१ थेसलोनिकी 2 - मध्य पुरविया थारूथेसलोनिकेमे पावलके काम 1 देख हमर भाइ-भैयासब, तोरासबसङे करल हमरासबके भेटघाट बेरथ नै भेलै कैहके तोरासबके थाहे छौ। 2 तोरासबलग आबैसे पहिने हमसब फिलिप्पी सहरमे कनङके दुख भोगलियै आ अपमानित भेलियै से तोरासबके थाहे छौ। तैयो बहौत गोरा बिरोधी रहितोपरभी परमेस्वरमे साहस कैरके हमसब तोरासबके सुसमाचार सुनेलियौ। 3 कथिलेकी जे सुसमाचारमे बिस्बास कर कैहके आगरह करलियौ उ कोनो खराब वा असुध बिचारसे नै आ नै त कोनो छल-कपटसे छै। 4 महज परमेस्वर हमरासबके ओकर योग्य भेलाके कारन सुसमाचार परचार करैके जिम्मा देने छै। अहैलेल हमसब लोकसबके खुसी करैके लेल नै, महज मन जाचैबला परमेस्वरके खुसी करैके लेल हमसब सुसमाचार सुनाइचियै। 5 तोरासबके थाहे छौ कि, हमसब तोरासबके चापलुसी नै करलियौ आ नै त कोनो चिज पेबै कैहके लोभ करलियौ। अकर साक्छी परमेस्वर स्वयम छै। 6 हमसब लोकसबसे आदर नै खोजलियै, नै त तोरासबसे आ नै आन गोरासे। हमसब खिरिस्टके परेरित भेलाके कारन तुसब हमरासबके आदर कर कैहके कहेसक्तीयौ। 7 महज जहिने माँ आपन बालबच्चाके देखभाल करैछै, तहिने कैरके हमसब सेहो तोरासबसङे नरमसे बेबहार करलियौ। 8 हमसब तोरासबके बेसी परेम करलाके कारन परमेस्वरके सुसमाचार मातरे नै बल्की आपन परानो तक दैले तयार भेलियै। कथिलेकी तुसब हमरासबके लेल कतेक पिरिय भेल छेल्ही। 9 भाइसब, हमरासबके कस्ट आ मेहनत तोरासबके थाहे छौ। तुसब परमेस्वरके सुसमाचार सुनाइबखत ककरो उपर भार नै परौक कैहके हमसब आपन खर्च-बर्च करैले दिन-रात खैटके काम करलियै। 10 हमसब बिस्बासीसब सङे रहैतकाल हमरासबके बेबहार पबितर, धारमिक आ निरदोस छेलै। तकर गबाही परमेस्वर आ तुसब अपने चिही। 11 तुसब जान्बे करैचिही कि माँ-बाबु आपन बेटा-बेटीके सङे केहेन बेबहार करैछै तैहिने हमसब तोरासबसङे हरेक गोराके करलियौ। 12 तोरासबके चालचलन परमेस्वरके नजरमे योग्य हेबे से उदेस्यसे हमसब तोरासबके अरतिउपदेस, उत्साह आ बिन्ती करैत रहलियौ। कथिलेकी परमेस्वर आपन राज आ महिमामे तोरासबके सहभागी हैकेलेल बोलाइछौ। 13 हमसब परमेस्वरके धन्यबाद चरहाइते रहैचियै, कथिलेकी जै परमेस्वरके सत बचन हमसब तोरासबके सुनेलियौ तुसब उ बचन लोकसबके चियै कैहके नै महज परमेस्वरके सत बचन छै बुइझके गरहन करलिही। उ बचन तोरासबके बिस्बासीसबके जिबनमे काम कैर रहल छौ। 14 यि बात हमरासबके थाहछै भाइ-भैयासब कथिलेकी तोरासबके जे समस्या भेलौ उ समस्या यहुदियामे रहल परमेस्वरके मन्डली अरथात खिरिस्ट येसुमे बिस्बास करैबला लोकसबके भेलै। उसब आपन जाती यहुदीसे जनङ सताबट पाबल्कै तहिने तुहुसब आपने जातीके लोकसबसे सताबट पाबनेचिही। 15 उहे यहुदी लोकसब अगमबक्ताके आ उहेसब परभु येसु सेहो मुवेल्कै आ हमरोसबके सताइबला उहेसब चियै। उसब परमेस्वरके मन नै परैबला काम करैछै आ सारा लोकसबसे बिरोधी हैछै। 16 गैर-यहुदीसबके मुक्तीके सन्देस सुनाइबला हमरासबके काममे उसब बाधा पुगेल्कै। एहेन कैरके उसब आपन पापके घरा भैरलेल्कै। आखिरमे परमेस्वरके करोध ओइसबके उपर परलै। थेसलोनिकीसबके देखैले पावल उतकट इक्छा 17 देख भाइसब, हमसब कुछ समयके लेल तोरासबसे जरुर दुर हैले परलै, महज हमरासबके मन त तोरासबसङे रहौ। तोरासबके सामनेसे देखेके बहौत इक्छा भेलाके कारन तोरासबलग जाइले बहौत कोसिस करलियौ। 18 हमसब तोरासबलग जाइले चाहैत रहियै। हम पावल त औरो घरि घरि आबैले कोसिस करलियै, महज सैतान हमरासबके बाधा देल्कै। 19 जब अपनासबके परभु येसु एतै, ओइ बखत ओकर अगा अपनासबके आसा, आनन्द आ घमन्डके मुकुटमे गर्भ करैबला कथी हेतै? कि यि तुहेसब नै चिही त? 20 बास्तममे हमरासबके गौरब आ आनन्द तुहेसब चिही। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.