१ पतरुस 2 - मध्य पुरविया थारूजिबित पथल आ चुनल लोक 1 अहैलेल तुसब दुस्टतासे, छल-कपटसे, सब डाहसे आ सब निन्दासे दुरे रह। 2 भरखरे जलमल बच्चासब दुधके चाहना करल जखा तुहुसब सुध आत्मिक बचनके लेल पियासल रह। वेहन करैत जेब्ही त तुसब मुक्तीमे बरहैत जेब्ही। 3 कथिलेकी परभु कतहेक दयालु छै से बातके सबाद तुसब पाबनेचिही। 4 तुसब परभुके लगमे या, जे परमेस्वरके जिबित पथल चियै, जकरा लोकसब छाइटदेनेछेलै महज उ परमेस्वरके दिरिस्टीमे छानल गेल आ बहुमुल्यके चियै। 5 तुसब जिबित पथल चिही। परमेस्वर तोरासबके परयोग कैरके आपन आत्मिक मन्दिर बन्यारहलछौ, ताकी तुसब पबितर पुजारी भ्याके येसु खिरिस्टसे परमेस्वरके मनपरैबला आत्मिक बलिदान चरहाइले सकबिही। 6 कथिलेकी पबितर धरमसास्तरमे लिखल छै, “देख! सियोनमे हम चुनल एकटा बहौत मोलके कोनाके पथल राखैचियौ। ओकरमे बिस्बास करैबला कहियो नै लाजमे परतै।” 7 बिस्बास करैबला तोरासबके लेल यि पथल अनमोल छौ। बिस्बास नै करैबालासबके लेल त यि पथल एहेन छै, “जै पथलके मिसतिरीसब बेकार समैझके फेकदेनेछेलै वह्या पथल जगके मुल खम्हा भेलै।” 8 पबितर धरमसास्तर कहैछै, “एह्या पथल चियै जैमे लोकसबके ठेस लागैछै। एह्या चट्टान चियै जैमे लोकसब खसैछै।” कथिलेकी परमेस्वरके बचनमे बिस्बास नै करैबला ठेस लाग्तै कैहके तोकल छेलै। 9 महज तुसब त परमेस्वरके छानल जन, राजकिय पुजारी, पबितर जाती, निजी परजा चिही। उ तोरासबके अन्हारसे ओकर अचमके इजोतमे आनल्कौ, ताकी तुसब ओकर आस्चरजके कामसबके घोसना करैले सक। 10 पहिने त तुसब परमेस्वरके जन नै छेल्ही, महज अखुन परमेस्वरके जन भेलचिही। पहिने तुसब परमेस्वरके दया नै पाबनेछेल्ही, महज अखुन तुसब परमेस्वरके दया पाबनेचिही। परमेस्वरके सेबक 11 हे पिरिय भाइसब, यि सन्सारमे तुसब बिदेसी आ परदेसी जखा चिही। हम तोरासबके बिन्ती करैचियौ, देहके अधलाह इक्छासब पुरा करै दिसन नै लाग। एहेन परकारके इक्छासब तोरासबके आत्माके बिरोधमे उठतौ। 12 परमेस्वरमे बिस्बास नै करैबला लोकसबके बिचमे तोरासबके चालचलन निक हेबे। उसब तोरासबके खराब काम करैबला कैहके दोख लगाइतौ तैयो तोरासबके असल काम देखे आ परमेस्वर नियाय करैले आबैतखिना ओकर महिमा करे। 13 परभुके आदरके खातिर अधिकारीसबके अधिनमे रह, चाहे सबसे उपरमे रहैबला रजा हेबे, 14 या अधिकारीसब हेबे। उसब खराब काम करैबलासबके दन्ड दैकेलेल आ असल काम करैबलाके परसन्सा करैके लेल परमेस्वरके खट्याल लोकसब चियै। 15 तुसब असल काम कैरके मुरुख लोकसबके मुरखाहा बात बोलैबलासबके मुह बन्द कर कैहके परमेस्वरके इक्छाछै। 16 तुसब स्वतन्तर लोक जखा जिबन बिता। आपन स्वतन्तरताके खराब काम करैके लेल बहना नै बना, महज परमेस्वरके दास भ्याके असल काम कर। 17 रजा आ सब लोकसबके आदर कर। खिरिस्टमे बिस्बास करैबलासबके परेम कर। परमेस्वरके डर मान। 18 हे नोकरसब, पुरा आदरकेसाथ आपन मालिकसबके अधिनमे रह। तोरा भलाइ चिताइबला आ दया करैबला मालिकसबके अधिनमे मातरे नै महज निरदयी मालिकसबके अधिनमे सेहो रह। 19 यदि परमेस्वरके याद कैरके ठिक काम करबिही आ धिरज धारन कैरके अनियाय सहबिही त, परमेस्वर तोहरसे खुसी हेतौ। 20 यदि कोइ खराब काम कैरके सरासर दन्ड भोग्तै त, उ कनङके चाबसी पाबतै? महज कोइ असल काम कैरते कैरते सरासर दन्ड पाबतै त, परमेस्वर ओकरसे खुसी हेतै। 21 कथिलेकी परमेस्वर तोरासबके यह्या कामके लेल चुनल्कौ, खिरिस्ट तोरासबके लेल दुख भोगल्कौ आ उ एकटा उदाहरन बन्लै। आबसे तुसब ओकर देख्याल बाटमे चलेपरतौ। 22 उ नै त कोनो पाप करल्कै आ नै त ओकर मुहसे छलकपटके बात निकल्लै। 23 जब लोकसब ओकरा अपमान करल्कै, तब उ कोनो जबाफ नै उल्टाइल्कै। दुख भोगैबखत ककरो धम्की नै देल्कै, महज ठिकसङे नियाय करैबला परमेस्वरमे भरोसा करल्कै। 24 हमसब पापके लेल मैरके धारमिकताके लेल जियैले सकि कैहके खिरिस्ट अपनासबके पापसबके खातिर आपन देहमे पाप बोइकके कुरूसमे मरलै। ओकर चोटसबसे तुसब निक भेलचिही। 25 कथिलेत तुसब हर्याल भेंरासब जखा छेल्ही, महज आब त तुसब आत्माके चरबाहा आ रक्छा करैबला लग घुइमके एलचिही। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.