१ युहन्ना 4 - मध्य पुरविया थारूसतके आत्मा आ झुठके आत्मा 1 हमर पिरिय भाइ-भैयासब, हमरसङे पबितर आत्मा छै कहैबला जकरे-तकरेमे बिस्बास नै कर, महज ओइसबसङे परमेस्वरके आत्मा छै कि नै छै, जाँचके देख कथिलेत बहौत झुठा अगमबक्तासब सन्सारमे एलछै। 2 येसु खिरिस्ट मानबके रुपमे एलछै से सुइकार करैबला आत्मा परमेस्वरसे चियै कैहके चिन्हबिही। 3 अहिनङे जे कोइ येसु खिरिस्टके परमेस्वरसे एलछै कैहके सुइकार नै करैछै। उ परमेस्वरसे नै एल रहैछै। उ त खिरिस्ट बिरोधीसे एलछै। उ आइबरहल छै कैहके तुसब सुन्ने चिही, उ त सन्सारमे चैलएलछै। 4 हमर धियापुतासब, तुसब परमेस्वरके चिही आ तुसब झुठा अगमबक्तासबके जितनेचिही कथिलेत तोरासबमे रहल पबितर आत्मा सन्सारमे भेल आत्मासे सक्तिसाली छै। 5 उसब सन्सारके भेलाके कारन सन्सारेके बात करैछै आ सन्सारेके लोकसब ओकरासबके बात सुनैछै। 6 अपनासब त परमेस्वरके चियै। जे परमेस्वरके चिन्हैछै, उ अपनासबके बात सुनैछै। जे परमेस्वरके लोक नै चियै, उ अपनासबके बात नै सुनैछै। अहैसे अपनासब सतके आत्मा आ झुठके आत्मा छुटयाइले सकैचियै। परमेस्वर परेम चियै 7 पिरिय सङिसब, अपनासब एक दोसरके परेम करु कथिलेत परेम परमेस्वरेसे आबैछै। परेम करैबला परमेस्वरके धियापुता चियै आ उ परमेस्वरके चिन्हैछै। 8 परेम नै करैबला परमेस्वरके नै चिन्हैछै कथिलेत परमेस्वर परेम चियै। 9 परमेस्वर अपनासबके एहेन परेम करल्कै कि उ आपन एक मातरे बेटाके सन्सारमे पठाइल्कै, ताकी अपनासब ओकरसे जिबन पाबेसकी। 10 साँचो परेम यि चियै कि, हमसब परमेस्वरके परेम नै करलियै महज तैयो परमेस्वर अपनासबके परेम करल्कै आ अपनासबके पापके बलिहैके लेल आपन बेटाके पठाइल्कै। 11 हमर पिरिय सङिसब, परमेस्वर अपनासबके अतहेक परेम करने छै त अपनोसबके एक-दोसरके परेम करेपरतै। 12 परमेस्वरके कोइने कहियो देख्नेछै। महज अपनासब एक-दोसरके परेम करबिही त परमेस्वर अपनासबमे बास करतै आ ओकर परेम अपनासबमे पुरा हेतै। 13 उ अपनासबके पबितर आत्मा देलाके कारन हमसब यि जानैचियै कि, हमसब परमेस्वरमे रहैचियै आ परमेस्वर हमरासबमे रहैछै। 14 हमसब यि देख्ने चियै आ साक्छी दैचियै कि, परमेस्वर पिता सन्सारके मुक्ती दैबला हैकेलेल आपन बेटाके पठाइने छै। 15 येसुवे परमेस्वरके बेटा चियै कैहके सुइकार करैबला लोकमे परमेस्वर बास करैछै आ उ लोक परमेस्वरमे बास करैछै। 16 परमेस्वर अपनासबके परेम करैछै कैहके हमसब जानैचियै आ ओकर परेममे पुरा बिस्बास छै। परमेस्वर परेम चियै। जे परेममे रहैछै उ परमेस्वरमे रहैछै आ परमेस्वर ओकरमे बास करैछै। 17 अहिनङे अपनासबके परेम सिध हैतजेतै आ नियाइके दिनमे अपनासबके डराबे नै परतै, कथिलेकी खिरिस्ट जहैनछै, तहिनङे अपनोसब यि सन्सारमे चियै। 18 परेममे डर नै हैछै महज सिध परेम डरके दुर कैरदैछै। कथिलेकी डरके सङहत त दन्डके जरे हैछै आ जे डराइछै उ परेममे सिध नै रहैछै। 19 हमसब एक-दोसरके परेम करैचियै कथिलेकी परमेस्वर हमरासबके पहनिये परेम करल्कै। 20 यदि कोइ परमेस्वरके परेम करैचियै कहैछै आ आपन भाइ-बहिनके घिरना करैछै त उ झुठ छै। आपनसे देखल भाइके परेम नै करैबला नै देखल परमेस्वरके कनङ परेम करे सक्तै? 21 जे परमेस्वरके परेम करैछै, ओकरा आपन भाइयोके परेम करे परतै। एह्या आग्या खिरिस्ट अपनासबके देने छै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.