१ युहन्ना 1 - मध्य पुरविया थारूजिबन दैबला बचन 1 सुरुवेसे भेल, हमसब आपने कानसे सुनल, आपने आँखसे देखल यि जिबन दैबला बचनके बिसयमे तोरासबके लिखैचियौ जकरा हमसब गौरसे देख्ने चियै आ आपने हाथसे छुबने चियै। 2 जब जिबन दैबला परगट भेलै, तब हमसब ओकरा देखलियै आ हमसब वह्या अनन्त जिबनके बिसयमे साक्छी दैचियौ आ तोरासबके कहैचियौ, जे पिता सङे छेलै वह्या अपनासबके लग परगट भेलै। 3 हमसब जे देखने आ सुन्ने चियै, से हमसब तोरासबके सुनाबैचियौ जेकि तुहुसब हमरासबसङे सङगती करेसकी। अपनासबके सङगती त पिता आ ओकर बेटा येसु खिरिस्टसङे छै। 4 अपनासबमे भरपुर आनन्द रहे कैहके हमसब यि बात लिखरहल चियौ। परमेस्वर इजोत चियै 5 जे बात हमसब परमेस्वरके बेटा येसुसे सुनलियै से बात एह्या चियै कि, परमेस्वर इजोत चियै आ ओकरमे एकोरती अन्हार नै छै। 6 यदि अपनासब कहैचियै कि हमसब परमेस्वरसङे संगती करैचियै तैयो अन्हारेमे चलैचियै त, अपनासब झुठ बोलैचियै आ सत्यतामे नै चलैचियै। 7 महज परमेस्वर जहिनङ इजोतमे रहैछै तहिनङ हमसब इजोतमे चलैचियै त अपनासबके संगती एक दोसरसङे हैछै आ ओकर बेटा येसुके लहुसे अपनासबके सब पापसे सुध करैछै। 8 यदि अपनासब कहैचियै कि हमरमे पाप नै छै तब अपनासब अपने-आपके धोखा दैचियै आ अपनासबमे सत नै रहैछै। 9 यदि अपनासब आपन पाप परमेस्वरके अगा सुइकार करबिही त, उ अपनासबके पाप छमा करतौ आ सब अधरमसे सुध करतौ कथिलेत उ बिस्बासयोग्य आ धरमी छै। 10 यदि हमसब कोनो पाप नै करनेचियै कहैचिही त परमेस्वरके झुठा ठहराइचिही आ ओकर बचन अपनासबमे नै रहतौ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.