१ कोरन्थी 7 - मध्य पुरविया थारूबियाहके बारेमे सिक्छा 1 आब हम तोरासबके लिखल चिठीमे, “लोक बियाह नै करनाइ असल चियै” पुछलहा बातके बारेमे कहैचियौ। 2 बेबिचारमे फसैबला अबस्था अनेक भेलाके कारन सब पुरुख लोकके आपन-आपन घरबाली हेबे आ सब जनिके आपन-आपन घरबला हेबे। 3 घरबला आपन घरबालीके ओकर बैबाहिक हक देबे आ तहिनङे घरबालीयो आपन घरबलाके देबे। 4 घरबाली आपन देहमे अधिकार नै राखैछै, महज ओकर घरबला राखैछै। तहिनङे घरबला आपन देहमे अधिकार नै राखैछै, महज ओकर घरबाली राखैछै। 5 घरबला आ घरबाली एक-दोसरके सारिरीक समबन्धसे इन्कार नै कर। इन्कारो करबिही त परथनामे समय बिताबैके लेल एक-आपसमे सल्लाह कैरके कुछ समयके लेल अलग रह। तब फेर एकसाथ रह, नै त तुसब आपन मन थामैले नै सक्लाके कारनसे सैतान तोरासबके परिक्छामे पारतौ। 6 हरेक लोक बियाह करैले परतै कहैबला बात हम नै कहैचियौ महज चाहेबला हरेक गोरा बियाह करैले सक्तै कैहके कहैचियौ। 7 सबलोक हमरे जखा बियाह नै कैरके रहे से हमर इक्छाछै। महज कोनो लोक परमेस्वरसे बियाह करैबला बरदान पाबने छै त कोनो लोक नै करैबला। 8 आब हम बियाह नै करलाहासब आ बिधुवासबके कहैचियौ, कि तुसब हमरे जखा बियाह नै करबिही त असल हेतौ। 9 महज उसब आपन मनके बसमे राखैले नै सकैछै त उसब बियाह करे। कथिलेत मनके बसमे नै राखैले सक्लासे त बरु बियाह करनाइ असल चियै। 10 आब हम बियाह करलहासबके करा आग्या दैत कहैचियौ, हमर आग्या नै, महज परभुके आग्या चियौ। घरबाली आपन घरबलासे अलग नै हेबे। 11 यदि उ आपन घरबलासे अलग हेतै त, उ फेरसे बियाह नै करे। यदि उ फेनसे सङे रहैले चाहतै त आपन घरबलासङे मिलाप करे। तहिनङे घरोबला आपन घरबालीके नै त्यागे। 12 महज आब हम औरो लोकसबके कहैचियौ। यि हमर आग्या चियौ, परभुके नै, यदि ककरो खिरिस्टमे बिस्बास नै करैबली घरबाली छौ आ ओकर घरबाली आपन घरबलासङे रहैले चाहैछै त, घरबला आपन घरबालीके नै त्यागे। 13 तहिनङे ककरो खिरिस्टमे बिस्बास नै करैबला घरबला छौ आ ओकर घरबला आपन घरबालीसङे रहैले चाहैछै त, घरबाली आपन घरबलाके नै त्यागे। 14 कथिलेत बिस्बास नै करैबला घरबला आपन बिस्बास करैबाली घरबालीके कारनसे पबितर हैछै आ बिस्बास नै करैबाली घरबाली आपन बिस्बास करैबला घरबलाके कारनसे पबितर हैछै। नै त ओइसबके धिया-पुतासब असुध हेतियै महज आब उसब परमेस्वरमे पबितर रहैछै। 15 महज बिस्बास नै करैबला घरबला या घरबाली अलग हैले चाहैछै त, उसब अलग हेबे। ओइ बखत बिस्बास करैबला घरबला या घरबाली बियाह बन्धनसे स्वतन्तर हैछै। कथिलेत परमेस्वर तोरासबके सान्तीमे रहैले बोलाइनेछै। 16 हे घरबाली, तोरा कि थाह! सायद तोहर कारनसे तोहर घरबला उदार पाबैले सक्तियौ कि? या हे घरबला, तोरा कि थाह! सायद तोहर कारनसे तोहर घरबाली उदार पाबैले सक्तियौ कि? 17 चाहे जे हेबे, परभु जकरा जनङके खटाइनेछौ आ जे बरदान देनेछौ, उ तहिनङके जिबन बिताबे। सब मन्डलीसबके लेल हमर नियम एह्या चियै। 18 यदि कोनो लोक बिस्बास करैसे पहिने ओकर खतना भेल छै त, आब उ खतनाके चेन्हा मेटाइले नै चाहे। तहिनङे कोनो लोक बिस्बास करैसे पहिने ओकर खतना नै भेल छै त, आब उ खतना करैले नै चाहे। 19 कथिलेत खतना करनाइ या नै करनाइ बरका बात नै चियै, महज परमेस्वरके आग्यापालन करनाइ सबसे बरका बात चियै। 20 परमेस्वर तोरासबके बोलाबै बखत जे जनङ छेल्ही, उ ओह्या अबस्थामे रहे। 21 परमेस्वर तोरा बोलाइ बखत कि तु ककरो दास छेल्ही? यदि छेल्ही त तकर चिन्ता नै कर, महज स्वतन्तर हैले मौका भेटैछौ त, स्वतन्तर भ्याजो। 22 कथिलेत परभु बोलाबैसे पहिने जे दास छेलै, आब उ परभुमे स्वतन्तर लोक भेलछै। तहिनङे परभु बोलाइसे पहिने जे स्वतन्तर छेलै, उ खिरिस्टके दास भेलछै। 23 परमेस्वर तोरासबके मोल तिरके किन्नेछौ, तैखातिर लोकसबके दास नै बन। 24 हे हमर पिरिय भाइ-भैयासब, परमेस्वर जकरा जनङ अबस्थामे बोलाइनेछौ, उ तहिनङे अबस्थामे परमेस्वरसङे रहे। 25 आब कुमारीसबके बारेमे हमरसङे परभुके आग्या किछो नै छौ। महज हम परभुके अनुगरहसे एक बिस्बासयोग्य लोक भेलाके कारन तोरासबके यि सल्लाह दैचियौ। 26 हम अखुन्का दुखके बिचार करैचियै त, जे जहिनङ अबस्थामे छै, उ तहिनङे अबस्थामे रहतै त निक हेतै। 27 यदि तोरा घरबाली छौ त, आपन घरबालीसे अलग हैले नै खोज। यदि तोरा घरबाली नै छौ त, बियाह करैले नै चाह। 28 यदि तु बियाह करबो करबिही त उ पाप नै चियै। तहिनङे यदि कुमाइर छौरी बियाह करतै त उ पाप नै करैछै। तैयो बियाह करैबलासबके अइ सन्सारमे झनझट हैछै आ हम तोरासबके अइसे बचाइले चाहैचियौ। 29 हे हमर भाइ-भैयासब, हमर कहैके मतलब यि चियै कि, समय एकदम कम छै। आबसे घरबाली हैबलासब घरबाली नै भेलसब जखा रहे। 30 जेसब सोक करैछै उसब सोक नै करल जखा रहे आ खुसी हैबलासब खुसी नै भेल जखा हेबे। बेच-बिखन करैबलासब आपनसङे किछो नै भेल जखा रहे। 31 जेसब सन्सारके चिज-बिज उपभोग करैछै उसब तैके कोनो वस्ते नै करल जखा करे, कथिलेत अइ सन्सारके चिजसब नास भ्यारहल छै। 32 तुसब जिबनके बारेमे चिन्ता नै कर कैहके हमर इक्छाछै। बियाह नै करल लोक परभुके कनङके खुस करबै तैमे धियान लगाइछै। 33 महज बियाह करल लोक आपन घरबालीके कनङके खुस करबै तैमे धियान दैछै। 34 एहेन लोकके मन दुइ दिसन हैछै। तहिनङे कुमाइर छौरी देह आ आत्मा दुनु कनङके पबितर राखबै कैहके परभुके बारेमे धियान लगाइछै। महज बियाह करल जनि आपन घरबलाके कनङके खुस राखबै कैहके सन्सारके बातसबमे धियान दैछै। 35 हम यि बात तोरासबके भलाइके लेल कहैचियौ, तोरासबके बियाह करैसे रोकैले नै चाहैचियौ, महज तुसब निक काम कैरके पुरा मनसे परभुके सेबा कर से कहैले चाहैचियौ। 36 यदि कोनो लोकके मङनी भेल छौ आ उ लोक आपन मङनी भेल छौरीके निक बेबहार नै करल लागैछै आ उ छौरीके उमेर बितेलागलछै त उसब बियाह करे। अइमे कोनो पाप नै लागैछै। 37 महज उ लोक बियाह नै करबै कैहके मनमे पका करने छै आ जबरजस्तीमे नै परलछै, महज आपन मन बसमे राखैले सकैछै त, उ लोक बियाह नै करैले चाहैछै त निके करैछै। 38 यदि उ लोक आपन मङनी भेल छौरीसे बियाह करैछै त असले करैछै महज बियाह नै करैछै त उ औरो निक करैछै। 39 जाबेतक घरबला जिबित रहैछै ताबेतक घरबाली आपन घरबलाके अधिनमे रहैछै। महज ओकर घरबलाके मिरतु भेलाके बाद उ स्वतन्तर हैछै आ उ जकरसे बियाह करैके मन लागैछै तकरसे बियाह करे सकैछै महज उ बिस्बासी हैकेचाही। 40 हमर बिचारमे यि छै कि, यदि उ फेरसे बियाह नै करतै त औरो बेसीसे खुस रहतै। यि सल्लाह हम परमेस्वरके आत्मासे दैचियौ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.