१ पतरुस 4 - मध्य पुरविया थारूपरमेस्वरके इक्छा अनुसार जिबन जिनाइ 1 खिरिस्ट आपन देहमे दुख भोगल्कै ओहिनङे तुहुसब सेहो ओकरे जखा सोच राख, कथिलेकी जे लोक देहमे दुख भोगनेछै, से पापसे दुर रहैछै। 2 आबसे तुसब अइ पिरथिबीमे बाचै तलिक आपन जिबन लोकके जखा अधलाह इक्छामे नै, महज परमेस्वरके इक्छा अनुसारके जिबन बिता। 3 तुसब बितलहा दिनसबमे गैर-यहुदी जखा निरलज बेबहार करनाइ, बेबिचारमे लिन, खराब अभिलासामे लगनाइ, पिके मातल, मोज-मज्जा करैबला आ घिरनित मुरतिपुजामे परसस्त समय बिताइलिही। 4 आब तुसब निरलज जिबन नै बिताइचिही से देखके उसब छक परैछै आ तोरासबके बदनाम करैछौ। 5 महज जिबित आ मरलहा लोकसबके नियाय करैके लेल तैयार भ्याके रहल परमेस्वरके अगा ओइसबके लेखा दैलेपरतै। 6 वह्या खातिर ओकरोसबके सुसमाचार सुन्याल गेलछेलै जेसब अखन मरलछै। ताकी उसब लोकेसबके जखा देहमे नियाय पाबतै तैयो आत्मामे उसब परमेस्वरे जखा जिये। 7 सब चिजके अन्त हैके समय चैल एलछै। ओहैसे तुसब आपन मनके सुध आ आपनेके बसमे राख ताकी तुसब असलसे परथना करे सक। 8 सबसे मुख बात यि चियै कि तुसब एक दोसरके पुरा मनसे परेम कर, कथिलेकी परेमसे बहुतो पापसबके झाइपदैछै। 9 एक दोसरके आपन-आपन घरमे बिना कच-कच सेबा-सत्कार कर। 10 परमेस्वर तोरासबके किसिम-किसिमके बरदान देनेछौ। एक दोसरके सेबा करैके लेल देल यि बरदानके पुरा सदउपयोग कर। 11 जे बोलैबला बरदान पाबनेछै से परमेस्वरके बचनसे बोले। जे सेबा करैछै से परमेस्वरके देल सक्तिसे सेबा करे ताकी सब कामसे येसु खिरिस्ट दुवारा परमेस्वरके परसन्सा हेबे। ओकर महिमा आ सक्ती सबदिन रहे। आमेन। दुखमे आनन्द मना 12 हे पिरिय भाइसब, तोरासबके जाचैके लेल अगनी परिक्छा एल बखत, यि नै हैबला काम चियै कैहके तुसब अचम नै मान। 13 बरु खिरिस्टके दुख-कस्टमे सहभागी हैले पाबलियै कैहके आनन्द मना। जब उ आपन महिमाके सङे फेनसे एतै, तै बखत तुसब औरो आनन्द मनाइले सके। 14 खिरिस्टके पछा चलैके कारन तोरासबके अपमान करैछौ त, तुसब धन्यके चिही, कथिलेकी परमेस्वरके महिमीत आत्मा तोरासबमे रहैछौ। 15 महज तोरासबमेसे कोइ नै हतिया, चोरी, खराब काम कैरके या औरोके काममे फैसेके दन्ड नै भोग। 16 महज खिरिस्टमे बिस्बास करलासे दुख-कस्ट भोगैचिही त लाज नै मान। बरु खिरिस्टके नाम लैले पाबलियै कैहके परमेस्वरके परसन्सा कर। 17 नियाय हैबला समय आइबगेल छै आ यि नियाय परमेस्वरके आपने लोकसबसे सुरु हेतै। हमरासबके नियाय हैछै त, परमेस्वरके सुसमाचार कहियो नै बिस्बास करैबलाके दसा केहन हेतै? 18 कथिलेकी पबितर धरमसास्तरमे एहेन लिखल छै, “यदि धरमी लोकसबके मुक्ती कठिनसे हैछै त अधरमी आ पापी लोकसबके दसा औरो केहेन हेतै?” 19 ओहैसे तुसब परमेस्वरके इक्छा अनुसार दुख-कस्ट भोगैबलासब भलाइके काम कैरते रह आ आपन जिबन बिस्बासयोग्य सिरिस्टीकरताके सोइप दहै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.