१ युहन्ना 3 - मध्य पुरविया थारूपरमेस्वरके बेटा-बेटी 1 देख्ही त, पिता अपनासबके कतहेक परेम करने छै, जे साँचोके हमसब परमेस्वरके बेटा-बेटी कहाइचियै। सन्सारके लोकसब परमेस्वरके नै चिन्हलाके कारन अपनासबके नै चिन्हैछै। 2 पिरिय सङिसब, अखुन अपनासब परमेस्वरके बेटा-बेटी चियै। महज पाछे कथी हेबै से अखुन तलिक जानकारी नै देनेछै। खिरिस्ट एलाकेबाद अपनोसब ओकरे जखा हेबै कथिलेत उ जैहनङ छै, अपनासब तैहनङे देख्बै। 3 खिरिस्टमे एहेन आस करैबला, उ आपनोके खिरिस्टे जखा पबितर कैरके राखैछै। 4 जे कोइ पाप करैछै उ परमेस्वरके नियमके पालन नै करैछै। बास्तममे परमेस्वरके नियमके पालन नै करनाइये पाप चियै। 5 तुसब जानैचिही कि लोकसबके पाप दुर करैले खिरिस्ट परगट भेलै आ ओकरमे कोनो पाप नै छै। 6 जे खिरिस्टमे रहैछै से लोक पाप नै करैतरहैछै। महज पाप करैबला लोक ओकरा नै त देखनेछै नै त चिन्हैछै। 7 हे पिरिय धियापुतासब, कोइ नै तोरासबके बहकाबे। धारमिकतामे चलैबला लोक खिरिस्ट जखा धरमी हैछै। 8 फेनो-फेनो पाप करैबलासब सैतानके लोक चियै। कथिलेत सैतान सुरुवेसे पाप करैत एलछै। अहै खातिर सैतानके काम नास करैले परमेस्वरके बेटा परगट भेलछै। 9 परमेस्वरके बेटा-बेटी पाप नै करैतरहैछै कथिलेत परमेस्वरके स्वभाब ओकरमे रहैछै। उ पाप करे नै सकैछै कथिलेत उ परमेस्वरसे जलमल रहैछै। 10 परमेस्वरके बेटा-बेटी आ सैतानके बेटा-बेटी अहिनङके चिन्हैले सकैचियै कि धारमिकतामे नै चलैबला आ आपन भाइ-भैयासबके परेम नै करैबला परमेस्वरके बेटा-बेटी नै हैछै। एक-दोसरके परेम कर 11 तुसब यि बात सुरुवेसे सुन्ने चिही की हमसबके एक-दोसरके परेम करे परतै। 12 अपनासब कयिन जखा नै हेबेपरतै। उ सैतानके लोक भेलाके कारन आपन भाइ हाबिलके मारल्कै। उ कथिले आपने भाइके मारल्कै? कथिलेत ओकर कामसब दुस्ट छेलै। महज ओकर भाइके काम धरमी छेलै। 13 हे भाइ-भैयासब, जब सन्सारके लोकसब तोरासबके घिरना करतौ तब अचम नै मान। 14 अपनासब जानैचियै कि मिरतुके मुहसे निकैलके जिबनमे पुइगगेल चियै कारन अपनासब एक दोसरके परेम करैचियै। जे लोकसब परेम नै करैछै उ मिरतुके बन्धनमे रहैछै। 15 जे लोक आपन भाइके घिरना करैछै उ जानमारा चियै आ तुसब जानैचिही कि जानमारा लोकमे अनन्त जिबन नै रहैछै। 16 खिरिस्टके परेम हमसब जानैचियै कि उ अपनासबके खातिर आपन परान देल्कै। तैल्याके अपनोसबके आपन भाइके लेल आपन परान दैलेपरतै। 17 जे लोकसङे सन्सारके धन-सम्पैत छै, महज आपन भाइके घटि-कमीमे देखभाल करैले मन कठोर करैछै त वेहन लोक परमेस्वरके कनङ परेम करे सक्तै? 18 हे हमर धियापुतासब, अपनासब खाली मुह आ बातसे मातरे परेम नै कर, महज अपनासब काम आ सत्यतासे परेम करैजो। परमेस्वरके अगा साहस 19 अहैसे अपनासब सतके लोकसब चियै से जानैचियै आ परमेस्वरके अगा निरधक साथ रहैचियै। 20 जब अपनासबके मन आपनेके दोस दैछै, हमसब जानैचियै परमेस्वर अपनासबसे महान छै आ उ सब बात जानैछै। 21 हे हमर पिरिय सङिसब, आपने मन अपनासबके दोसी नै ठहराइतौ त अपनासबके परमेस्वरके अगा जाइले साहस एतौ। 22 तब अपनासब जे माङबिही से सब चिज ओकरेसे पाबबिही कथिलेत अपनासब ओकर आग्या मानैचियै आ ओकरा निक लागैबला काम करैचियै। 23 ओकर आग्या एह्या चियै कि हमसब परमेस्वरके बेटा येसु खिरिस्टके नाममे बिस्बास करनाइ आ ओकर देल आग्या अनुसार एक-दोसरके परेम करनाइ चियै। 24 जे परमेस्वरके आग्यासब पालन करैछै, उ सबगोरा ओकरेमे रहैछै आ परमेस्वर ओकरासबमे रहैछै। परमेस्वर अपनासबमे बास करैछै से बात परमेस्वरके द्याल पबितर आत्मासे हमसब जानैचियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.