१ युहन्ना 2 - मध्य पुरविया थारूखिरिस्ट हमर सहयोगी 1 हे हमर दुलरुवा धियापुतासब, तुसब पाप नै करिहे कैहके यि बात तोरासबके खातिर लिखैचियौ। महज कोइ पाप करियोलेतै त अपनासबके दिसनसे पितासङे बिन्ती करैबला एक गोरा धरमी येसु खिरिस्ट छै। 2 उ अपनासबके पापके दन्डसे बचाइके खातिर बलिदान भेलछै आ अपनेसबके खातिर मातरे नै, महज सन्सारमे भेल सबलोकके पापके खातिर भेलछै। 3 यदि अपनासब ओकर आग्यापालन करबै त अहैसे अपनासब जान्बै कि अपनासब ओकरा चिन्हैचियै। 4 जे कोइ “हम ओकरा चिन्हैचियै” कहैछै, महज ओकर आग्या नै मानैछै त उ झुठा चियै आ ओकरमे सत्यता नै रहैछै। 5 महज जे परमेस्वरके बचनके पालन करैछै उ परमेस्वरके साँचो परेम करैछै। ओहैसे अपनासब ओकरमे चियै से जानैचियै। 6 परमेस्वरमे चियै कहैबला लोक येसुवे जखा चले परैछै। लबका आग्या 7 पिरिय सङिसब, हम तोरासबके लबका आग्या नै, महज वह्या पुरन्के आग्या लिखैचियौ। जे सुरुवेसे चलल एल पुरन्का आग्या चियै। यि पुरन्का आग्या तोरासबके सुनलेहे बचन चियौ। 8 तैयो हम तोरासबके खातिर एकटा लबका आग्या लिखरहल चियौ, जे येसु खिरिस्ट आ तोरासबमे सत देखा परल छौ, कथिलेत अन्हार हटे लागल छै आ सतके इजोत पहिनेसे चमैकरहल छै। 9 जे आपनके इजोतमे चियै कैहके कहैछै, महज आपन भाइके घिरना करैछै त, उ अखुन्तो अन्हारेमे छै। 10 आपन भाइके परेम करैबला इजोतमे रहैछै आ ओकरमे दोसरके बाधा दैबला कोनो बात नै रहैछै। 11 महज भाइके अपहेलना करैबला अन्हारमे रहैछै आ अन्हारेमे चलैछै। उ कते ज्यारहलछै से नै जानैछै, कथिलेत अन्हार ओकरा अन्हर कैरदेने रहैछै। 12 हमर दुलरुवा धियापुतासब, हम तोरासबके यि लिखरहल चियौ, कथिलेत येसु खिरिस्टेसे तोरासबके पाप छमा भेलछौ। 13 हौ बाबुसब, हम अहाँसबके लिखैचियै कथिलेत जे सुरुवेसे छेलै ओकरा अहाँसब चिन्हैचियै। हे जबानसब, हम तोरासबके लिखरहलचियौ, कथिलेत तुसब ओइ दुस्ट सैतानके जितनेचिही। 14 हौ बाबुसब, हम अहाँसबके लिखैचियै, कथिलेकी जे सुरुवेसे चियै ओकरा अहाँसब चिन्हने चियै। हे कन्की धियापुतासब, हम तोरासबके लिखैचियौ। कथिलेत तुसब परमेस्वर पिताके चिन्हनेचिही। हे जबानसब, हम तोरासबके यि लिखैचियौ, कथिलेकी तुसब बौकार चिही आ परमेस्वरके बचन तोरासबके हिरदयमे रहलाके कारन तुसब दुस्ट सैतानके जितलेने चिही। 15 सन्सार या सन्सारमे भेल्हा कोनो चिजके परेम नै कर। यदि कोनो लोक सन्सारके परेम करैछै त उ परमेस्वर पिताके परेम करे नै सक्तै। 16 कथिलेत सन्सारमे भेल्हा चिजसब अरथात देहके कुइक्छा, आँखके लालच आ जिबनके घमन्ड परमेस्वर पितासे नै, महज यि सब त सन्सारसे एलछै। 17 सन्सार आ सन्सारके कुइक्छासब ओर्या जाइछै, महज परमेस्वरके इक्छामे चलैबला लोक सबदिन जिबित रहतै। खिरिस्टके बिरोधी 18 हमर पिरिय धियापुतासब, यि अन्तिम घरी चियै। खिरिस्ट बिरोधी आबैबला छै से तुसब सुन्नेचिही। खिरिस्टके बहौत बिरोधीसब त आइबगेल छै। तहैसे अपनासब यि अन्तिम घरी चियै से बात जानैचियै। 19 उसब अपनासबके लोक नै रहै, तहै खातिर अपनासबके छोइरके चैलगेलै। यदि उसब अपनासबके लोकसब रहतियै त आपनेसबके सङे रहतियै। उसब अपनासबके नै चियौ से बात परस्टे छै से देखाइले उसब अपनासबके छोइरके चैलगेलै। 20 महज खिरिस्ट तोरासबके पबितर आत्मा देनेछौ आ सत बात तुसब जानैचिही। 21 तुसब सतके नै चिन्हैचिही कैहके हम नै लिख्नेचियौ, महज तुसब सतके चिन्हैचिही आ सतसे झुठ नै आबैछै से बात तुसब जाइन्ते चिही कैहके हम यि लिखने चियौ। 22 तब झुठ के चियै त? झुठ वह्या चियै जे येसुवे खिरिस्ट चियै कहैले इन्कार करैछै। पिता आ बेटाके जे कोइ इन्कार करैछै वह्या खिरिस्ट बिरोधी चियै। 23 जे बेटाके इन्कार करैछै ओकरसङे पिता नै रहैछै महज जे बेटाके सुइकार करैछै ओकरसङे पितो रहैछै। 24 तै खातिर जे बात तुसब सुरुसे सुन्ने चिही, तकरा आपन मनमे राखने रह। यदि उ तोरासबके मनमे रहतौ त, तुहुसब बेटा आ पिताके मनमे बास करबिही। 25 उ अपनासबके एकटा परतिग्या करने छै, उ परतिग्या अनन्त जिबन चियै। 26 हम यि सब बात तोरासबके भरममे पारैबलासबके बारेमे लिख्नेचियौ। 27 महज खिरिस्ट पबितर आत्मा तोरासबके देनेछौ। तोरासबके उपर पबितर आत्मा रहैतलिक कोइ नै तोरासबके सिखाइतौ कथिलेत पबितर आत्मा सब सिखाइतौ। ओकर सिख्याल सब बात सत हैछै, झुठ नै। पबितर आत्माके देल सिक्छा बमौजी खिरिस्टमे रह। 28 हमर धियापुतासब, खिरिस्टमे रह आ जहिया उ परगट हेतौ, तहिया तोरासबके साहस मिल्तौ तब ओकर आबैबला ओइ दिन ओकर अगा लाजमे नै परबिही। 29 खिरिस्ट धरमी छै से तुसब जानैचिही। तहैलेल निसचिन्त रह कि धारमिकतामे चलैबला सब परमेस्वरसे जलमल रहैछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.