१ पतरुस 1 - मध्य पुरविया थारू1 हम सिमोन पतरुस, येसु खिरिस्टके परेरितके तरफसे पोन्टस, गलातिया, कापाडोकिया, एसिया आ बिथिनिया परदेस भैर परदेसी भ्याके तितर-बितर भ्याके रहैबला परमेस्वरके छानल जनसबके यि चिठी लिखैचियै। 2 परमेस्वर पिता आपन पहिनेके योजना अनुसार तोरासबके छानल्कौ आ आपने पबितर आत्मासे पबितर बनेल्कौ। येसु खिरिस्टके आग्यापालन करैले आ ओकर लहुके छिटकासे सुध हेबे कैहके उ तोरासबके छानल्कौ। परमेस्वरके अनुगरह आ सान्ती तोरासबमे परसस्त हेबे। जिबित असाके खातिर परमेस्वरके परसन्सा 3 परमेस्वर आ अपनासबके परभु येसु खिरिस्टके पिताके महिमा हेबे। ओकर महान दयासे हमसब लया जलम पाबनेचियै। उ लया जलम येसु खिरिस्टके पुनरुथानसे हमसब पाबनेचियै। ओहैसे अपनासबके जिबित आसा यि चियै कि, 4 स्वरगमे तोरासबके खातिर सैतके राखल उतराधिकार कहियो नास नै हैबला, नै सरैबला आ नै मुरझाइबला जखाछै। 5 तुसब बिस्बास करलाके कारन परमेस्वरके सक्तिसे सुरक्छित रहलचिही। उ मुक्ती तोरासबके खातिर तैयार करनेछौ जे अन्तिम समयमे परगट हेतौ। 6 यि तोरासबके लेल बहौत खुसीके बात चियौ, ओनङ त, अखैन कुछ समयके लेल तरासबके बहौत परकारके कस्ट भोगेपरल छौ। 7 नास हैबला सोनाके आइगमे खाइरके सुध करल जखा तोरासबके बिस्बास ओहौसे मुल्यबान छौ। अहै खातिर तोरासबके बिस्बास सच ठहरे आ येसु खिरिस्ट परगट हैबला दिनमे परसन्सा, महिमा आ आदरके योग्य बने। 8 तुसब ओकरा नै देख्नेचिही तैयो परेम करैचिही। अखैन तुसब नै देखैचिही तैयो ओकरमे बिस्बास करैचिही आ बखाने नै करेसकैबला गौरबमय आनन्दमे तुसब खुसी चिही। 9 कथिलेत तुसब ओकर उपर बिस्बास करलासे तुसब आत्माके मुक्ती पाबनेचिही। 10 तोरासबके मिलल यि मुक्तीके बारेमे अगमबक्तासब बहौत निकसे खोज-तलास करने रहौ। परमेस्वर तोरासबके दैबला अनुगरहके बारेमे पहिनेसे अगमबानी करने छेलौ। 11 ओकरासबके भितरमे रहल खिरिस्टके आत्मा खिरिस्टके दुख भोगेपरतै आ पछा आबैबला महिमाके बारेमे पहिनेसे भबिसबानी करने रहै। तब उ समय कहिया आ कनङके एतै कैहके उसब खोज-तलास करने छेलै। 12 तै बखत अगमबक्तासबके करलहा यि सेबा ओइसबके फाइदाके खातिर नै महज तोरेसबके खातिर चियौ कैहके परमेस्वर ओइ अगमबक्तासबके देखाइने छेलै। यि बात स्वरगसे पठेल्हा पबितर आत्माके सक्तीसे सुसमाचार सुनाबैबला दुवारा अखैन तोरासबके घोसना करनेछौ। यि बात स्वरगदुतोसब जानैले चाहैछै। पबितर जिबन जियैके लेल बोलाबट 13 अहै खातिर तोरासबके आपन मन तैयार राख, आत्म संयमी बन आ येसु खिरिस्ट आबै बखत तुसब पाबैबला अनुगरहमे पुरा आसा राख। 14 तुसब आग्याकारी धिया-पुता जखा रह। अन्जानमे रहै बखत अधलाह इक्छा अनुसार जनङ करैछेल्ही तनङ नै कर। 15 तोरासबके बोलाइबला परमेस्वर जनङ पबितर छौ तहिनङ तुहुसब सब रहन-सहनमे पबितर हो। 16 पबितर धरमसास्तरमे एहेन लिखलछै, “तुसब पबितर हो, कथिलेत हम पबितर चियै।” 17 परमेस्वर कोनो पक्छपात नै कैरके नियाय करैछौ जब तुसब ओकरा परथना करैतखिना “पिता” कैहके पुकारैचिही त यि सन्सारमे रहैतलिक तुसब ओकरा सर्दा हैबला जिबन बिता। 18 तुसब जानैचिही कि परमेस्वर तोरासबके पिता-पुरखासे चलैत एल बेरथके चालचलनसे दाम तिरके तोरासबके छुटकरा देल्कौ। उ दाम सोना या चानी जखा नास हैबला चिज नै चियै। 19 महज येसु खिरिस्टके निरदोस आ अनमोल लहुसे तोरासबके छुटकरा देनेछौ। उ सुध आ निस्खोट बैलभोगमे चरहाबैबला थुमा छेलै। 20 परमेस्वर सन्सारके सिरिस्टी करैसे पैहनिए ओकरा चुन्ने रहै महज तोरासबके भलाइके खातिर अन्तिम समयमे उ परगट भेलै। 21 ओकरेसे तुसब परमेस्वरमे बिस्बास करलिही, जे ओकरा मरलसे जिबित करल्कै आ ओकरा महिमा देल्कै, तैल्याके तोरासबके आपन बिस्बास आ भरोसा परमेस्वरमे रहे। 22 आब तुसब सतके माइनके आपन मन सुध कैरलेने चिही तहैलेल एक दोसर कोनो छलकपट नै कैरके भाइ-भैया आ दिदी-बहिन जखा परेम कर। हिरदयसे एक दोसरके परेम कर। 23 तुसब बिनास हैबला बियासे नै, बरु अभिनासी परमेस्वरके जिबित आ कहियो नास नै हैबला बचनसे लया जलम पाबनेचिही। 24 कथिलेत पबितर धरमसास्तरमे लिखल छै, “सब मानब जाती घास जखाछै आ ओकर सुन्दरता घासेके फुल जखा हैछै। घास सुइख जाइछै आ फुल झैर जाइछै, 25 महज परभुके बचन सबदिन रहैछै।” एह्या बचन तोरासबके परचार करलगेल सुसमाचार चियौ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.