१ कोरन्थी 9 - मध्य पुरविया थारूपरेरितसबके अधिकार आ करतब 1 कि हम स्वतन्तर नै चियै से? कि हम परेरित नै चियै से? कि हम परभु येसु खिरिस्टके नै देखलियै से? कि तुसब परभुमे हमर कामके परतिफल नै चिही से? 2 हम औरो लोकसबके लेल परेरित नै चियै तैयो कमसेकम तोरासबके लेल त चियौ। कथिलेत हम परभुके एक परेरित चियै कैहके तुहेसब हमर गबाही चिही। 3 कोइ कोइ हमर अधिकारके बारेमे सबाल करैछै। ओइसबके लेल हमर जबाफ एह्या चियै, 4 कि हमरासबके खाइ-पियैके अधिकार नै छै? 5 कि औरो परेरितसब जखा, परभुके भाइसब आ पतरुस जखा हम्हुसब आपन घरबाली ल्याके यातरा करैके अधिकार नै छै से? 6 कि हमरा आ बरनाबासके मातरे पेट पालैके लेल काम करैले परतै? 7 आपने खचरमे के सिपाहीके काम करैछै? के अङगुर खेती लग्याके ओकर फल खाइले नै पाबैछै? के गाइ-माल पाइलके ओकर दुध पियैले नै पाबैछै? 8 कि यि बात हम लोकके हिसाबसे कहैचियौ से? कि बेबस्था सेहो एहेन बात नै कहैछै से? 9 कथिलेत मोसाके बेबस्थामे एहेन लिखल छै, “दौनी करैबला बरदके मुहमे जाबि नै लगा।” कि परमेस्वर बरदसबके लेल यि बात कहनेछै से? 10 कि उ अपनासबके लेल नै कहनेछै? हँ, यि साँचोके अपनेसबके लेल लिखने छै। कथिलेत हर जोतैबला आ दौनी करैबला अनके कुछ हिसा पाब्बै तकर आसमे काम करैछै। 11 तोरासबके बिचमे हमसब आत्मिक बिया छिटने चियौ। यदि हमसब तोरासबसे कुछ चिज लैचियौ त, कि उ अनियाय भेलौ से? 12 यदि तोरासबसे औरो परचार करैबलासब मुनासिब हकके दाबी करैछौ त कि हमरासबके झन बेसी हक नै छै? महज यि हक हमसब उपयोग नै करनेचियै। खिरिस्टके सुसमाचार सुनाबैले कोनो बाधा नै हेबे कैहके सबकुछ सैहके रहैचियै। 13 मन्दिरमे सेबा करैबला मन्दिरमे चरह्याल चिजसब खाइछै आ बेदीके सेबा करैबला लोक बेदीसे आपन हिसा पाबैछै। कि यि बात तोरासबके थाह नै छौ? 14 अहिनङे सुसमाचार परचार करैबलासब सुसमाचारेसे गुजारा चलाबे कैहके परभु आग्या देनेछै। 15 महज यि हकसबमेसे हम कोनो परयोग नै करनेचियै आ तोरासबके हमरा कुछ दैले परतौ कैहके हम नै लिखने चियौ। कथिलेत हमर गर्ब करैबला बातसे कोइ हमरा दुर कराबैछै त बरु हमरा मरनाइ असल चियै। 16 यदि हम सुसमाचार परचार करैचियै त ओइमे घमन्ड करैबला कोनो कारन नै छै, कथिलेत यि काम हमरा करैयै परतै। हम सुसमाचार परचार नै करबै त हमरा धिक्कार छै। 17 यदि यि काम हम आपन इक्छासे करैचियै त, हम आपन इनाम पाबतियै। महज परमेस्वर हमरा यि कामके जिम्मेबारी देलाके कारनसे हम आपन करतब समैझके यि काम पुरा करैचियै। 18 आब हमर इनाम कि चियै त? हक अनुसार पाबैबला कोनो पैसा नै ल्याके फोकटमे सुसमाचार परचार कैरके पाबैबला आनन्दे हमर इनाम चियै। 19 हम लोकसबसे स्वतन्तर चियै तैयो बहुतो गोरेके खिरिस्टमे आनैले सकी कैहके सबके लेल हम आपनेके दास बनेलियै। 20 जब हम यहुदीसबके बिचमे काम करैछेलियै तब खिरिस्टमे उसब बिस्बास करे कैहके हम यहुदी जखा भेलियै। तहिनङे मोसाके देल बेबस्थाके अधिनमे रहैबलासब खिरिस्टमे बिस्बास करे कैहके हम बेबस्थाके अधिनमे नै रहियोकेभी बेबस्थाके अधिनमे रहल जखा भेलियै। 21 जब हम बेबस्था नै भेलसबके बिचमे छेलियै, खिरिस्टमे उसब बिस्बास करे कैहके हम बेबस्था नै भेलसब जखा भेलियै। अकर मतलब हम मोसाके देल बेबस्था नै मानैचियै कैहके नै कहैचियौ। हम त झन खिरिस्टके बेबस्थाके मानैचियै। 22 हम कमजोर लोकसबके बिचमे काम करैबखत उसब खिरिस्टमे बिस्बास करे कैहके हम्हु कमजोर भेलियै। हम सबके लेल सबकुछ बैन गेलियै ताकि हरतरहसे लोकसबके खिरिस्टमे बचाबैले सकी। 23 हम सुसमाचार फैलाबैके लेल यि सबकुछ करैचियै ताकी हम आसिसके भागिदार भ्यासकी। 24 दौरमे भाग लैबला सबकोइ दौरैछै महज एक गोरे मातरे इनाम पाबैछै से बात तोरासबके थाह नै छौ? तैखातिर तुसब इनाम पाब्बै तै किसिमसे दौर। 25 खेलमे भाग लेबेबला खेलारी सब बातमे अनुसासनमे रहैले परैछै। उसब नास हैबला मुकुटके लेल एहेन करैछै, महज हमसब नास नै हैबला मुकुटके लेल एहेन करैचियै। 26 तैल्याके हम बिना लक्छ नै दौरैचियै आ हबामे मुक्का मारैबला जखा हम मुक्का नै मारैचियै। 27 हम आपन देहके बसमे राखैके लेल तालिम द्याके खेलारी जखा अनुसासनमे राखैचियै। नै त औरोके परचार करलाके बाद हम आपने अयोग्य ठहरबै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.