१ थेसलोनिकी 5 - मध्य पुरविया थारूपरभु आबैबला दिनके लेल तयार रह 1 देख हमर भाइसब, परभु कहिया आ कोन बखत एतै से तोरासबके लिखैके जरुरी नै छै। 2 कथिलेकी परभुके आबैबला दिन त रातमे चोर एल जखा सुटुक्क दबर एतै कैहके तोरासबके एकदमसे थाहे छौ। 3 जब लोकसब “सान्ती आ सुरक्छा” कहैत रहतै, तै बखत जनङ देहभारी भेल जनी बच्चाके जल्माबैके पिरा उखरैछै तहिनङ अचानक ओइसब उपर आफत एतै आ उसब ओइसे नै बाच्बे। 4 महज देख हमर भाइसब, तुसब यि बातसबके बारेमे अन्जानमे नै चिही। ओहैसे परभु आबैबला दिनमे चोर एल जखा अचानक नै एतौ। 5 कथिलेकी तुसब इजोत आ दिनके धियापुता चिही। हमसब रातके आ अन्हारके धियापुता नै चियै। 6 ओहैसे दोसर-तेसर लखा अपनासब नै सुत, महज जागल आ चौकल रह। 7 कथिलेकी सुतैबलासब रातमे सुतैछै आ पियक्करसब रातेमे मातैछै। 8 महज अपनासब दिनके धियापुता भेलाके कारन, चौकल रह। अपनासब बिस्बास आ परेमके कबच लगा आ मुक्तीके आसाके टोपी पिन्हके होसियार रह। 9 कथिलेकी परमेस्वर अपनासबके दन्ड दैकेलेल नै महज परभु येसु खिरिस्टसे मुक्ती पाबैके लेल चुन्ने छै। 10 परभु येसु आपनसबके खातिर अइलेल मरलै कि उ फेनसे आबैबखत अपनासब जिते हेबे चाहे मरल हेबे ओकरेसङे जिबन जियैले सकब। 11 ओहै लेल तुसब एक दोसरके उत्साह दहै आ बिस्बासमे बलगर बना, जनङ तुसब करैत आइबरहल चिही। पावलके अन्तिम सल्लाह 12 हे हमर भाइसब तोरासबके हमसब आगरह करैचियौ कि जतहेक लोकसब तोरासबके बिचमे परभुके काम दिनरात एक कैरके मेहनत करैबला आ सर-सल्लाह दैबला अगुवासब चियौ, ओइसबके आदर कर। 13 ओइसबके करल कामके लेल ओकरासबके परेमसे एकदम आदर-भाव दहै। एक-दोसरसे मेलमिलापमे रहैजाइजो। 14 देख हमर भाइ-भैयासब, कोढिया लोकसबके चेताबनी दहै, हरेस खाल लोकसबके साहस दहै, कमजोर लोकसबके मदत कर आ सबगोरासे सैहके रह कहैके हमसब तोरासबके बिन्ती करैचियौ। 15 तुसब ककरो खराबीके बदला खराबी नै कर, महज एक-दोसरके आ सके जतहेक सब लोकसबके भलाइ करैके कोसिस कर। 16 सबदिन आनन्दित रह। 17 लगातार परथना करैतरह। 18 केहनो परिस्थितीमे परमेस्वरके धन्यबाद दहै, कथिलेकी येसु खिरिस्टमे तोरासबके लेल परमेस्वरके इक्छा यिहे चियौ। 19 पबितर आत्माके कामके नै रोक। 20 परमेस्वरके अगमबानीके तुच्छ नै ठान। 21 महज सब बातके जाँच कर आ जे चिज असल छै ओइके पकरने रह। 22 सब अधलाह बातसबसे दुर रह। 23 अपनासबके सान्ती दैबला परमेस्वर आपनेसे हरतरहसे तोरासबके पबितर राखे आ अपनासबके परभु येसु खिरिस्ट नै आबैतक तोरासबके आत्मा, परान, देह निरदोस रहे से हमर आसा चियै। 24 तोरासबके बोलाइबला परमेस्वर यि सब करतै, कथिलेकी उ बिस्बास योग्य छै। 25 भाइसब, हमरोसबके लेल परथना करैतरह। 26 ओते रहल सब परभुके जनसबमे पबितर परेमके चुम्मा चियै कैहके सुना दहै। 27 यि चिठी पैर्हके सब बिस्बासीके सुनादहै कैहके हम तोरासबके परभुके नाउमे आग्या करैचियौ। 28 अपनासबके परभु येसु खिरिस्टके अनुगरह तोरासबमे रहे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.