१ थेसलोनिकी 4 - मध्य पुरविया थारूपरमेस्वरके मनपरैबला जिबन 1 अन्तमे हमर भाइ-भैयासब परमेस्वरके मनपरैबला जिबन कनङके जियैछै से हमसब तोरासबके सिखेलियौ ओहिनङके फेनु तुसब जियैचिही। तोरासबके जिबन औरो बहौत असल हेबे कैहके परभु येसुके नाममे हमसब तोरासबके बिन्ती करैचियौ। 2 कथिलेकी हमसब परभु येसुसे पाबलाहा अधिरकारसे तोरासबके देल निरदेसन तुसब जान्बे करैचिही। 3 तुसब पबितर रह कैहके परमेस्वरके इक्छाछै। अहैलेल तुसब बेबिचारसे अलग रह। 4 पबितर आ आदरसाथ आपन घरबालीसङे जिबन बिताबे परैछै कैहके सबलोकके जाने परतै। 5 परमेस्वरके नै चिन्हैबला लोकसब जखा बेबिचारके ललसा नै कर। 6 एहैन खराब काम कैरके कोनो लोक आपन बिस्बासी भाइसबसे नाजाएज फाइदा नै उठाबे। कथिलेकी एहेन पाप करैबलासबके परमेस्वर दन्ड दैछै। अइके बारेमे हमसब पहिने तोरासबके एकदमसे चेताइने चियौ। 7 कथिलेकी परमेस्वर अपनासबके असुध हैले नै, महज पबितर जिबन बिताइके लेल बोलाइनेछै। 8 अहैलेल यि सिक्छाके इन्कार करैबला लोकके नै, महज परमेस्वरके इन्कार करैछै, जे परमेस्वर आपन पबितर आत्मा तोरासबके देने छौ। 9 एक दोसरके परेम करे परैछै तैके बारेमे तोरासबके लेल लिखैके कोनो जरुरी नै छै, कथिलेकी परमेस्वर आपनेसे तोरासबके एक दोसरके परेम करे परैछै कैहके सिखाइने छौ। 10 बास्तममे तुसब त माकेडोनिया परदेसके सब बिस्बासीसबके ओहिने परेम करैचिही, अहैलेल देख भाइ-भैयासब, तुसब औरो बेसीसे परेम कैरतेजो कैहके हमसब बिन्ती करैचियौ। 11 हमसब तोरासबके कहने छेलियौ तहै बमौजी सान्तीमे जिबन बिताबैके लक्छ राख, आपन आपन काममे लागल रह आ आपने हाथसे कमाइले बेसी से बेसी कोसिस कर। 12 अनङ करबिही त, खिरिस्टमे बिस्बास नै करैबला लोकसब सेहो तोरासबके आदर करतौ आ तोरासबके ककरो उपरमे भर नै परे परतौ। येसु खिरिस्टके दोसर आगमनके बारेमे 13 देख भाइसब, मरलहा बिस्बासीसबके कि हैछै से तोरासबके थाह हेबे से हमसब चाहैचियै, ताकि आसा नै भेल्हा लोकसब जखा तोरासबके सोक करे नै परे। 14 कथिलेकी येसु मरलै आ फेनसे जिबित भेलै कैहके अपनासब बिस्बास करैचियै, अहैलेल जब येसु फेनसे एतै त मरैसे पहिने येसुमे बिस्बास करल लोकसबके परमेस्वर फेनसे जियेतै आ ओकर सङे-सङे एतै। 15 परभुके कहल बचन अनुसारे त तोरासबके कहैचियौ कि परभु फेनसे आबैबला दिनतक अपनासब जिबित भेल्हासब कोनोभी हालतमे मरलहा लोकसबसे अगा ओकरा नै भेटबै। 16 कथिलेकी परभु जखने हुकुमके अबाज देतै आ परमुख स्वरग दुतके अबाज आ तुरहीके अबाज हेतै तखने खिरिस्टमे बिस्बास कैरके मरलहा लोकसब सबसे पहिने जिबित भ्याके उठतै। 17 तब हमसब जिबित भेल्हासब परभुके अकासमे भेटैले ओइसबके सङे-सङे बादलमे उठ्याल ज्याब आ सबदिन हमसब परभुसङे रहब। 18 अहैलेल यि बातसबसे एक दोसरके उत्साह दैत रह। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.