१ कोरन्थी 6 - मध्य पुरविया थारूबिस्बासीसबके बिचमे बेमेल 1 यदि तोरासबमेसे एक-दोसरके बिचमे झगरा भेल छौ त, तुसब नियाइके लेल परमेस्वरके पबितर जनलग नै ज्याके बिस्बास नै करैबला लग जाइले कनङके साहस करेसक्तै? 2 पबितर जनसब सन्सारके लोकसबके नियाइ करतै कैहके, कि तोरासबके थाह नै छौ? यदि तुसब सन्सारके लोकसबके नियाय करैचिही त, एहेन छोट से छोट झगरासब मिलाबैले नै सकैचिही? 3 हमसब कोनो दिन स्वरगदुतसबके नियाय करबै से बात तोरासबके थाह नै छौ? यदि एहेन छै त यि जिबनमे साधारन झगरासब मिलेनाइ, कि बरका बात चियै? 4 यदि तोरासबमे एहेन झगरासब छौ त, तुसब कथिले बिस्बास नै करैबला लग जाइचिही? जैसबके मन्डलीमे कोनो मोलके नै ठानैछै? 5 तोरासबके लाजमे पारैके लेल हम यि कहैचियौ। कि तोरासबके बिचमे भाइ-भैयारीके झगरा मिलाबैबला एकोटा बुधिमान लोक नै छौ से? 6 महज एकटा बिस्बासी भाइ दोसर बिस्बासी भाइसङे झगरा कैरके नियाइके लेल बिस्बास नै करैबलासबके लग ल्याजाइछै! 7 एक दोसरके बिरोधमे झगरा करनाइ तोरासबके हार चियौ। बरु अनियाइ कथिले नै सहबै? कथिले नै आपने ठगल जेबै? 8 महज तुसब त आपने बिस्बासी भाइ-भैयासबके अनियाइ करैचिही आ ठगैचिही। 9 कि अधरमी लोकसब परमेस्वरके राजमे ढुकैले नै सक्तै कैहके तोरासबके थाह नै छौ? अइ बातके गम्भिर रुपसे ले आ तुसब आपनेके धोखा नै दहै, कथिलेत अनैतिक काम करैबला, मुरतिपुजा करैबला, बेबिचार करैबला, समलिङगिसब, पुरुखगामीसब, 10 चोरसब, लोभ करैबलासब, पियक्करसब, निन्दा करैबलासब आ लुटपाट करैबलासब परमेस्वरके राजके हकदार हैले नै सक्तै। 11 तोरासबमेसे कतहेक गोरे एक समयमे अहिनङे छेल्ही, महज तुसब आब परभु येसुके नाममे आ परमेस्वरके आत्मासे धोबल गेलचिही, पबितर भेलचिही आ धरमी ठहरल चिही। बेबिचारसे अलग रह 12 कोइ कहैछै, “सबकुछ करैके लेल हमरा अधिकार छै”, महज सब बात हमर लेल भलाइके नै छै। कहैले त हम्हु सकतियै, “सबकुछ करैके लेल हमरा अधिकार छै” महज हम ककरो दास नै बन्बै। 13 कोइ कहैछै, “भोजन पेटके लेल आ पेट भोजनके लेल चियै।” महज परमेस्वर दुनुके नास करतै। लोकके देह बेबिचारके लेल नै, महज परभुके लेल चियै आ देहके लेल आबस्यक चिज परभुवे बन्दोबस करैछै। 14 जनङ परमेस्वर आपन सक्तिसे येसु खिरिस्टके मरलसे जिबित करल्कै तहिनङे आपनोसबके ओकर सक्तीसे जिबित करतै। 15 तोरासबके देह खिरिस्टके अङ्गसब चियौ कैहके कि तोरासबके थाह नै छौ? कि हम खिरिस्टके अङ्गसब ल्याके बेस्यासबके अङ्ग बनाइबै? एहेन कहियो नै हेबे! 16 जे लोक बेस्यासङे जाइछै, उ लोक बेस्यासङे एके देह हैछै से बात कि तोरासबके थाह नै छौ? कथिलेत पबितर धरमसास्तरमे एहेन लिखल छै, “उ दुनु एके देह हैछै।” 17 महज जे लोक परभुसङे एक हैछै, उ लोक ओकरसङे आत्मामे एक हैछै। 18 बेबिचारसे अलगे रह। औरो पाप, लोक आपन देहसे बाहर करैछै, महज बेबिचार करैबला लोक आपने देहके बिरोधमे पाप करैछै। 19 तोरासबके देह पबितर आत्माके मन्दिर चियौ, जे पबितर आत्मा तुसब परमेस्वरसे पाबनेचिही आ उ तोरासबमे बास करैछौ, से बात तोरासबके थाह नै छौ? तुसब स्वयम आपने नै चिही। 20 कथिलेत परमेस्वर तोरासबके मोल तिरके किन्ने छौ। तैखातिर तुसब आपन देहमे परमेस्वरके महिमा कर। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.