१ थेसलोनिकी 1 - मध्य पुरविया थारू1 हम पावल, सिलास आ तिमोथीयोके तरफसे परमेस्वर पिता आ परभु येसु खिरिस्टमे यि चिठी लिखैचियौ। परमेस्वर थेसलोनिकीके मन्डलीसबके अनुगरह आ सान्ती देबे। थेसलोनिकीसबके बिस्बास 2 तोरा सबगोराके लेल हमसब परमेस्वरमे सबदिन परथनामे याद करैत धन्यबाद दैचियै। 3 बिस्बाससे करल तोरासबके काम, परेमसे करल तोरासबके मेहनत आ आपन परभु येसु खिरिस्टके आसामे करल तोहरसबके सहनसिलता हमसब परमेस्वर आ पिताके अगा परथनामे हरदम सम्झैत रहैचियौ। 4 हे हमर भाइसब, हमरासबके यि बात थाहछै कि परमेस्वर तोरासबके परेम करैके कारन तोरासबके चुन्ने छौ। 5 कथिलेकी जे सुसमाचार हमसब सुनेलियै उ सब्द मातरे नै महज सक्तीके साथ, पबितर आत्माके साथ आ पुरे निस्चयताके साथ एलै। जखन हमसब तोरासबके सङे रहलियै त केहेन चालचलनके जिबन जिलियै से तोरासबके थाहे छौ। 6 तुसब हमरासबके आ परभुके देखासेखी करलिही, कथिलेकी सताबटमे सेहो तुसब पबितर आत्मासे देल सुसमाचार खुसिसे गरहन करलिही। 7 तकर परिनाम यि भेलै कि तुसब माकेडोनिया आ अखैया परदेसमे भेल सब बिस्बासीके लेल एक नमुना बैन गेलचिही। 8 तोरेसबके केबल माकेडोनिया आ अखैयामे मातरे नै महज परमेस्वरके बचन तोहरसबके बिस्बासके बात सेहो सब ठामसबमे फैलगेलै। अहैलेल अकर बारेमे औरो कुछो कहैके जरुरी नै छै। 9 कथिलेकी जब हमसब तोरासबलग एलियौ त तुसब कनङके हमरासबके स्वागत कैल्ही आ जिबित आ सत परमेस्वरके सेबा करैके लेल कनङके मुरतिपुजा करैले छोइरदेल्ही से बात त लोकसब आपने कहैछै। 10 तुसब त परमेस्वरके बेटा येसु जे स्वरगसे एतै कैहके बाट ताइकरहलचिही, जकरा परमेस्वर मरलसे जियाइल्कै उ येसु चियै। परमेस्वरसे आबैबला करोधसे अपनासबके बचाइबला ओह्या चियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.