। 14 आब देख, अपनासबके परभु येसुके अनुगरह हमर उपर कतहेक बहौत छै कि उ आपन बिस्बाससे आ परेमसे हमरा भरल्कै। 15 यि बात सत चियै आ सुइकार योग्य छै कि येसु खिरिस्ट पापीसबके बचाइके लेल अइ सन्सारमे एलै। ओइ पापीसबसे बेसी पापी हम चियै। 16 अहैकारनसे उ हमरा दया करल्कै आ पापीसबमेसे मुख पापी भेलापरभी हमरमे खिरिस्ट येसु आपन महान धिरज देखेल्कै ताकि पछा ओकरा बिस्बास करैबला आ अनन्त जिबन पाबैबलाके लेल हम एकटा उदाहरन बनी। 17 जुगो-जुगके रजा, अमर, देखा नै परैबला एक मातरे परमेस्वरके आदर-भाव आ महिमा सबदिन हैते रहे। आमेन। 18 हमर बेटा तिमोथी, तोहर बारेमे पहिने करल अगमबानी बमौजी हम तोरा यि कहैचियौ कि तु सब बात पालन कर ताकि निडर भ्याके उतम लराइ लरैले सकबिही। 19 तै बखत तु बिस्बासमे असथिर रह आ असल बिबेक बच्याके राख। कोइ-कोइ बिबेक अनुसार नै चलैके कारन आपन बिस्बासके नास कैनेछै। 20 ओइसबमे परैबला हुमेनियस आ अलेक्जेन्डर चियै। उसब परमेस्वरके बदनामी करैले छोरे कैहके हम ओकरासबके सैतानके हाथमे सोइप देलियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.