१ थेसलोनिकी 3 - मध्य पुरविया थारूतिमोथिके थेसलोनिकेमे पठेल्कै 1 अन्तमे जब हमसब तोरासबसे दुर रहैले नै सकलियौ त सिलास आ हम एथेन्समे रहैके बिचार करलियै, 2 आ तिमोथीके तोरासबलग पठेलियौ। उ हमरासबके भाइ आ परमेस्वरके सेबक चियै आ खिरिस्टके बारेमे सुसमाचार परचार करैछै। तोरासबके बिस्बासमे बलगर हैले आ हौसला दैकेलेल हमसब तोरासबलग ओकरा पठेलियौ। 3 ताकि कोइ दुख भेल बखतमे कोइ हतास नै हो कैहके हमरासबके इक्छाछै। सताबट त अपना बिस्बासीसबके जिबनमे अबस्य आबैछै से बात तोरासबके थाहे छौ। 4 कथिलेकी तोरासबसङे रहै बखत अपनासब सताबट पैबे कैहके बेर-बेर कहने छेलियौ। हमर कहल बात हाथ लाग्बे कैलौ, से बात थाहे छौ। 5 ओहैसे जब हमरा नै रहल गेलै त, तुसब बिस्बासमे बलगर चिही कि नै बुझ्हैके लेल तिमोथिके तोरासबलग पठेलियौ। पापमे फसाइबला सैतान कहि तोरासबके फसाके हमरासबके करल मेहनत बेकार कैरदेल्कै कि कथी कैहके हम घबरागेलियै। 6 महज तिमोथी भरखरे तोरासब लगसे हमरासबलग एलछै आ तोरासबके बिस्बास आ परेमके बारेमे असल खबर आन्ने छै। तुसब हरदम हमरासबके परेमसे सम्झैचिही आ हमरासबके तोरासबसे भेटकरैके जतेक सुरता लागल छै ओतहेक तोरोसबके भेटैके सुरता करनेचिही से बात उ हमरासबके सुनेल्कै। 7 ओहैसे हे हमर भाइसब, तोरासबके बिस्बासके असल खबर सुनैके कारन हमसब आपन सब दुख आ कस्टसबमे साहस पाबनेचियै। 8 कथिलेकी तुसब परभुमे अस्थीर चिही कैहके जब हमसब सुनलियै त हमसब नया जिबन पाबल जखा लागल। 9 तोरासबके लेल हमसब परमेस्वरके कतबो धन्यबाद देबै तैयो नै पुग्तै! तोरेसबके खातिर हमसब परमेस्वरके सामने बहौत आनन्द महसुस करैचियै। 10 तोरासबसे फेनु आमने-सामने भेटके औरो सिखाबेसकी ताकि तोरासबमे जे-जे बातके कमि छौ उ बात पुरा हेबे से उदेस्यसे हमसब रातदिन जोरदारसे परथना करैचियै। 11 आब अपनासबके परमेस्वर पिता आपनेसे आ अपनासबके परभु येसु हमरासबके लेल तोरासबलग आबैले रस्ता खोइलदेबे। 12 जहिना हमसब तोरासबके परेम करैचियौ ओहै तरहसे परभु तोरासबके एक दोसरसङे आ सब लोकसबसङे परेममे औरो बेसीसे बरहाइत रहे कैहके हमसब परथना करैचियै। 13 ओकर परेमसे तोरासबके मन नै डगमगाबे ताकि जब अपनासबके परभु येसु जहिया आपन पबितर जन सङे एतै तै बखत आपन परमेस्वर आ पिताके सामने तुसब पबितर आ निरदोस पाबे से हमरासबके परथना चियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.