१ पतरुस 3 - मध्य पुरविया थारूघरबलासब आ घरबालीसब 1 घरबालीसब, तुसब आपन-आपन घरबलासबके अधिनमे रह। एहेन करबिही त परमेस्वरके बचनमे बिस्बास नै करैबला घरबालासब तोरासबके असल चालचलन देखके बिस्बास करतौ। तोरासबके कुछो नै कहे परतौ, 2 कथिलेकी तोरासबके चालचलन कतहेक सुध आ आदरनिय चियै से उसब आपनेसे देख्तौ। 3 केसके सिङगार, सोनाके गहना गुरिया लगेनाइ आ असल-असल बस्तर तोरासबके देखाबटी सिङगार-पेटार नै हेबे। 4 बरु तोरासबके भितरी हिरदयके नरम आ सान्त आत्माके नास नै हैबला मोतिसे सजा, जे परमेस्वरके नजरमे बहौत मोलके चियै। 5 कथिलेकी परमेस्वरमे भरोसा करैबाली पहिनेके पबितर घरबालीसब आपन-आपन घरबलासबके अधिनमे रैहके यह्या किसिमसे अपनाके सिङगार-पेटार करैछेलै। 6 जनङकी सारा, आपन घरबला अबराहमके आपन पतिदेब माइनके ओकर कहल मानैछेलै। यदि तुहुसब कोनो बातके डर नै माइनके ठिक काम करबिही त, तुहुसब साराके बेटीसब कहाइबिही। 7 तहिनङे घरबलासब, आपन-आपन घरबालीसबसङे बिचारसिल भ्याके रह आ ओइसबके अबला माइनके आदर कर। मनमे याद राख कि तोहरे जखा अनन्त जिबनके बरदानमे सहभागी छौ। अनङ करबिही त तोरासबके परथनामे कोनो किसिमके बाधा नै परतौ। असल काम कैरतोपरभी दुख-कस्ट 8 अन्तमे हम यि कहैले चाहैचियौ, तुसब एके मनके हो, एक दोसरके पिर मरका बुझ, एक दोसरके भाइ दाखिल माइनके परेम कर। तुसब दयालु आ नम्र बन। 9 खराबीके बदला खराबी या अपमानके बदला अपमान नै कर। बरु खराबीके बदला आसिस दहै, कथिलेकी यह्या करैके लेल परमेस्वर तोरासबके बोलाइनेछौ आ तुहुसब आसिस पाबबिही। 10 कथिलेकी पबितर धरमसास्तरमे एहेन लिखलछै, “जे खुसि जिबन बिताबैके चाहना करैछै आ असल दिन देखैले चाहना करैछै से आपन जिहसे खराब बोली बाजैसे आ आपन ठोरसे छली बात बाजैसे दुर राखे। 11 उ खराब कामसे घुइमके आबे आ असल काम करे आ सान्तीके खोजि करे आ ओहैमे लागल रहे। 12 कथिलेकी परमेस्वरके नजर धरमी लोकसबमे रहैछै आ उ धरमी लोकसबके परथना सुनैछै महज परमपरभुके चेहरा खराब काम करैबला लोकसबके बिरोधमे रहैछै।” 13 यदि तुसब भलाइके काममे लागल रहबिही त, तोरासबके हानी के करतौ? 14 यदि असल काम कैरतोपरभी दुख भोगैले परतौ त, तुसब आसिस पाबबिही। तहैलेल लोकके धम्कीसे नै डरा, नै त चिन्ता कर। 15 बरु खिरिस्टके परभु माइनके आपन हिरदयमे सरदा कर। तोरासबमे भेल आसाके बिसयमे कोइ पुछताछ करैछौ त जबाफ दैले हर समय तयार रह। 16 महज नर्म भ्याके आदरकेसाथ सुध बिबेकसे ओइसबके जबाफ दहै। यदि तुसब एहेन करबिही त, खिरिस्टमे भेल तोरासबके असल चालचलन देखके तोरा बदनाम करैबला आपने लाजमे परतै। 17 खराब काम कैरके दुख भोगनाइसे त, भलाइके काम कैरके परमेस्वरके इक्छा अनुसार दुख भोगनाइ असल चियै। 18 कथिलेकी अपनासबके परमेस्वरमे आनैके लेल खिरिस्ट धरमी भ्याके सेहो अधरमीसबके पापके लेल एकबेर सबदिनके लेल मरलै। उ देहमे मरलै महज परमेस्वर ओकरा आत्माके सक्तीसे जिबित करल्कै। 19 उ वह्या पबितर आत्माके सक्तीसे कैदमे परलहा आत्मासबके परचार करल्कै। 20 उ आत्मासब पहिने परमेस्वरके आग्यापालन नै करल्कै जहिया नोआ पानी जहाद बनाबै छेलै। उसब आपन पापसे फिरतै कि कैहके धिरजकेसाथ परमेस्वर असियाल छेलै। जहादमे कमे लोक, अरथात आठ गोरे मातरे जल परलयसे बचल छेलै। 21 वह्या पानी बप्तिस्माके एकटा रुप चियै, जे तोरासबके बचाबैछौ। यि देहके मैल उगारनाइ नै चियै, महज सुध बिबेकसे परमेस्वरमे करलगेल समरपनता चियै। यि मिरतुसे भेल येसु खिरिस्टके पुनरुथानसे तोरासबके बचाइछौ। 22 येसु स्वरगमे गेलै आ सब स्वरगदुतसब, अधिकारसब आ सक्तीसबके बसमे कैरके परमेस्वरके दहिनाकात बिराजमान भेल छै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.