१ पतरुस 5 - मध्य पुरविया थारूएल्डरसब आ जबानसबके सलाह 1 हम एकटा मन्डलीके एल्डर चियै आ खिरिस्टके भोगल दुख-कस्टके आपनेसे देख्ने चियै आ पछा आबैबला महिमामे सहभागी हेबै। ओहैसे हम तोरासबके बिचमे भेल एल्डरसबके बिन्ती करैचियौ। 2 तोरासबके जिम्मामे देल परमेस्वरके भेरासबके देखभाल कर। यि काम करकापमे पैरके नै महज खुसिसे परमेस्वरके इक्छा बमोजिम आ कोनो पैसा-कौरीके लोभसे नै महज सेबाके मन ल्याके कर। 3 तोरासबके जिम्मामे देल बिस्बासीसब उपर हुकुम नै चला महज ओइसबके लेल एकटा उदाहरन बन। 4 जब परधान चरबाहा परगट हेतै, तब तुसब सबदिन चम्कैबला मुकुट पाबबिही जकर सोभा कहियो नै घटतौ। 5 तहिनङे जबानसब, बुढ लोकसबके अधिनमे रह। तुसब नम्र भ्याके एक दोसरके सेबा कर। कथिलेकी पबितर धरमसास्तरमे लिखल छै कि, “परमेस्वर घमन्डी लोकसबके बिरोध करैछै, महज नम्र लोकसबके अनुगरह करैछै।” 6 तैदुवारे नम्र भ्याके सक्तिसाली परमेस्वरके अधिनमे रह आ उ तोरासबके ठिक समयमे सम्मानित करतौ। 7 तोरासबके सब चिन्ता-फिकिर ओकरमे राइख दहै कथिलेत उ तोरासबके देखभाल करैछौ। 8 होसियार रह आ जागल रह, कथिलेकी तोरासबके दुस्मन सैतान ककरा भेटाइबै आ ख्यालेबै कैहके गरजैबला सिंह जखा खोजैत घुमैछै। 9 बिस्बासमे बौकार भ्याके सैतानके बिरोध कर। कथिलेकी सन्सारमे भेल औरो बिस्बासीसब सेहो अहिनङे दुख भोइगरहलछै से बात तोरासबके थाहेछौ। 10 तुसब कुछ समय कस्ट भोग्लाके बाद, अनुगरहसे भरल अपनासबके परमेस्वर, जे तोरासबके खिरिस्टमे अनन्त महिमामे सहभागी हैकेलेल बोलाइनेछौ। उ आपनेसे तोरासबके फेनसे अस्थापना करतौ, सिध करतौ, बलगर बनाके अस्थिर कराइतौ। 11 जुगो जुग तलिक सारा सक्ती पराकरम ओकरे हेबे। आमेन। अन्तिम गोरलगी 12 हम यि छोट चिठी बिस्बासयोग्य भाइ सिलाससे लिखाबैचियौ। हम तोरासबके साहस दैकेलेल आ तोरासबके जे भ्यारहलछौ उ परमेस्वरके सच्चा अनुगरह चियै कैहके गबाही दैचियौ। यि अनुगरहमे अस्थिर भ्याके रह। 13 अते बेबिलोनमे तोरेसब जखा चुनलगेल मन्डलीके लोकसब आ खिरिस्टमे हमर बेटा मरकुस सेहो तोरासबके गोरलगी पठाइनेछौ। 14 एक दोसरके पबितर परेमसे गोरलगी कर। खिरिस्टमे भेल तोरा सबकोइके सान्ती हेबे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.