१ कोरन्थी 8 - मध्य पुरविया थारूमुरुतिके चरहेल्हा चिज 1 आब हम मुरुतिके चरह्याल खाइबला चिजके बारेमे कहैचियौ। अपनासब जान्बे करैचियै कि, अकर बारेमे अपनासब सङे ग्यान छै। ग्यान लोकके घमन्डी बनाबैछै महज परेम लोकके उन्नती कराबैछै। 2 यदि कोनो लोक “हम जानैचियै” कहैछै त, बास्तममे उ जतेक जानैके चाही, उ जान्ने नै रहैछै। 3 महज जे लोक परमेस्वरके परेम करैछै, परमेस्वर ओकरा चिन्हैछै। 4 तैखातिर मुरुतिके चरह्याल खाइले मिलैछै कि नै मिलैछै तैके बारेमे हमसब जानैचियै कि, सन्सारके मुरती किछो नै चियै आ एक मातरे परमेस्वर बाहेक औरो कोइ नै छै। 5 अकासमे या पिरथिबीमे नाम मातरेके बहुतो देबी-देउतासब छै। कतहेक लोक एहेन बहुतो देबी-देउतासब आ भगवानसबके पुजैछै। 6 महज हमसब जानैचियै कि, अपनासबके एक मातरे परमेस्वर पिता छै, जकरसे सब चिजके सिरिस्टी भेलै आ हमसब ओकरे लेल जियैचियै। अपनासबके थाहछै कि, अपनासबके एक मातरे परभु, येसु खिरिस्ट छै। ओकरेसे सबकुछ सिरिस्टी भेलै आ जकरसे हमसब जियैचियै। 7 महज सब बिस्बासी लोकके यि ग्यान नै हैछै। ओकरासबके मुरतिपुजाके आदत भेलाके कारन अखुन्तो मुरुतिके चरह्याल चिज खाइछै त साँचोके मुरुतिके चरह्याल चिज खाइचियै कैहके ठानैछै। ओइसबके मनमे एहेन गलत बिचार भेलाके कारन उ खेलासे “हम असुध भेलियै” कैहके ठानैछै। 8 महज खाइबला चिजसबसे अपनासबके परमेस्वरके नजदिक नै पुगाबैछै। हमसब नहियोखेबै त कोनो नोक्सानी नै हेतै आ खेबो करबै त कोनो फैदो नै हेतै। 9 महज तुसब होसियार रह, तोरासबके खाइ-पियैबला चिजसबके स्वतन्तरतासे बिस्बासमे कमजोरसबके लेल बाधाके कारन नै बने। 10 यदि कोनो कमजोर बिस्बास भेल लोक तोरासब जखा ग्यान भेल लोकके मन्दिरमे मुरुतिके चरह्याल चिज खाइत देख्तौ त, ओकरा मुरुतिके चरह्याल चिज खाइले साहस मिल्तै महज ओकरा आपने मन दोख लगाइतै। 11 एहेन कमजोर बिस्बासी भाइ तोहर ग्यानके कारनसे नास हैछै, जकर खातिर खिरिस्ट मरलै। 12 अहिनङके तुसब कमजोर बिस्बासीसबके बिरोधमे पाप करैचिही आ उसबके मनमे चोट पुगाके खिरिस्टके बिरोधमे पाप करैचिही। 13 तैखातिर हमर खाइबला चिजसे हमर आपने बिस्बासी भाइ नास हैछै त हमर भाइ नास नै हेबे कैहके हम कहियो मासु नै खेबै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.