१ युहन्ना 5 - मध्य पुरविया थारूपरमेस्वरके बेटामे बिस्बास 1 जे कोइ येसुवे खिरिस्ट चियै कैहके बिस्बास करैछै, उ सबलोक परमेस्वरके बेटा-बेटी चियै। जे कोइ पिताके परेम करैछै से कोइ ओकर बेटाके सेहो परेम करैछै। 2 जब हमसब परमेस्वरके परेम करैचियै आ ओकर आग्यासब पालन करैचियै, तब ओहैसे जानैचियै कि, हमसब परमेस्वरके बेटा-बेटीके परेम करैचियै। 3 परमेस्वरसे परेम करनाइके मतलब ओकर आग्यासबके पालन करनाइ चियै। ओकर आग्यासब हमरासबके लेल भैरगर नै छै। 4 कथिलेकी जे परमेस्वरके बेटा-बेटीसब चियै, उ अइ सन्सारके जितलैछै। खिरिस्टमे बिस्बास करैके कारन अपनासब अइ सन्सारके जितने चियै। 5 के सन्सारके जिते सक्तै त? जे कोइ येसुके परमेस्वरके बेटा कैहके बिस्बास करतै, उ लोक मातरे सन्सारके जित्तै। येसु खिरिस्टके साक्छीसब 6 येसु खिरिस्ट वह्या चियै जे पानी आ लहुसे एलै। उ पानीसे मातरे नै महज पानी आ लहुसे एलै। यि बात सत छै कैहके पबितर आत्मा साक्छी छै, कथिलेकी पबितर आत्मा सत चियै। 7 तिन तरहसे ओकर बारेमे साक्छी देलगेल छैः 8 पबितर आत्मा, पानी आ लहु। यि तिनु एकेटा बातके साक्छी दैछै। 9 हमसब लोकसबके देल साक्छीके त सुइकार करैचियै, महज परमेस्वरके देल साक्छी त ओइसबसे औरो महान छै। उ आपन बेटाके बारेमे साक्छी देने छै। 10 जे कोइ परमेस्वरके बेटामे बिस्बास करैछै, ओकर हिरदयमे अइ बातके साक्छी रहैछै। परमेस्वरके बिस्बास नै करैबला ओकरा झुठा ठहराइछै, कथिलेकी परमेस्वर आपन बेटाके बारेमे देल साक्छीके उ बिस्बास नै करैछै। 11 उ साक्छी यि चियै कि परमेस्वर अपनासबके अनन्त जिबन देने छै आ उ जिबन ओकर बेटामे छै। 12 जकरसङे परमेस्वरके बेटा छै, ओकरसङे जिबन छै आ जकरसङे परमेस्वरके बेटा नै छै ओकरसङे जिबन नै छै। अनन्त जिबनके निस्चयता 13 तुसब परमेस्वरके बेटाके नाममे बिस्बास करैबलासबके हम यि चिठी लिखैचियौ, ताकी तुसब अनन्त जिबन पाबनेचिही कैहके थाह हेबे। 14 परमेस्वरके इक्छा बमौजी जे कुछ माङैचियै उ अपनासबके परथना सुनैछै कैहके अपनासबके पुरा बिस्बास छै। 15 अपनासब जे कुछ परथनामे माङैचियै उ अपनासबके परथना सुनैछै कैहके अपनासब जानैचियै आ एहो जानैचियै कि जे कुछ माङने चियै उ हमरासबके भेटगेल छै। 16 कोनो लोक बिस्बासीके पाप करैत देखैछै आ उ पापके नतिजा मिरतु नै हेतै त, ओकरलेल परमेस्वरसङे परथना कैर दैहे आ परमेस्वर ओकरा जिबन देतै। महज मिरतुमे लजाइबला पाप सेहो छै, ओकरलेल परथना कैरदहै कैहके हम नै कहैचियौ। 17 सब दुस्ट काम पाप चियै, महज अहिनो पाप हैछै जकर परिनाम मिरतु नै हैछै। 18 परमेस्वरके बेटा-बेटी भ्याल लोक पाप कैरते नै रहैछै से बात अपनासब जानैचियै। कथिलेकी परमेस्वरके बेटा ओइसबके बचाइछै आ दुस्ट सैतान ओकरा छुबैले नै सकैछै। 19 हमसब परमेस्वरके बेटा-बेटी चियै आ पुरे सन्सार दुस्ट सैतानेके बन्धनमे छै कैहके अपनासब जानैचियै। 20 अपनासब जानैचियै कि परमेस्वरके बेटा आइबगेल छै आ सत परमेस्वरके चिन्हैले उ अपनासबके समझसक्ती देने छै। हमसब ओकर बेटा येसु खिरिस्टमे भेलासे सत परमेस्वरमे चियै। ओह्या सत परमेस्वर आ अनन्त जिबन चियै। 21 हमर पिरिय बेटा-बेटीसब, तुसब अपने आप झुठा देबी-देउतासबसे बैचके रह। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.